Luka 1 - Luvale Bible 1970

Mukanda kuutuma kuli Tcyofwilu

¹ Mwomwo vakwetu vavavulu vanakwateko lyehi kumilimo yakusoneka mikanda yakuvuluka vyuma kana vinasoloka muli etu,

² nge muze vatuselelelevyo vaze vapwile vakaleho hamazu putu ha­kulivanga, vaka-kuzata milimo yawo,

³ ngoco nayami nawa, mwomwo kuputuka kuxi ngunahehula kanawa mwaya vyuma kana vyosena, xikaho ngunamono kuwaha kukusonekela nakukulweza mwakwoloka muvyalikavila, ove Teyofwilo walema,

⁴ mangana ngwami, utacikize kanawa xindakanyi yavyumovyo vakunangwilenga.

Navavuluka kusemuka camukakumbapacisa vatu Yowano

⁵ Hamakumbi aze amwangana wavaYuleya Helote kwapwile kapilixitu umwe, lijina lyenyi apwile ikiye Zekaliya, apwile wakumukana waAviya. Apwile napwevo lyenyi ukweci vakwavo vana VaAlone, lijina lyenyi apwile ikiye Elizaveta.

⁶ Vosena vavali vapwilenga vakakwoloka lika kumeso aKalunga. Vatambukilenga mwaya jiximbi jaYehova josena namumazu enyi akuyula, nakuzeneka cuma cakuvahanyina mulonga.

⁷ Kavapwile namwanako, mwomwo Elizaveta apwile mumba, kaha vosena vavali vakulile lyehi cikuma.

⁸ Kaha casolokele, omu apwile nakuzata milimo yaupilixitu kumeso aKalunga, hamakumbi amukana wavo,

⁹ nge mwaya upilixitu wavo, vamusakwile navinjikizo manganengile muzuvo yaYehova yajila, alumbilemo vize vyalivumba lyamwaza.

¹⁰ Kaha liyongomena lyavatu vo­sena vapwile nakulomba kuweluka halwola lwakulumba vize vyalivumba lyamwaza.

¹¹ Kuli ikiye kwasolokele kangelo kaYehova, nemana kumutamba walijiko lyakulumbila vize vyalivumba lyamwaza wacilyo.

¹² Zekaliya omu amumwene alinyengele, evwile woma.

¹³ Oloze uze kangelo amwambile ngwenyi, Ove Zekaliya, kanda wivwa womako, mwomwo kulembelela cove vanacivu lyehi. Pwevo lyove Elizaveta mwakasema nove mwana walunga, kaha ukamuluka lijina lyenyi ngwove, Ikiye Yowano.

¹⁴ Naukawahililanga nakulisamba, kaha vatu vavavulu navakawahililanga hakusemuka cenyi.

¹⁵ Mwomwo mwakapwanga wamulemu kumeso aYehova. Kanda akanwa cipwe vinyo cipwe wala wausasuko. Mwakazala naXipilitu wajila cipwe hakusemuka mujimo lyanaye.

¹⁶ Kaha kuli vana vaIsalele mwakalalisa vavavulu kuli Kalunga kavo Yehova.

¹⁷ Ikiye mwakatwaminangaho kulutwe lwenyi muxipilitu yaElija, mungolo jenyi, mangana akatalise micima yamasevo kuli vana vavo, akatalise vaka-kulikanga mwaya mangana avaka-kwoloka, akamulongesele Yehova vatu vakulizanga lyehi.

¹⁸ Zekaliya amwihwile uze kangelo ngwenyi, Oco nangucitacikijila haka? Mwomwo ami ngukaxinakaji, kaha napwevo lyami nawa hanakulu lyehi cikuma.

¹⁹ Uze kangelo amukumbulwile ngwenyi, Ami yami Ngavalyele, ngweji kwimananga kumeso aKalunga, kaha vanangutumu ngwavo, nguhanjike nove ngukwambulile mujimbu wavyumevi wamwaza.

²⁰ Tala, naupwanga jino ukamama, kawexi kukahasa kuhanjikako, kuvanga nahalikumbi lize navikasoloka vyuma kana, mwomwo mazu ami unakane kuwetava, akiko nawakalumbunuka hamwaka wawo.

²¹ Jino vatu vapwile nakumuvandamina Zekaliya, vapwile nakulikomokela hakuximbula cenyi muze muzuvo yajila.

²² Ikiye omu alovokelemo kahaxile kuhanjika kuli vakivoko, kaha vatacikijile ngwavo, Vanamumwenesa cuma muzuvo yajila. Ikiye apwile nakuvenyejekela, hanga apwilile kamama kaha.

²³ Kaha casolokele, omu atelemo makumbi amilimo yenyi, afumineko ayile kumahyenyi.

