AMOSE 1 - Luvale Bible 1970

Omu navakavapayisava valihata navaIsalele

¹ Awa akiko mazu aAmose, ou apwilenga muli tufunga vakuTekowa, awa amwene hali Isalele hamakumbi amwangana wavaYuta Uji­ ya, nahamakumbi amwangana wavaIsalele Yelovowame mwanaYowaxe, omu mwacipwile myaka yivali numba mundenda usoloke.

² Ambile ngwenyi, Yehova mwakakumbwoka kuZeyone, mwakahanjika nalizu lyenyi lyakukangwoka kuYelusalema, malilo atufunga nawakalixona, kaha kwilu lyaKalamele nakukominyina.

³ Yehova nambe ngwenyi, Havilinga vyaNdamaxiku vyakuzomboka jiximbi vitatu, haviwana vene, xikaho kangwexi kucipeulako, mwomwo vanazungula lyehi Ngileyate navyuma vyakuzungwisa vyafwelu.

⁴ Oloze nangukatuma kakahya muzuvo yaHazayele, nakakalya mazuvo aMbene-hatate.

⁵ Kapaciso kuNdamaxiku nangukakahokola, kahava vatwama kucana caAvene nangukavatetako, nou nawa nakwate mukombo wawangana nawa nangukamuteta kuzuvo yaEtene. Vatu vakuSulya navakavatundula nakuvatwala kuKile. Mukiko mwanambe Yehova.

⁶ Yehova nambe ngwenyi, Havilinga vyaNgaza vyakuzomboka jiximbi vitatu, haviwana vene, xikaho kangwexi kucipeulako, mwomwo vavatundwile ava vatundwile vosena, mangana vakavalunde kuli vaEtome.

⁷ Oloze nangukatuma kakahya hakembwe yaNgaza, nakakalya mazuvo alyo.

⁸ Ava vatwamako nangukavatetako kuAxatote, nou nawa nakwate mukombo wawangana nawa nangukamutetako kuAxakelone. Nangukalumwina livoko lyami haEkelone, kaha vaFwilixite vaze navakasalaho navakanonga. Mukiko mwanambe Yehova.

⁹ Yehova nambe ngwenyi, Havilinga vyaTule vyakuzomboka jiximbi vitatu, haviwana vene, xikaho kangwexi kucipeulako, mwomwo ava vatundwile vosena vavalunjile kuli VaEtome, kavanukile luxiko lwamuwana-wakwavoko.

¹⁰ Oloze nangukatuma kakahya hakembwe yaTule, nakakalya mazuvo alyo.

¹¹ Yehova nambe ngwenyi, Havilinga vyaEtome vyakuzomboka jiximbi vitatu, haviwana vene, xikaho kangwexi kucipeulako, mwomwo amuhangasanyine ndumbwenyi napoko yamukwale, aholesele keke yenyi, utenu wenyi wamusanywilenga lika, alaminenga ndombo yenyi makumbi osena.

¹² Oloze nangukatuma kakahya haTemane, nakakalya mazuvo akuMbozola.

¹³ Yehova nambe ngwenyi, Havilinga vyavana vaAmone vyakuzomboka jiximbi vitatu, haviwana vene, xikaho kangwexi kucipeulako, mwomwo mapwevo vakuNgileyate vaze vapwilenga namajimo vanavapulapula mangana vatohwese ngiza yavo.

¹⁴ Oloze nangukawika kakahya kukembwe yaLava, nakakalya mazuvo alyo nakulikuwa halikumbi lyajita, nanyamanganda halikumbi lyacijimbilanganga.

¹⁵ Mwangana wavo mwakaya nakumutundula, naikiye navaka-kulitulaho jenyi hamwe. Mukiko mwanambe Yehova.