EZEKELE 1 - Luvale Bible 1970

Kapolofweto navamumwenesa upahu waKalunga

¹ Jino casolokele hamwaka wakusokesa mumakumi atatu, hakakweji wamuciwana, halikumbi lyakakweji kana lyamucitanu, omu ngwapwile muli vaze vatundwile kukalwiji Kevale, mwilu mwasokolokele, kaha ngwamwene vyakungumwenesa vyakuli Kalunga.

² Halikumbi lyakakweji kana lyamucitanu, owo wapwile mwaka waufunge wamwangana Yehoyakine wamucitanu,

³ lizu lyaYehova lyejile cakwiza kuli kapilixitu Ezekele mwanaMbuji mulifuci lyavaKalateya kukalwiji Kevale, kaha livoko lyaYehova lyapwile hali ikiye kuze.

⁴ Ngwatalile, kaha kumana, kwejile peho yakukuta kufuma kunote, livwi lyalinene nakakahya kakulifunyanga, nakumunyikako nawa jingulwixi ndo. Kaha mukaci kako mwapwile nge cikungo cakuwesuka mukaci kakaze kakahya.

⁵ Mukaci kako mwafumine vakufwana nge vaka-kuyoya vawana. Kuvatala vapwile ngana, vapwile yakufwana nge vatu,

⁶ umwe naumwe apwile najiholo jiwana, vakivo umwe naumwe apwile namavava awana.

⁷ Mahinji avo apwile mahinji akusungama, vilyacilo vyamahinji avo vyapwile nge vilyacilo vyamahinji amwanangombe, kaha vapwile nakukejima nge unengu wakutumuna.

⁸ Vapwile namavoko autu muxi yamavavavo kujihaci javo jiwana, kaha vosena vawana vapwile najiholo javo namavavavo ngana,

⁹ mavavavo apwile akulinunga limwe nalikwavo, kavalumukileko omu vayile, vandondekelenga ou kumeso enyi ou kumeso enyi.

¹⁰ Jino kufwana cajiholo javo, vapwile najiholo jautu, kaha vosena vawana vapwile najiholo jaundumba kujihaci javilyo, vosena vawana vapwile najiholo jaungombe kujihaci javimoswe, vosena vawana vapwile nawa najiholo jaungonga.

¹¹ Jiholo javo namavavavo vyapwile vyakulihandunuka helu, mavava aumwe naumwe avali apwile akulikwata limwe nalikwavo, kaha avali avali afwikile mijimba yavo.

¹² Vandondekele umwe naumwe kumeso enyi, kuze asakile Xipilitu kuya vayileko, kavalumukileko hakuya.

¹³ Jino kufwana cavaze vaka-kuyoya, kuvatala vapwile nge makala akakahya, nge kutala mimunyi, kaze kakahya kapwile nakuhitangana muli vaze vaka-kuyoya, kakahya kaze kapwile kakumunyika, kaha mukakahya kaze mwafuminenga miveso.

¹⁴ Vaze vaka-kuyoya valahile nakukinduluka, kuvatala vapwile nge kuvesa camiveso.

¹⁵ Jino ximbu ngwavatalile vaze vaka-kuyoya, kumana, hamavu hapwile lifumbo limwe kujihaci javaze vaka-kuyoya kuluholo lwavo kuluholo lwavo kujiholo javo jiwana jiwana.

¹⁶ Mafumbo aze kuwatala nomu vawatengele apwile nge mbelelu. Osena awana apwile nakufwana coco cimwe, kaha kuwatala nomu vawatengele apwile nge mukaci kalifumbo mwapwile lifumbo likwavo.

¹⁷ Omu ayile, ayile mumitamba yawo yiwana, kawalumukileko hakuya.

¹⁸ Vitengulula vyawo vyapwile vyakuzandama vyakwivwisa woma, kahosena awana apwile navitengulula vyawo vyapwile nameso kwosena jingulwixi ndo.

¹⁹ Vaze vaka-kuyoya hakuya, naze mafumbo nawa ayile kujihaci javo, kaha vaze vaka-kuyoya hakuzunduka helu nakufuma hamavu, naze mafumbo nawa azundukile helu.

²⁰ Kwexokwo asakile Xipilitu kuya vayileko, kwokwo vene asakile xipilitu kuya. Aze mafumbo nawa azundukile helu navakivo hamwe, mwomwo Xipilitu wamuka-kuyoya apwile mumafumbo aze, xikaho.

²¹ Omu vayile vaze, nawawa nawa ayile, kahomu vemanyine vaze, nawawa nawa emanyine. Omu vazundukile vaze helu nakufuma hamavu, naze mafumbo nawa azundukile helu navakivo hamwe, mwomwo Xipilitu wamuka-kuyoya apwile mumafumbo aze, xikaho.

²² Helu lyamutwe wayauze mukakuyoya hapwile cakufwana nge utangatanga, kuutala wapwile nge kulusutalu yakwivwisa woma yakukanyika helu lyamitwe yavo.

²³ Muxi yautangatanga uze mwapwile mavavavo akusungama, limwe nakutala likwavo. Umwe naumwe apwile naavali akufwika kuluhaci lumwe, umwe naumwe apwile naavali akufwika kuluhaci lukwavo kumijimba yavo.

²⁴ Omu vayile ngwevwile vyema vyamavavavo nge vyema vyavimeya vyavivulu, nge lizu lyaUkweci ngolo josena, vyema nge vyaliuya nge vyema vyalizavu lyavatu. Omu vemanyine vazewile mavavavo.

²⁵ Jino helu lyautangatanga uze wapwile helu lyamitwe yavo hapwile lizu lyakuhanjika. Omu vemanyine vazewile mavavavo.

²⁶ Helu lyautangatanga uze wapwile helu lyamitwe yavo hapwile lyakufwana nge litanda lyawangana, kutala nge lilolwa lyasafwila, kaha haze hakufwana nge litanda lyawangana hapwile wakufwana hakumutala nge mutu.

²⁷ Ngwamwene nge cikungo cakuwesuka, kutala nge mwapwile kakahya jingulwixi ndo, kufumisoho hakutala nge jitungi jenyi nakutwala helu, kaha kufumisoho hakutala nge jitungi jenyi nakutwala kumavu ngwamwene nge kutala kakahya, kaha kuli ikiye kwapwile kumunyika jingulwixi ndo.

²⁸ Nge omu apwa kongolo hakumutala, ou ali halivwi halikumbi lyavula, ngoco mucapwile kumunyika cize hakucitala jingulwixi ndo. Mukiko mwapwile kufwana caupahu waYehova hakucitala. Kahomu ngwaumwene, ngwalimbilile camesohamavu, ngwevwile lizu lyayou mwahanjika.