²⁴ Omu ahicile makumbi aze, puwenyi Elizaveta emicile lijimo, kaha aliswekele tukweji vatanu, ambile ngwenyi,

²⁵ Ngana vene mwanangulingila Yehova hamakumbi awa hakungutala, nakungufumisa kusauka ngunasaukanga muli vatu.

Navavuluka kusemuka caYesu

²⁶ Kaha jino, hakakweji wamusambu, uze kangelo Ngavalyele vamutumine kuli Kalunga aye kwimbo lyakuNgalileya, lijina lyalyo likiko Nazaleta,

²⁷ kuli mwanapwevo apwile kanda acilimone nalunga, wakuhuhwa lyehi kuli lunga ukweci lijina lyenyi ikiye Yosefwe, wakutanga yaNdavici. Lijina lyayauze mwanapwevo apwile ikiye Maliya.

²⁸ Uze kangelo engilile muze apwile, amwambile ngwenyi, Wahililanga! ove unawane uselewa, Yehova uli nenyi!

²⁹ Oloze ikiye hakwivwa lizu eli alinyengele cikuma, apwile nakulihwojola mumucima wenyi ngwenyi, Eci kumeneka kana cinayi mulihize?

³⁰ Uze kangelo amwambile ngwenyi, Ove Maliya, kanda wivwa womako, mwomwo unawane uselewa kuli Kalunga.

³¹ Kaha tala, nawimita lijimo, naukasema mwana walunga, kaha ukamuluka lijina lyenyi ngwove, ikiye Yesu.

³² Ikiye mwakapwanga wamulemu. Navakamuvulukanga ngwavo, Ikiye MwanayOu-alitulaho. Yehova Kalunga mwakamuswanyisa halitanda lyakakuluka yenyi Ndavici lyawangana.

³³ Mwakapwanga Mwangana wavava vakuzuvo yaYakova nahaya myaka yosena, kaha wangana wenyi kawexi kukakumako.

³⁴ Maliya amwihwile uze kangelo ngwenyi, Oco nacipwa ngacilihi, hakupwami kanda ngucilimone nalunga?

³⁵ Uze kangelo amukumbulwile ngwenyi, Xipilitu wajila mweza hali ove, kaha ngolo jayOu alitulaho najitwama hali ove. Xikaho nawa Ou mwakasemuka navakamuvuluka ngwavo, Ikiye wajila, ngwavo, Ikiye MwanaKalunga.

³⁶ Kaha tala, kausoko wove Elizaveta, naikiye nawa nemita lijimo lyamwana walunga muuxinakaji wenyi, uno vene kakweji wamusambu kuli uze vavulukilenga ngwavo, Ikiye mumba.

³⁷ Mwomwo lizu lyaKalunga nalimwe pimbi nalihona ngolo.

³⁸ Maliya amwambile ngwenyi, Tala, ngundungo yaYehova, cipwenga kuli ami nganomu lyaya lizu lyove. Kaha uze kangelo afumine kuli ikiye.

Maliya mwaya akamumeneke Elizaveta

³⁹ Jino Maliya akatukile hamakumbi aze, ayile lufuxi kulifuci lyajipili, kwimbo lyamuYuta,

⁴⁰ kahengilile muzuvo yaZekaliya, amumenekele Elizaveta.

⁴¹ Kaha casolokele, Elizaveta hakwivwa kumeneka caMaliya, mwanenyi alyungunwine mujimo lyenyi, kaha Elizaveta azalile naXipilitu wajila,

⁴² atambakanyine nalizu lyakukanguka ngwenyi, Ove watokwa muli mapwevo, kaha atokwa nou nawa mwakasemuka mujimo lyove!

⁴³ Cinafumu haka kuli ami numba naye yaMwata wami eze kuli ami?

⁴⁴ Mwomwo tala, ami hakwivwa lizu lyove lyakungumeneka cove mumatwitwi ami, mwanami nalyungununa mujimo lyami nakukinyinyina.

⁴⁵ Natokwou etavile, mwomwo vyuma vize vanamuvulukila kufuma kuli Yehova navikasoloka, xikaho.

⁴⁶ Maliya ambile ngwenyi, Mwono wami naumutohwesanga Yehova,

⁴⁷ Xipilitu yami yinakinyinyina muli Mulwilo wami Kalunga.

⁴⁸ Mwomwo natale omu ngwapwa ami ndungo yenyi mukuhona ulemu, Mwomwo tala, kufumisa kulelo vatu vosena vakaya-namyaka navakanguvulukanga ngwavo, Atokwa.

⁴⁹ Mwomwo Muka-ngolo nangulingila vyuma vyavinene, Lijina lyenyi lyajila.

