Mako 1 - Luvale Bible 1970

Kwambulula camuka-kumbapacisa vatu Yowano

¹ Eci cikiko kuputuka camujimbu wamwaza waYesu Kulixitu MwanaKalunga.

² Nge muze vasoneka hamukanda wakapolofweto Isaya ngwavo, Tala, nangukatuma muluwa wa­ mi kumeso ove, Ikiye mwakalongesa jila yove.

³ Ngwavo, Ivwenu lizu lyayou mwavilika mupambo ngwenyi, Longesenu jila yaYehova, Sungamisenunga makulakulenyi.

⁴ Yowano ejile, uze ambapacixilenga vatu mupambo, kaha ambulwilenga kumbapacisa-vatu hakwalumuka cakupihilila cakuneha kuvakonekela milonga yavo yaxili.

⁵ Vaka-lifuci lyaYuleya vosena navaka-Yelusalema vosena valovojokelenga nakwizeza kuli ikiye, kaha vakivo hakwitavila milonga yavo yaxili vavambapacixile kuli ikiye mukalwiji Yotau.

⁶ Yowano avwalilenga mahina amangona avangamela, namuhya wacikapa mumbunda yenyi, kaha alilenga Vambimba-makumbi nauci wamucipapa.

⁷ Ambulwilenga mazu ngwenyi, Ou nanguliambakanami ngolo mweza munyima yami, cipwe tuvikapa twamendelo enyi kangwatelamo kunongama nakutukasununako.

⁸ Aminyi ngunamimbapacisa mumeya, oloze Ikiye mwakamimbapacisanga muli Xipilitu wajila.

Navamumba pacisa Yesu

⁹ Kaha casolokele hamakumbi aze Yesu afumine kuNazaleta kuNgalileya, kaha vamumbapacixile kuli Yowano muYotau.

¹⁰ Linwomu vene, hakukanduka mumeya, amwene mwilu munasokoloka, naXipilitu nawa, wakufwana nge katela, himwafuma mwilu himwawila hali Ikiye.

¹¹ Kaha mwilu mwafumine lizu ngwenyi, Ove yove Mwanami, yove vene ngwazanga, yove vene ngweji kwivwilanga kuwaha.

Navamweseka Yesu

¹² Linwomu vene Xipilitu himwamutwala mupambo.

¹³ Apwilenga makumbi makumi awana muze mupambo nakumwesekanga kuli Satana. Apwilenga navisuma hamwe, kaha vangelo vejile nakumukafwako.

Yesu mwaputuka milimo yenyi

¹⁴ Kaha jino, omu valingile hivanamukase lyehi Yowano, Yesu ayile kuNgalileya nakwambulula mujimbu wamwaza waKalunga,

¹⁵ nakwamba ngwenyi, Myaka yinatemo lyehi, kaha wangana waKalunga uli kwakamwihi. Pihililenu nakwalumuka, mwitavilenga mujimbu wamwaza.

Yesu mwasanyika vaka-kuta vaixi vawana

¹⁶ Hakuhita kwakamwihi nacijiva cakuNgalileya, amwene Ximona nandumbwaXimona Andelei vapwile nakufuta lyoji mucijiva, mwomwo vapwile vaka-kuta vaixi, xikaho.

¹⁷ Yesu avambile ngwenyi, NgukavangizenungAmi, kaha nangumilingisa kupwa muvaka-kuta vatu.

¹⁸ Linwomu vene Vasezele moji avo, vamukavangijile.

¹⁹ Hakuswenya kulutwe cacindende, amwene Yakova yaZevete nandumbwenyi Yowano, vakivo nawa vapwile muwato nakuhongela moji avo.

²⁰ Linwomu vene avasanyikile, kaha sevo Zevete navangamba vakufweta vavasezele muze muwato, vamukavangijile.

Mutu apwile naxipilitu wamupi

²¹ Kaha hinavaya nakwingila muKapelenau. Linwomu vene halikumbi lyasambata engilile musunangonga, anangwile vatu.

