MALAKI 1 - Luvale Bible 1970

Omu azanga Yehova Yakova

¹ Eci cikiko citeli calizu lyaYehova kuli vaIsalele muli Malaki.

² Yehova nambe ngwenyi, Ngunamizange. Oloze namungwihula ngwenu, Unatuzangila mulihi? Esau apwile yaya yaYakova nyi? Mukiko mwanehula Yehova. Oloze ngwamuzangile Yakova.

³ Kaha Esau ngwamuhungile, jipili jenyi ngwajilingixile kupwa jahwilici, uswana wenyi ngwauhanyine kuli vamyumbwe vamupambo.

⁴ Omu navamba vaEtome ngwavo, Vanatupupwojola, oloze natukakinduluka nakutungulula jingundu, Yehova wamayongomena ngwenyi, Vakivo navakafungulula, oloze Ami nangukaxiula. Navakavavuluka ngwavo, Ngiza yakuhuka, ngwavo, Vatu ava nevwila Yehova matoto haya myaka yosena.

⁵ Meso enu nawakacimona, kahenu namukamba ngwenu, Vamutohwesenga Yehova oku kuhambakana ngiza yaIsalele.

Yehova mwavahanjikila vapilixitu

⁶ Mwana eji kulemesanga ise, ndungo eji kulemesanga kaka yenyi. Jino kaci nge Ami nguSenu, kaha kungulemesa cilihize? Kaci nge Ami nguKaka yenu, kaha kungwivwa woma cilihize? Mukiko mwanamihula Yehova wamayongomena enu vapilixitu, enu mweji kulumbilisanga lijina lyami. Jino namungwihula ngwenu, Lijina lyove tunalilumbilixila mulihi?

⁷ Mweji kuhanyinanga kulya cakujilulula halijiko lyami lyakulumbila. Kaha namungwihula ngwenu, Tunakujilulwila mulihi? Mwomwo mweji kulyambanga ngwenu, Mesa yaYehova yapwa yakulumbilisa.

⁸ Kahomu namupandamisava vahona meso nakuvavatula, ngwenu, Kacapihileko! Kahomu namupandamisava vakumbilikita navava vali nakukola, ngwenu, Kacapihileko! Vahane jino kuli nguvulu yove! Mwakwivwila kuwaha numba? Mwakwitavila nalikoji numba? Mukiko mwanehula Yehova wamayongomena.

⁹ Kaha jino, acimulembelelenu Kalunga atutale nalikoji, mangana atutetele. Eci cineza mumavoko enu. Mwetavila vakwenu vamwe nalikoji numba? Mukiko mwanehula Yehova wamayongomena.

¹⁰ Muli enu muli iya nawa mwetava kusoka mapito? Kaha kamute kuwika kakahya cawana halijiko lyami lyakulumbila! Yehova wamayongomena nambe ngwenyi, Kangwamivwila kuwahako, kaha kangwexi kwitavila wana kumavoko enuko.

¹¹ Mwomwo kufumisa kukututuka calikumbi palanga nakukulauka calyo lijina lyami nalikatohwanga muli vaka-mafuci. Kaha navakalumbilanga lijina lyami vyalivumba lyamwaza namawana atoma kuma kwosena. Mwomwo lijina lyami nalikatohwanga muli vaka-mafuci. Mukiko mwanambe Yehova wamayongomena.

¹² Oloze enu mweji kulijilulanga omu namwamba ngwenu, Mesa yaYehova yinajiluluka, ngwenu, Mihako yayo, kulya cayo, cinapu cakulumbilisa.

¹³ Mweji kulyambanga nawa ngwenu, Okilika kana! Kaha munayihumbula. Mukiko mwanambe Yehova wamayongomena. Munanehe ava vakupupa, navava vakumbilikita, navava vakukola. Mukiko mumweji kunehelanga mawanenu. Kaha ngwitavile ava kumavoko enu nawa? Mukiko mwanehula Yehova.

¹⁴ Oloze ou mwalinga mwakutangisa apwenga wakwangula, ou ali nacilunga kuutanga wenyi, ou mwalixika, hikumuvatwila Mwata owo ali nakatenga. Mwomwo Ami nguMwangana wamunene, xikaho. Mukiko mwanambe Yehova wamayongomena. Ngwenyi, Lijina lyami lyapwa lyakwivwisa vatu woma muli vakamafuci.