⁵⁰ Kutetela cenyi cili hali vatu vakaya-namyaka Hali vaka-kumwivwa woma.

⁵¹ Nasolola ngolo nalivoko lyenyi, Vaka-kutangalala mukuhumikiza camicima yavo navamwange lyehi mwamwa.

⁵² Nafumisa lyehi vaka-ngolo ku­matandavo amawangana, Nazezula lyehi vatu vaka-kuhona ulemu helu.

⁵³ Vali nazala navekucisa navyuma viyema, Vaka-luheto navahange mavokovoko.

⁵⁴ Namukwacisako ngamba yenyi Isalele, Mangana anuke kutetela

⁵⁵ (Nge muze ahanjikile kuli va­ kakuluka jetu) Hali Apalahama nahali vakatanga yenyi nahaya myaka yosena.

⁵⁶ Maliya atwaminenga nenyi kafwe tukweji vatatu, hikukinduluka ceka kumahyenyi.

Kusemuka camuka-kumbapacisa vatu Yowano

⁵⁷ Kaha jino, makumbi aElizaveta atelemo mangana asapuluke, kaha asemene mwanenyi walunga.

⁵⁸ Vaze alihacile navo navausoko wenyi vevwile omu natohwesela lyehi Yehova kutetela cenyi hali ikiye, kaha vawahililile nenyi.

⁵⁹ Kaha casolokele, halikumbi lyamucitanu naatatu vejile nakumujihana uze mwana, kaha vasakile ngwavo, vamuluke lijina lyaise lyaZekaliya.

⁶⁰ Naye avakumbulwile ngwenyi, Nduma, vamuluke Yowano.

⁶¹ Vamwambile ngwavo, Kuli vausoko wove kakwexi umwe vavuiuka lijina kanako.

⁶² Vamunyacilile ise ngwavo, nasake ngwenyi, vamulukeya.

⁶³ Alombele lilolwa lyakusonekaho, asonekeleho ngwenyi, Lijina lyenyi ikiye Yowano. Kaha vosena valikomokelele.

⁶⁴ Linwomu vene kanwa kenyi kalokolokele, lilimi lyenyi lyasovokele, kaha ahanjikile nakumwalisa Kalunga.

⁶⁵ Vosena vaze valihacile navo vevwile woma, kaha mazu osenawa vawahanjikilenga mulifuci lyaYuleya lyajipili lyosena.

⁶⁶ Vosena vaze vawevwile vawalamine mumicima yavo ngwavo, Kaha ou mwana kana mwakapwa ngacilihi? Mwomwo livoko lyaYehova lyapwilenga nenyi hamwe.

Mazu aZekaliya aupolofweto

⁶⁷ Kaha ise Zekaliya azalile naXipilitu wajila, ahanjikile mazu aupolofweto ngwenyi,

⁶⁸ Vamukisulenga Yehova Kalunga kaIsalele, Mwomwo navalakana lyehi vatu jenyi nakuvasokola, xikaho.

⁶⁹ Natuzundwila lyehi lumbinga lwaulwilo Kutanga yangamba yenyi Ndavici

⁷⁰ (Nge muze ahanjikile mutunwa twavapolofweto jenyi vajila, vaze vanapunga kufumisa kuxikulu),

⁷¹ Ulwilo wakutulwila kuli vakakole jetu, nakumavoko avosenava vatuhunga,

⁷² Kulinga mwakutetela vakaku­luka jetu, Nakwanuka kuxika cenyi cajila,

⁷³ Kulixinga cenyi cize alixingile kuli kakuluka yetu Apalahama,

⁷⁴ Kutwitavila mangana hakutuyovola kumavoko avaka-kole jetu Tukamuzacilenga cakuzeneka woma,

⁷⁵ Nakumuzakamanga nakwolokanga kumeso enyi hamakumbi etu osena.

⁷⁶ Kaha nawa, ove mwana, nayove nawa navakakuvulukanga ngwavo, ukapolofweto kayOu alitulaho, Mwomwo naukatwaminangaho kulutwe lwaYehova nakumulongesela jijila jenyi,

⁷⁷ Nakuvahana vatu jenyi cinyingi cakutacikiza ulwilo Hakuvakonekela milonga yavo yaxili,

⁷⁸ Mwomwo kumucima waKalunga ketu wakututetela nalikoji, Kukiko vene nacitwalakanyina kufutuka cakufuma mwilu,

⁷⁹ Kuvamunyikila vaze vatwama mumilima namumuvwimbimbi wakufwa, Nakuwilisa mahinji etu mujila yakuunda.

⁸⁰ Kaha uze mwana azovolokelenga, apwile nakuya nakukwata ngolo muxipilitu yenyi, kaha apwilenga mupambo palanga nakulikumbi lize lyakumusolola kuli vaIsalele.