Efwesu 1 - Luvale Bible 1970

Paulu mwavameneka

¹ Ami Paulu, ngukaposetolo kaKulixitu Yesu cakumucima waKalunga, kuli enu vaka-kujila muli kuEfwesu, muvaka-kufwelela muli muli Kulixitu Yesu.

² Kuli enu kupwenga likoji nakuunda vyakuli Kalunga Setu naMwata Yesu Kulixitu.

Kuwahisa caXipilitu muli Kulixitu

³ Vamukisulenga Kalunga kaMwata wetu Yesu Kulixitu, Ikiye Ise nawa, Ou natuwahisa lyehi nakuwahisa caxipilitu cosena mumelu muli Kulixitu,

⁴ nganomu atusakwile muli Ikiye ximbu capwile cihela camavu cicili kanda, mangana ngwenyi, tukapwenga tuvaka-kujila, tuvakuzeneka cuma cakutuhanyina mulonga kumeso enyi muzangi.

⁵ Mwomwo atutongwele lyehi hakulivanga, mangana ngwenyi, akatwitavile kupwa tuvana yaivene muli Yesu Kulixitu, nge kutesa nomu amwene kuwaha mumucima wenyi.

⁶ Mangana ngwenyi, cikapwenga cakwalixila upahu walikoji lyenyi, lize atuhanyine lyawana muli Ou azanga.

⁷ Muli Ikiye mukiko vene tuli nakusokoka cetu hamanyingenyi, cikiko kutukonekela vilinga vyetu vyakuhingika, nge kutesa naluheto lwalikoji lyenyi,

⁸ lize atuvulixilile mumanganosena namukuzangama cosena,

⁹ hakutujimbwila mangana aku­swekawa amwaya mucima wenyi, nganomu amwene kuwaha, omu akavile muli Ikiye,

¹⁰ kutwala nakumwaka wakutesamo myaka yosena, mangana ngwenyi, vyuma vyosena akavifutakanyine muli Kulixitu, navyuma vyamumelu navyuma vyahamavu, muli Ikiye kaha.

¹¹ Muli Ikiye mukiko vene vatulingixilile kupwa tuuswana, mwomwo vatutongwele lyehi hakulivanga, nge kutesa namuze akavilengOu eji kuzacisanga vyuma vyosena mwaya punga yamumucima wenyi,

¹² mangana ngwenyi, tukapwenga tuvakwalixila upahu wenyi, etu vene twalivangile kutalilila muli Kulixitu.

¹³ Muli Ikiye nayenu nawa, omu mwevwile mazu amucano, akiko mujimbu wamwaza wakumilwila cenu, muli Ikiye, enu hakufwelela nawa, vamihakilemo katacikijilo, Ivene Xipilitu wajila, Ou vaxikile.

¹⁴ Ikiye napu cijikilo causwana wetu, kutwala nahakusokola luheto elu nahete, mangana valixilengaho upahu wenyi.

Kulomba mangana nakusolola vyakusweka

¹⁵ Xikaho nayami nawa, mwomwo ngunevu lyehi kufwelela muli Mwata Yesu oco cili muli enu, nazangi yenu mweji kuvazanganga vaka-kujila vosena,

¹⁶ xikaho kangwalitwamina kusakwila hali enu nakumivuluka kukulomba camiko,

¹⁷ mangana ngwami, Kalunga kaMwata wetu Yesu Kulixitu, Ikiye Ise yaupahu nawa, amihane xipilitu yamangana yakusolola vyakusweka, hacinyingi cakumutacikiza,

¹⁸ mangana meso amicima yenu hakutona, numba mutacikize mwaya kutalilila cakusanyika cenyi, nomu lwapwa luheto lwaupahu wauswana wenyi muli vaka-kujila,

¹⁹ nomu cambwambumukila kuvula cangolo jenyi kuli etu tweji kufwelelanga, nge kutesa nakuzata kana catwima jenyi

²⁰ cize azacile muli Kulixitu hakumusangula kuvafu nakumutwamisa kulivoko lyenyi lyacilyo mumelu,

²¹ helu hakuhambakana cikuma mawanganosena nakuyula cosena nangolo josena namawatosena namajinosenaze vanavuluka, kexi hamyaka yino kahako, oloze nakumyaka nayikezaho nawa.

²² Kaha vyuma vyosena avihakile muxi yamahinji enyi, amuhana Ikiye kupwa mutwe wakulitulaho havyuma vyosena kuliuka,

²³ likiko vene linapu mujimba wenyi, likiko vene kuzala cayOu eji kuzalisanga vyuma vyosena mwosena.