ESETA 1 - Luvale Bible 1970

Lisano Vaxaci mwalikanga kuli mwangana Ahaswelu

¹ Jino casolokele hamakumbi aAhaswelu (ou you Ahaswelu uze apwilenga mwangana kufumisa kuInja mbwe nakuEcopa, hamafuci likulukaji namakumi avali naatanu naavali),

² makumbi aze, omu atwaminenga Ahaswelu halitanda lyawangana we­nyi lize lyapwilenga muXuxane, mu­zuvo yawangana,

³ hamwaka wawangana wenyi wa­mucitatu, avatelekelele vaka-kulitu­laho jenyi vosena navangamba jenyi vakwavo kulya cacivulu. Kaha vakangolo jaPeleja naMete, vavalemu navaka-kulitulaho jamafuci, vapwile kumeso enyi.

⁴ Haze vene avalwezelenga vikumba vyaupahu wawangana wenyi nakukaluhwa caluvaji lwaunene wenyi makumbi amavulu, makumbi liku­lukaji namakumi atanu naatatu.

⁵ Jino makumbi aze omu atelemo, mwangana avatelekelele vatu vosena vaze vapwile muXuxane muzuvo yawangana kulya, navaze vavalemu navaze vamokomoko, makumbi ata­nu naavali, mucipango camilemba yazuvo yamwangana.

⁶ Kwapwile mahina akusukejeka atoma, nawawa ausungwa wamafo atamba, nawawa axikima, akukaxilila najingoji jalinyu lyamwaza naungonyi kutupata twapalata na­kujipanda jamamole. Tuhela twapwi­lenga twaulu napalata, hamalolwa amamole akwala acila nawawa ato­ma nawawa ausungwa.

⁷ Vavahanyinenga vyakunwa mu­vyuma vyaulu (vyuma kana vyapwile evi vyeka evi vyeka), navinyo vya­wangana vyavivulu, nge kutesa no­mu vavahanyinenga kuli mwangana.

⁸ Kunwa kana capwilenga haluximbi, kakwapwile ou wakuvaxinjilako, mwomwo mukiko mwavalwe­zele mwangana vavalemu vamuzuvo yenyi vosena ngwenyi, Valingenga nganomu mwamona mutu himutu kuwaha.

⁹ Nalisano Vaxaci nawa avateleke­lele mapwevo kulya muzuvo yawa­ngana yize yapwile yamwangana Ahaswelu.

¹⁰ Halikumbi lyamucitanu naavali, omu wapwile mucima wamwangana nakuwahilila navinyo, avalwezele Mehumane naMbijita naHalavone naMbingita naAvangata naZetale naKalakase, ava vapwile tuselwa vatanu navavali vaze vazacilenga kumeso amwangana Ahaswelu,

¹¹ ngwenyi, vamunehe lisano Vaxaci kumeso amwangana, namucama wa­wangana hamwe, mangana avalweze vaze vatu veka naveka navaka-kuli­tulaho upahu wenyi, mwomwo ku­mutala apwile wamwaza, xikaho.

¹² Oloze lisano Vaxaci akanyine kwiza halizu lyamwangana muli vaze tuselwa, xikaho mwangana akwacile ndombo cikuma, kulundu­ndu yenyi yapwile nge kakahya mu­mucima wenyi.

¹³ Mwangana avehwile vaka-mangana vaze vatacikijile muyayile myaka (mwomwo mukiko mwalingi­lenga mwangana kuli vosena vaze vatacikijile jiximbi nakuyula,

¹⁴ kaha hakamwihi nenyi hapwile Kalaxena naXetale naAtamata naTalaxixe naMelese naMalasena naMemukane, ava vapwile vaka-kuli­tulaho jaPeleja naMete vatanu na­vavali, vaze vamwenenga mwangana kumeso enyi, vaze vatwaminenga kwakulivanga kuwangana wenyi),

¹⁵ ngwenyi, Catela kuli etu kumu­linga lisano Vaxaci muka nge kutesa najiximbi, mwomwo nakane kulingomu ngwamulwezangami mwa­ngana Ahaswelu muli ava tuselwa!

¹⁶ Memukane amukumbulwile ku­meso amwangana navaka-kulitulaho ngwenyi, Lisano Vaxaci kavulumwine kuli mwangana kahako, oloze nakuli vaka-kulitulaho vosena nawa nakuli vatu veka naveka vosenava vali mumafuci ayove mwangana Ahaswelu osena.

¹⁷ Mwomwo cumeci nalingi lisano naciya teyenu kuli mapwevo vosena, nakulingisa malunga javo kupwa vakulumbilisa mumeso avo, omu navakavambulila ngwavo, Mwangana Ahaswelu avalwezele vamwingise lisano Vaxaci kumeso enyi, oloze kejileko.

¹⁸ Jino likumbi lyalelo mapwevo vakulitulaho vamuPeleja naMete, ava vanevu eci nalingi lyehi lisano, navamba mwomumwe kuli vaka-kulitulaho jayove mwangana vosena. Ngoco nakusoloka kulumbilisa ca­civulu nandombo.

¹⁹ Nge ove mwangana unamono ngwove, mwamwaza, kaha kuli ove kufume luximbi lwawangana, valusoneke kujiximbi javaPeleja navaMete, mangana vahone kulwalumuna, ngwove, Vaxaci kanda akeza ceka kumeso ayami mwangana Ahasweluko. Kaha ove mwangana uka­hane usano wenyi kuli mukwavo weka wamwaza kumuhambakana ikiye.

²⁰ Jino luximbi lwayove mwangana elu nauhana, omu nalukevwakana muwangana wove wosena, (mwo­mwo ukiko waunene), kaha ma­pwevo vosena navakalemesa malu­nga javo, navava vavalemu navava vamokomoko.

²¹ Cihande eci cawahile kumeso amwangana navaka-kulitulaho, kaha mwangana alingile mwayile lizu lyaMemukane.

²² Mwomwo atumine mikanda ku­mafuci amwangana osena, mulifuci hilifuci nge mwayile kusoneka calyo, nakuli vatu hivatu mwayile malimi avo, ngwenyi, Lunga hilunga apwe­nga mwata muzuvo yenyi, ahanjikenga mwaya lilimi lyavatu vakwavo.