MIKA 1 - Luvale Bible 1970

Lungungu IwahaSamaliya naYelusalema

¹ Awa akiko mazu aYehova aze ejile kuli Mika wakuMolexete hamakumbi aYotame naAhaze naHezekiya, vaze vapwile vamyangana javaYuta, awa amwene haSamaliya nahaYelusalema.

² Enu vatu veka naveka muvosena, ivwililenu. Ove mavu, nenu vyuma vyakulumbamaho muvyosena, tengelekenu matwitwi enu, kaha Mwata Yehova apwenga Cinjiho muli enu, Ivene Mwata hakuhanjika mutembele yenyi yajila.

³ Mwomwo ivwenu, Yehova mwalovoka muma lyenyi, mwasuluka nakulyata hakunyunga hamavu.

⁴ Jipili najiyengunuka muxi yenyi, vinema navipulika, nge mwasela kukakahya, nge mwameya vanahingunwina kwakumbolongoka.

⁵ Vyosenevi vineza hamulonga waYakova wakuzomboka jiximbi, hamilonga yavava vakuzuvo yaIsalele yaxili. Mulonga waYakova wakuzomboka jiximbi ukiko uka? Likiko Samaliya nyi? KwaYuta kwakunyunga kukiko kulihi? kukiko kuYelusalema nyi?

⁶ Xikaho nangukalihgisa Samaliya kupwa nge mulumba wamucipapa, kupwa kwakutumba mawande amivinyo. Malolwalyo nangukawazukwila mucinema, nangukafwikununa Vihela vyalyo.

⁷ Makombelo alyo akusonga osena navakawafufwojola, vyonda vyalyo vyosena navakavyoca hakakahya, makombelo alyo osena nangukawahaka kwahwilici. Mwomwo awakungulwile kuconda cahakulinga ujila, kaha nawakalumuka ceka kupwa conda cahakulinga ujila.

⁸ Haceci xikaho nangulila nakukalwomwoka, nangutambuka nguwakuzula nakupwa uselesele, nangulila nge mwavamyumbwe, nanguliximwoka nge mwavanyamalanda.

⁹ Mwomwo vito vyenyi kavahasa kuvikangulako, mwomwo cineza nakuli Yuta nawa, cinahete nakucikolo cavatu jami, mbwe nakuYelusalema.

¹⁰ Kanda mukacambulula muNgatako. Kanda mulila cakulilako. KuMbete-lafwala ngunalikocingilako mulukungu.

¹¹ Ove watwama kuXafwile, lihicile kwove uselesele nasonyi. Ou atwama muZanane kalovokelemoko. Kulila caMbetezele nacimitambula kwakwimanyinako.

¹² Mwomwou atwama muMalote nazakamina kuwaha, mwomwo kuli Yehova kunafumu lupi nakusulukila cikolo caYelusalema, xikaho.

¹³ Ove watwama kuLakixe, kaxilila litemba kuli kavalu walumbuxi. Ikiye apwile kuputuka camilonga kuli mwanaZeyone, mwomwo vilinga vyaIsalele vyakuzombwojoka jiximbi vaviwanyine muli ove.

¹⁴ Xikaho naukahana civanda kuMolexete lyaNgata. Jizuvo jaAkajive najipwa jakutangisa vamyangana javaIsalele.

¹⁵ Ove watwama muMalexa, nangucikaneha ou mwakakuheta kuli ove. Upahu waIsalele naukaheta mbwe nakuAtulame.

¹⁶ Lisevese, liteule jikambu jove hali vana vove vahakutwama mwawangana. Tohwesa livala lyove nge mwalikuvi, mwomwo vanavatundula lyehi vanakuseze, xikaho.