Yakobo 1 - Ibayibuli Ingwalaafu

¹ Ibaluwa yino yaama isiise Yakobo, umuraambi wa Wele, naluundi w'Omukasya Yesu Kristo. Mbasheesa inywe bikuuka liikhumi na bibili, bibisalaniile mu shiibala shoosi.

Khuufukiilila ni kamakhula

² Bebuulebe, ni mushiyilatsake nga she kumwikhoyo kumukali naabi, buli lweesi mwakaananila bibiindu bibibakhakilisa,

³ lwekhuuba mwamanya muri, khukhakilisibwa lwe khufukiilila khweenywe khureera khukhwikhalilikha.

⁴ Ni khukhwikhalilikha khwakha khwokesanisibwila mu buraambi, nio akile mwikyele bakhosefu babetsufu babeene, babaakhekhililakho musaambo yoosi ta.

⁵ Ne noola mutweela khusiinywe s'ali ni kamakhula ta, n'aloombe Wele, ni Wele naye kane akamuwe. Wele akabila busa babaandu boosi kamakhula khulwe bubweela bweewe, naluundi nga s'ekiitsa umuundu yeesi ta.

⁶ Ne uloomba aryo, akhila khuloomba ni khufukiilila, nga s'ali ni khukhwikanakana ta. Lwekhuuba umuundu uli ni khukhwikanakana afwaana nga khuyeŋaana khwe kameetsi khu nyaantsa, khukhureerebwa ni mbewo.

⁷ Umuundu uyeŋaana aryo, ukhanyala wakhalawo shishiindu na shitweela ta, naluundi nga ayeŋaana mu buli sheesi akhola,

⁸ akheyikina khutuya shishiindu shoosi khukhwaama isi Umukasya ta. Aba ali ni kimyoyo kibili, nga buli mbuka ekanakana.

Buutaambi ni Buyindifu

⁹ Shiba shilayi uwe buulebe umutaambi khuuba umusangaafu, nga Wele wamuniinisile angaaki.

¹⁰ N'umuyindifu naye aakha khuuba umusangaafu, nga Wele waamwikhisile aasi. Lwekhuuba umuyindifu amenyawo imbuka njeekhe, nga shiimuli she mwiirome.

¹¹ Inyaanga n'irura, ni bukhafu bukali, yoosha bunyaasi bwooma, ni shiimuli shalakala, ni bumiliwu bwasho bwakoraana. Ni musaambo niyo ndweela, umuyindifu naye aliniala aryo, nga ali mwiibyo byeesi ayayaanila.

Khuukhakibwa ni Khuutsemebwa

¹² Ali ni khabi umuundu uwikhalilikha mu khukhakibwa khweewe, lwekhuuba nga wakhakiwile, ne wekhalilikha wabiramo, alifuna shiwaanwa she buulamu, sheesi Wele alomela ibo babamukana.

¹³ Noola umuundu yeesi akhakibwa, akhaloma ari, “Wele niye uwusindikhiile khukhakibwa khuno” ta. Lwekhuuba Wele s'akhakibwa ni shiibi ta, naluundi niye umweene s'akhakilisa umuundu yeesi ta.

¹⁴ Ne khurusakho ndi umuundu umweene, akhongelesebwa naluundi wawaambikha khulwe khukhwiwotooma khweewe umweene.

¹⁵ Khukhwiwotooma khuno nga khwahesile, khusaala shishonako; ni shishonako nasho nga shatsoyile, shisaala khuufwa.

¹⁶ Nashiryo, be buulebe baase bakanwa, mukhawombelesebwa ta.

¹⁷ Buli shiwaanwa shoosi shilayi, nabuli shiwaanwa shoosi shikwalaafu, shaama mwikulu, nga shiikha khukhwaama isi Wele Paapa, uwabuumba bibyaburukhila mu ngaaki byoosi. Mu niye imbaamo khukalukhakalukha namwe shishiniini shishikalukhakalukha ta.

¹⁸ Khulwe khuukana khweewe khukhweene, Wele akhubuumba ifwe, wakhurawo nga abirira mu shilomo she bwa ŋali, ari nio manya nafwe khube nga baakiboole mu bibuumbe byeewe byoosi.

Khuuwulila ni Khuukhola

¹⁹ Be buulebe baase bakanwa, ni mumanye shino muri, buli muundu abe uwakhaangu khurekeeresa, nga emenielesa byeesi akanikha naluundi alekhe khukhwikhalalisaka khaangu ta.

²⁰ Lwekhuuba lirima ly'omuundu shilireera bukwalaafu bwa Wele ta.

²¹ Nashiryo, ni mwisisakule bye bunyaalu byoosi, ni tsisaambo tsiimbi tsoosi, mwakaanile ni buwolu Ilomo ya Wele isi aabyaala mus'iinywe, nisho shishinyala khuuwonesa kimyoyo kyeenywe.

²² Ne mwaakha mwaakhola byeesi Ilomo ya Wele ibaboolela, nga shino shibonekhela mu buraambi bweenywe, akhali khukhwiwombesa nga mwaakama khu khurekeeresa busa ta.

²³ Lwekhuuba umuundu n'arekeeresa Ilomo ya Wele, ne walekha khukira mu buraambi, afwaana busa nga umuundu uwilolela mu ndolelo, waabona nga n'afwaana.

²⁴ Ne khaangu akho n'arurawo waatsya, webilila nga n'eboneele mu ndolelo, nga n'afwaana.

²⁵ Ne uyo ulondelela buulayi bubweene likaambila lya ŋali luundi liliwonesa, walihandalalilakho, nga s'ali busa urekeeresa, ne webilila ta; umuundu uyo alifuna ikhabi mwibyo byoosi byeesi akhola.

²⁶ Ne noola umuundu yeesi eyambaasa khulweewe ari ali uwe diini, n'enga s'anyala khuwula lulimi lweewe ta, aba ewombesa busa mu mwoyo kweewe umweene. Idiini y'omuundu uyo iba mbaawo sheesi ilikhumuyeeta ta.

²⁷ Idiini ili iya ŋali naluundi ikhalikho likoondo mu moni tsa Wele Paapa weefwe niyo yino: khuyeeta bafuubi, ni banamulekhwa mu bihangafu byaabwe, naluundi umuundu umweene khukhwiliinda alekhe khuwakhibwakho lisaanda lyoosi lye shiibi she mu shiibala ta.