ISAYA 1 - Luvale Bible 1970

Muyaci wakuvulumunanga

¹ Evi vikiko vize vamumwenesele Isaya mwanaAmoze, vize amwene hali vaYuta naYelusalema, hamakumbi aUjiya nawawa aYotame nawawa aAhaze nawawa aHezekiya, ava vapwile vamyangana javaYuta.

² Ove lilu, ivwilila. Ove mavu, tengeleka matwitwi ove, mwomwo Yehova nahanjika, xikaho. Ngwenyi, Ngunakulisa vana nakuvatala, kaha vakivo vanalikange kuli Ami.

³ Ngombe natacikizou amuheta. Cimbulu natacikiza cisete cakaka yenyi. Oloze vaIsalele kavatacikijileko, vatu jami kavexi kunyingililako.

⁴ Mama lelo, enu muyaci wakuvulumunanga, enu vatu vakulemuwa nakuhenga, enu tanga yavaka-kupihisa, enu vana vakulyenyeka! Vanamuseze Yehova, vanamusaulOu waIsalele wajila, vanafutuka munyima.

⁵ Vamivetele ceka ika, numba mutwalengaho nakupyapumuka? Kumutwe kwosena kuli nakukola, kaha mucima wosena unazeye.

⁶ Kufumisa kuvilyacilo vyamahinji mbwe nakumutwe kakwexi hamwe halambweko, kuvanga vito kaha namikiki najimbandu jamanyinga. Kavyakangukileko, kavavijicikileko cipwe kuvivovesa namaji.

⁷ Kulifuci lyenu kunapu kwahwilici, membo enu vanawoco lyehi nakakahya, lifuci lyenu vatu veka vali nakulilya kumeso enu, kunapu kwahwilici, nge lyakukatumuna kuli vatu veka.

⁸ Kaha mwanaZeyone vanamuseze nge cisakila camuwande wamivinyo, nge kapundo kamuwande wamatende, nge limbo vanahake lyehi mucingombela.

⁹ Kaci Yehova wamayongomena katusezelele vamwe vakusalaho vavandende cikumako, kaci tunapu nge Sotome, kaci tunafwane nge Ngomola.

Navavasanyika valumuke

¹⁰ Enu vaka-kuyula muSotome, ivwililenu mazu aYehova. Enu vatu vamuNgomola, tengelekenu matwitwi enu kuluximbi lwaKalunga ketu.

¹¹ Vimuna jenu vakuvatula vavavulu vanangulemena halihi? Mukiko mwanehula Yehova. Ngwenyi, Ngunekuta lyehi namawana akulumba avizamba jamikoko namaji avimuna vakulisa. Kangwexi kwivwa kuwaha kumanyinga amavuvu javangombeko, cipwe awa avana vamikoko cipwe awa avizamba javapembeko.

¹² Omu namwiza nakusoloka kumeso ami, iyaze nasakeci kumavoko enu numba mulyate muvipango vyami?

¹³ Kanda muneha ceka mawana amokomokoko. Ovyo vyalivumba lyamwaza vinangwivwisa unyengwe. Kumweka catukweji najisambata nakukungulula mauka, kangwexi kuhasa kwitavila nakuhenga nakuunga cacilemu hamweko.

¹⁴ Kumweka catukweji twenu Haviwanyino vyenu vyakutongola mwono wami unavihungu, vinapu citeli cacilemu kuli Ami, jinanguhu hakuvimbata.

¹⁵ Omu namwolola mavoko enu nangulifwika kumeso ami kucina kumimona, kaha nawa omu namuvulisa kulomba kuli Ami kangwexi kumivwililako. Kumavoko enu kuli manyinga lika, xikaho.

¹⁶ Sanenu, litomesenu, lifumisenu kupihya cavilinga vyenu kumeso ami, litwaminenu kupihisa,

¹⁷ linangulenu kuwahisa, Sakasakenunga ciyulo, volwelenu ava vanalyane, vayulenu ava vazeneka masevo, vahakwilenu mapwevo vavatuliwe.

¹⁸ Yehova nambe ngwenyi, Twayenu uno tulivwasanenu. Cipwe milonga yenu yaxili yinacilana cikuma, nayitoma to nge vula yacixika. Cipwe yinapu yicila ngengu, nayipwa nge mangona amikoko.

¹⁹ Kaci nge namukundwiza Hakwononoka, kaha namulyanga vyamwaza vyamulifuci.

²⁰ Oloze nge namukana nakulikanga, kaha navakamilya kujipoko jamikwale, mwomwo kanwa kaYehova kanacihanjika.

Navazangamisa Zeyone, navalisokola ceka

²¹ Omu linalumuka limbo lyakuxixika kupwa muka-ujila! eli lyasulilenga naciyulo! Mulikiko mwatwaminenga kwoloka, oloze makumbi ano mwatwama vaka-kujiha vatu.

²² Palata yove yinalumuka kupwa vizozo, vinyo vyove vanavifutula nameya.

²³ Vaka-kulitulaho jove vananjinjajala, vanapu vana vakwavo naveji, vosena vanazange maswekeza, veji kukavangizanga jifweto. Kavexi kuyulava vazeneka masevoko, kaha milonga yamapwevo vavatuliwe kayexi kuheta kuli vakivoko.

²⁴ Xikaho Mwata, Yehova wamayongomena, Ou waIsalele wakujikiza nambe ngwenyi, Kumana nangulinokesa kuli ava vangwimanyina, nangulitenda kuli vaka-kole jami.

²⁵ Nangwalumwina livoko lyami hali ove nakukutomesa kuvizozo vyove vyosena, Hakukufumisa xitanyu yove yosena.

²⁶ Kaha nangukahilwisa vaka-kuyula jove nge hakulivanga, navakakutwama nove punga nge hakuputuka. Hakukuminyina numba vakakuvulukenga ngwavo, Limbo lyakwoloka, ngwavo, Limbo lyakuxixika.

²⁷ Zeyone navakalisokola naciyulo, kahava valyo navakakinduluka navakavasokola nakwoloka.

²⁸ Oloze kunonga cavaka-kuzombwojoka jiximbi navaka-xili nacikasolokela hamwe, kaha vaka-kuseza Yehova navakalala.

²⁹ Mwomwo navakevwa sonyi kumitelevinde eyi munevwila cipepa, kaha namukazonda hamilemba eyi munasakula.

³⁰ Mwomwo namukapwa nge mumutelevinde ukweci mafo akupiluka, nge mumilemba yakuzeneka meya.

³¹ Kaha muka-ngolo mwakapwa nge ukuku, milimo yenyi nayikapwa nge lusase, navikakwata kakahya hamwe, kakwexi kukapwou mwakavijimako.