LUTE 1 - Luvale Bible 1970

Lute naNowemi

¹ Jino casolokele, hamakumbi aze vapwilenga vaka-kuyula naku­yula, mulifuci mwaholokele zala yakalombolombo. Kaha kwayile mu­tu wakuMbetelema-yuta ngwenyi, akazuzumane mulifuci lyavaMowa­ve, naikiye napwevo lyenyi navana venyi vamalunga vavali.

² Lijina lyayauze lunga apwile ikiye Elimeleke. Lijina lyapwevo lyenyi apwile ikiye Nowemi. Majina avana venyi vamalunga vapwile ou Malone, ou Kiliyone, vapwile vaka-Efwalata vakuMbetelema-yuta. Vahetele muli­fuci lyavaMowave, vatwamine muze.

³ Jino Elimeleke, uze lunga lyaNowemi, afwile. Nowemi asalileho, na­vana venyi vamalunga vavali nawa.

⁴ Valimbacilile mapwevo vakuli ma­pwevo yavaMowave. Umwe lijina lyenyi apwile ikiye Olopa, mukwavo lijina lyenyi apwile ikiye Lute. Va­twaminenga kuze kafwe myaka li­kumi.

⁵ Kaha Malone naKiliyone vafwile vosena vavali. Ngoco uze pwevo vamusezele kuli vana venyi vamalu­nga vavali nakuli lunga lyenyi.

⁶ Kaha akatukile navanayewenu, mangana ahiluke kufuma kulifuci lyavaMowave, mwomwo evwile mu­lifuci lyavaMowave ngwavo, Yehova navalakana lyehi vatu jenyi nakuva­hana kulya, xikaho.

⁷ Afumine muze apwile, navanaye­wenu vavali hamwe, vayile jila yavo vahiluke kulifuci lyaYuta.

⁸ Nowemi ambile kuli vanayewenu vavali ngwenyi, Yenunga, kindulukenu mutu himutu kuzuvo yanaye. Yehova amilingilenga mwalikoji, nganomu munalingila kuli vaka-kutoka nakuli ami nawa.

⁹ Yehova akamihane kuwana kunoka, mutu himutu muzuvo yalunga lyenyi. Avasweswenyele, kaha va­lilile namazu akukanguka.

¹⁰ Vamwambile ngwavo, Nduma, Oloze natukinduluka nayove kuli vakwenu vatu.

¹¹ Nowemi avambile ngwenyi, Enu vana vami, kindulukenu, ikaze namuyila nayami? Ngucili navana mu­jimo lyami numba, numba Vakapwe malunga jenu?

¹² Enu vana vami, kindulukenu, yenunga kwenu, mwomwo nguna­kulu lyehi, kuhasa kutwama nalunga nduma. Kaci nangwamba ngwami, Ngunatalijiza, kaci nangupwa nawa nalunga ufuku uno, kaci nanguka­sema vana vamalunga,

¹³ enu kwenu kaci namuvavandaminanga vakakule numba? kaci enu namutwamanga muujike lika naku­kana kusomboka kuli malunga nu­mba? Nduma, enu vana vami. Mwomwo ngunapihilila cikuma hali enu, mwomwo Yehova nangwolwela livoko lyenyi, xikaho.

¹⁴ Valilile ceka namazu akukangu­ka. Kaha Olopa amusweswenyele nayewenu. Oloze Lute alipanjikile nenyi.

¹⁵ Nowemi amwambile ngwenyi, Tala, muhalika wove nakinduluka lyehi kuli vatu vakwavo nakuli kalunga kenyi. Kinduluka umukave muhalika wove.

¹⁶ Lute amukumbulwile ngwenyi, Kanda unguxinjila kukusezako, ci­pwe kukinduluka kukukukavako. Mwomwo kuze nauya nanguvako, kuze naukasavala nangukasavalako, vakwenu vatu navakapwanga va­kwetu vatu, Kalunga kove mwapwa­nga Kalunga kami.

¹⁷ Kuze naukafwila nangukafwilako, kwakuze navakangufunjilako. Kaci nge cuma ceka cakuzeneka kupwa kufwa nacikatuhandununa nayove, kaha Yehova akangulinge ngoco nakuhakilako nawa.

¹⁸ Nowemi hakumona ngwenyi, Na­jiki lyehi mucima wenyi kuya na­yami, alitwaminyine kuhanjika kuli ikiye.

¹⁹ Ngoco vosena vayali vayile pala­nga nomu Vahetele kuMbetelema-yuta. Kaha casolokele, omu valingile hivanahete lyehi kuMbetelema, li­mbo lyosena lyaliuyile hali vakivo.

Mapwevo Vambile ngwavo, Ou you Nowemi tahi?

²⁰ Avakumbulwile ngwenyi, Kanda munguvulukako ngwenu, Nowemi, oloze nguvulukenu ngwenu, Mala, mwomwo Ukweci ngolo josena nangumwenesa vyavisasu cikuma, xi­kaho.

²¹ Ami ngwayile ngunazalilila, kaha Yehova nanguhilwisa ceka mavoko­voko. Ikaze namunguvulukila ngwe­nu, Nowemi? hamono Yehova nangupayisa, kaha Ukweci ngolo jo­sena nangumwenesa lupi.

²² Ngoco Nowemi ahilukile, nana­yewenu uze kaMowave Lute nawa hamwe, uze akindulukile kufuma kulifuci lyavaMowave. Vakivo Va­hetele kuMbetelema hakuputuka kwaha mbale.