HANGAI 1 - Luvale Bible 1970

Vatu navavaxinjila ngwavo, vatunge tembele

¹ Hamwaka wamwangana Ndaliu wamucivali, hakakweji wamucitanu naumwe, halikumbi lyakakweji lyakulivanga, lizu lyaYehova lyejile muli kapolofweto Hangai kuli Zeluvavele mwanaXeyalacele, nguvulu yavaYuta, nakuli Yoxuwa mwanaYehozatake, ou kapilixitu wakulitulaho, ngwenyi,

² Yehova wamayongomena nambe ngwenyi, Vatu ava veji kulyambanga ngwavo, Mwaka kanda uhete, ou mwaka wakutunga zuvo yaYehova.

³ Kaha lizu lyaYehova lyejile muli kapolofweto Hangai ngwenyi,

⁴ Unapu mwaka wakutwamenu mujizuvo jenu jakufwika namaliva tahi, ximbu yinatwame zuvo yino yamokomoko?

⁵ Xikaho Yehova wamayongomena nambe ngwenyi, Nyingililenu jino jijila jenu.

⁶ Munakuu jajivulu, munengisa ceka jajindende. Mweji kulyanga, oloze kamwekucileko. Mweji kunwanga, oloze kexi nganomu munasakeko. Munavwale, oloze kakwexi nou nevu songonyokoko. Kahou vanakambe eji kutambwilanga fweto mukangonga kali namiteta.

⁷ Yehova wamayongomena nambe ngwenyi, Nyingililenu jijila jenu.

⁸ Kandukenu kupili, mukanehe mitondo, mukatunge zuvo yino, kaha nangukayivwilanga kuwaha, nayikangutohwesanga. Mukiko mwanambe Yehova.

⁹ Mwatalijijilenga vyavivulu, kaha kumana, vyalingile kupwa vyavindende, kahomu mwavinehele kujizuvo jenu ngwavipepwile. Yehova wamayongomena ngwenyi, Mwomwo ika? Mwomwo hazuvo yami yinatwame yamokomoko ximbu namulahenu mutu himutu kuzuvo yenyi.

¹⁰ Xikaho mwilu munajiki, kamwexi nakuhana mumeko, mwomwo hali enu. Xikaho kumavu kunajiki, kawexi nakuhana vyakwimahoko.

¹¹ Ngwasanyikile canga halifuci nahajipili nahakulya camanona nahawala wamihako yavinyo nahamaji nahavize vyakusoka mumavu nahali vatu nahavimuna nahakukilikita camavoko cosena.

¹² Ngoco Zeluvavele mwanaXeyalacele naYoxuwa mwanaYehozatake, ou kapilixitu wakulitulaho, navatu vosena vaze vasalileho, vononokele mulizu lyaKalunga kavo Yehova, mumazu akapolofweto Hangai, nganomu vamutumine kuli Kalunga kavo Yehova, kaha vatu vevwile woma kumeso aYehova.

¹³ Ngoco muluwa waYehova Hangai avambulilile vatu mujimbu waYehova ngwenyi, Yehova ngwenyi, Ami nguli nenu hamwe.

¹⁴ Yehova akatwile Xipilitu yaZeluvavele mwanaXeyalacele, ou nguvulu yavaYuta, naxipilitu yaYoxuwa mwanaYehozatake, ou kapilixitu wakulitulaho, najixipilitu javatu vosena vaze vasalileho, kaha vejile, vazacile milimo kuzuvo yaKalunga kavo Yehova wamayongomena,

¹⁵ halikumbi lyakakweji lyakusokesa mumakumi avali naawana, hakakweji wamucitanu navavali, hamwaka wamwangana Ndaliu wamucivali.