²² Kaha valihomokelele kukunangula cenyi, mwomwo apwile nakuvanangula mwamuka-wata, kacapwile nge muze vavanangwilenga vaka-kusonekako, xikaho.

²³ Kaha linwomu vene musunangonga yavo mwapwile mutu apwile naxipilitu wamupi, kaha atambakanyine

²⁴ ngwenyi, Ove Yesu wakuNazaleta, unambe kulinga muka nayetu? Uneza nakutunongesa tahi? Ngunakutacikiza, Ove yove Mukakujila waKalunga.

²⁵ Yesu amuhanjikilile ngwenyi, Hola kulu, lovoka muli ikiye.

²⁶ Omu alingile uze Xipilitu wamupi hanamukonyesa lyehi nakuteta nalizu lyakukanguka, alovokele muli ikiye.

²⁷ Vosena valikomokelele, ngoco valihwojwele ngwavo, Eci cika? Kuneza kunangula cacihya! Cipwe vaxipilitu vavapi mwavamba nangolo, kaha hinavononoka kuli ikiye!

²⁸ Kaha linwomu vene puho yenyi yafumakanyine mulifuci lyaNgalileya mwosena.

Yesu mwahindula nayewenu yaPetulu

²⁹ Linwomu hakulovoka musunangonga vengilile muzuvo yaXimona naAndelei, naYakova naYowano hamwe.

³⁰ Jino nayewenu yaXimona apwile hanasavala nakuviza musongo wacixika, kaha linwomu hinavamuvuluka kuli Ikiye.

³¹ Ejile, amukwacile kulivoko lyenyi nakumuhindula. Cize cixika camufumine, kaha avazumbwile.

Yesu mwahindula vavavulu hacingoloxi

³² Hacingoloxi, hakulembalemba calikumbi, vamutwalilile vosena vaze vapwile nakuviza, navaka-vandemone nawa.

³³ Vaka-limbo lize vosena Valihomenene kuze kucikolo.

³⁴ Ahindwile vaka-kuviza misongo yeka nayeka vavavulu, alowele nawa vandemone vavavulu, kaha kavetavilile vandemone kuhanjikako, mwomwo vamutacikijile, xikaho.

Yesu mwaya ambululenga mazu

³⁵ Hacimenemene, kucili kwakusuku nakuca, ahindukile, alovokele, ayile mupambo, alombelele muze.

³⁶ Ximona navakwavo vaze apwile navo vamukavile.

³⁷ Vamuwanyine, vamwambile ngwavo, Vatu vosena vali nakukutenda.

³⁸ Kaha himwavamba ngwenyi, Tuyenu kweka kumembo ali kwakamwihi, mangana ngukumbulule mazu nakuze nawa. Mwomwo cikiko vene ngunalovokela.

³⁹ Kahengilile mujisunangonga javo muNgalileya mwosena nakwambulula mazu nakulovola vandemone.

Yesu mwahindula muka-mbumba

⁴⁰ Kaha kuli Ikiye kwejile mukambumba, amulembelelele nakumufukamina, amwambile ngwenyi, Kaci nge unasake, nauhasa kungutomesa.

⁴¹ Yesu amwivwilile keke, olwele livoko lyenyi, amusalikile, amwambile ngwenyi, Ngunasake vene. Toma.

⁴² Linwomu vene mbumba yamufumine, kaha atomene.

⁴³ Yesu amukanjile cikuma, linwomu nakumulovolamo,

⁴⁴ amwambile ngwenyi, Nyingililanga, kanda ukambulula lizu limwe kuli mutuko. Oloze yako ukalisolole kuli kapilixitu, ukahane vyuma vyahakukutomesa vize avulukile Mose, mangana cikapwe unjiho kuli vakivo.

⁴⁵ Oloze ikiye alovokele, aputukile kucambulula cikuma, nakutwala lizu kana teyenu, ngoco Yesu kahaxile kwingila ceka mwimbo lize musana weyeko, oloze atwaminenga mweka mupambo kaha. Kaha vatu vapwile nakufuma kumitamba yosena nakwizeza kuli Ikiye.