Kolose 1 - Luvale Bible 1970

Paulu mwavameneka

¹ Ami Paulu, ngukaposetolo kaKulixitu Yesu cakumucima waKalunga, nandumbwetu Cimoteu,

² kuli enu vaka-kujila vandumbwetu vaka-kufwelela muli Kulixitu muli kuKolose. Kuli enu kupwenga likoji nakuunda vyakuli Kalunga Setu.

Mwavalombela mangana axipilitu

³ Tweji kumusakwililanga Kalunga, Ise yaMwata wetu Yesu Kulixitu, nakumilombelanga makumbi osena,

⁴ mwomwo tunevu lyehi kufwelela cenu muli Kulixitu Yesu, nazangi muli nayo nawa yakuvazanga vakakujila vosena,

⁵ mwomwo halutalililo luze vanamitulikila mumelu, luze mwevwile hakulivanga kumazu amucano amujimbu wamwaza.

⁶ Ukiko nawa unahete kuli enu, nganomu weji kwimanga mihako nakuvula nakumafuci ekosena nawa, nganomu weji kulingilanga namuli enu nawa, kufumisa kulikumbi lize mwevwile nakutacikiza kanawa likoji lyaKalunga mumucano.

⁷ Nganomu vaminangwile nawa kuli Epafwase, ou mukwetu twazanga mutwatwamina muundungo, ikiye napu muka-kumizacila waKulixitu wakuxixika hali etu.

⁸ Ikiye nawa natulweze lyehi zangi yenu muli Xipilitu.

⁹ Xikaho nayetu nawa, kufuma kulikumbi lize twacivwile, katwalitwamina kumilombela nakulembelela hali enu ngwetu, mukazale nacinyingi cakutacikiza kanawa mwaya mucima wenyi, mumanganosena nakunangakana camuli Xipilitu cosena,

¹⁰ mangana ngwetu, mutambukenga nganomu atela Mwata, mumwivwisenga kuwaha mwosena, mwimenga mihako kumilimo yamwenemwene yosena, mukulenga mucinyingi cakumutacikiza kanawa Kalunga.

¹¹ Ngwetu, amizamikisenga nangolo josena, nge kutesa natwima jaupahu wenyi, cakutwala kukukakacila cosena, nakukulitalilila cikoki navakwenu, hamwe nakuwahilila,

¹² mumusakwililenga Setu, Ou natulingisa lyehi kupwa twatela kutambwila hamwe kuuswana wavakakujila mumusana.

¹³ Ikiye Ou atuyowele mungolo jamilima, kaha natunungulwila muwangana waMwanenyi Ou azanga.

¹⁴ Muli Ikiye mukiko vene tuli nakusokoka cetu, cikiko kutukonekela milonga yetu yaxili.

Kuwanyisa cahakufwa caKulixitu

¹⁵ Ikiye alifwana henyihenyi naKalunga, Ou vahona kumona, Ikiye twatwa kuvyuma vyakutanga vyosena.

¹⁶ Mwomwo muli Ikiye mukiko vene vavitengelele vyuma vyosena, navize vyamumelu, navyevi vyahamavu, navyuma vamona, navyuma vahona kumona, cipwe matanda amawangana, cipwe mawata, cipwe mawangana, cipwe vaka-ngolo, vyuma vyosena vavitanga muli Ikiye nahali Ikiye.

¹⁷ Ikiye apwa ximbu vyuma vyosena kanda, kaha muli Ikiye mukiko mwakolela vyuma vyosena.

¹⁸ Ikiye napu mutwe wamujimba, ukiko liuka, Ikiye vene kuputuka, Ikiye twatwa wamuvafu, mangana muvyuma vyosena Ikiye apwenga wakulitulaho.

¹⁹ Mwomwo kuzalilila cauKalunga cosena camwene kuwaha kutwama muli Ikiye,

²⁰ kaha hakuzata muli Ikiye, hakuneha kuunda namanyinga akukulusu yenyi, numbanyi ngwenyi, vyuma vyosena akaviwanyise naivene, muli Ikiye vene, cipwe vyuma vyahamavu, cipwe vyuma vyamumelu.

²¹ Nayenu nawa, enu mwapwilenga muvakuhandunuka nenyi hamwaka, mwapwilenga muvaka-kole mumicima yenu havilinga vyenu vyavipi,

²² oloze oholili namiwanyisa lyehi naKalunga mumujimba wacisemwa cenyi cahamavu, hakufwa cenyi. Mangana ngwenyi, akamimike kumeso enyi muvaka-kujila, nakatenga pimbi, nacuma cakumihanyina mulonga pimbi,

²³ kaci nge namutwamanga mulufwelelo muvakujikizamo nakuzamamo mbe, nge kamwexi kusosoloka kulutalililo lwakumujimbu wamwaza, ou mwevwile, ou vanavambulila lyehi vosena vakutanga kuli Kalunga vali hano hamavu, kukiko vene vangulingixilami Paulu kupwa ngumuka-kuzacila.

Milimo yaPaulu yakuya kuli vaka-mafuci

²⁴ Oholili nguli nakuwahilila muvihuli vyami evi ngweji kumonanga hali enu, kaha vize vyasalileko vyakuluyando lwaKulixitu lwamumujimba wami nguli nakuumanyixilavyo mujimba wenyi, ukiko liuka.

²⁵ Halikiko vene vangulingixilile kupwa ngumuka-kuzacila, nge omu yaya milimo yakuli Kalunga, eyi anguhanyine hali enu, yakutesamo mwaya mazu aKalunga,

²⁶ akiko mangana akuswekawa anapunga akusweka hamyaka yeka yosena nahakusemunwina ceka cosena, oloze makumbi ano vanawasolola kuli vaka-kujila jenyi.

²⁷ Vakivo Kalunga asakwile ngwenyi, avajimbwile luheto lwaupahu wamangana akuswekawa ali muli vaka-mafuci, awa akwamba ngwawo, Kulixitu ali muli enu, Ikiye lutalililo lwaupahu.

²⁸ Ikiye vene Ou tweji kwambululangetu, nakuhuhumuna vatu vosena nakunangula vatu vosena mumanganosena, mangana ngwetu, tukemike vatu vosena yakukupuka lyehi mwosena kumeso enyi muli Kulixitu.

²⁹ Hakiko vene ngweji kukilikicilanga nawa, nakuhundangananga nge kutesa nakuzata cenyi ceji kuzatanga muli ami nangolo.