Khukhwiwunamila 1 - Ibayibuli Ingwalaafu

Kumutaambo kwa Yerusalemu

¹ Bona shiriimba Yerusalemu shishaba shaayitsulamo babaandu, ari shiliiwo shiŋaara busa! Shiriimba shishabatsaka she kamaani akari mu manaambo, ari shafwaanile busa nga namulekhwa uwantsuwa! Shishabatsaka shishifuura lukoosi mu biriimba byoosi, ari bona shaayikyela busa nga umuundu umukulwa.

² Shikona shilila luukali kamasika shiilo shibuufu, kamasika kaaba nga kerurukukha khu saya tsasho. Akari mu basaale baakali abe babaashisiima naabi, ari mbaawo na mutweela utsya waashiisamo kamaani ta. Abo boosi babaabatsaka basaale baasho, ari nibo bashilyamo luwomelo, boosi baayikyela baasiku baasho.

³ Lwanyuma lwe babaandu be mu Yuda khuutaambisibwa luukali ni khuubirisibwa buubi naabi, babaawuyisa baabayila mu bubowe. Ari Yuda shaayikhala akari mu manaambo kakaandi, nga babaandu sibalikho ni shiifwo she khuuwolelamo sheesi balaanga bari shishaawe ta. Baasiku baabwe baabatimisile, baabakariire akari mu mutaambo kumukali, sibalikho ni bubwilukhilo bwoosi ta.

⁴ Ari kimikhoosi kikiitsya mu Sayuuni kyeetelelile busa, lwekhuuba mbaawo umuundu na mutweela ukyeendelakho waatsya khukhwiisaayilayo khu mbuka iye kamayiiya kaayo ta. Biilibwa bye shiriimba biliiwo busa nga mbaamo babaandu babaabilimo ta, basaayi baamwo baana lwe kumutaambo, bakhaana baasho baayitsula kumutaambo, ni shiriimba shisheene shili mu butsiina buukali bubukhanyalikha ta.

⁵ Baasiku ba Yerusalemu ari bekyelile nibo babaashilikho bunyala, bona balikho bashinyayilamo busa. Umukasya niye ushireerera kumutaambo kumukali ukwo, nio shinaanisibwe lwe bubwoonaki bwasho buukali. Baryo babaandu baasho bawaambibwile bawuyisibwile baayilibwile mu bubowe i aleeyi naabi w'omusiku waabwe.

⁶ Shiriifwa she shiriimba Sayuuni shaweelewo. Baaraangilisi baasho ari bafwaanile busa nga ikhisi isi intsala iliile nga bunyaasi mbaawo ta, kamaani kaayo kaakiweelemo nga niyilukha khukhwaama isi abo babaali khuukitimisa.

⁷ Mu bifukhu byasho bye ngunyi ni khuutimaana, shiriimba Yerusalemu shiikhala awo shaashebulila bibiindu byasho bye shiriifwa bibyabawo khaalekho. Khu mbuka isi babaandu baasho baakwiila mu mikhono kye baasiku, s'abawo umuundu na mutweela uwanyala khushiyeeta ta; isho shaakila baasiku abo baashitsekhelela busa nga shilikho shoonakisibwa.

⁸ Shiriimba Yerusalemu shino, shayoonakisa luukali, nashiryo shaayikyela shinyaalu. Babaandu boosi abe babaashiwaatsaka shiriifwa ari bashilekelesa busa, lwekhuuba nibo baamala khaale khuubona bukhuna bwasho. Ari bona nisho shaniaaka busa lwanyuma shebiimbilila mu moni mwasho lwe khuswaala.

⁹ Bunyaalu bwasho bweyanikhiile busa, ne nisho shalekha khwambaasakho khu mutaambo kwasho kukuuli khukhwiitsa ta. Nashiryo khuukwa khwasho khuli khwe kamaani naabi, ne mbaawo umuundu yeesi unyala waashiwolelesa ta. Baasiku baasho baashiwulile shikila shilila shiri, “O Umukasya bonakho kumutaambo kwase, baasiku baase bafuurire.”

¹⁰ Baasiku baasho baabalaayisile kamakhono kaabwe baanuulile bibiindu byaabwe bye lisuno byoosi. Ilala baboone kamanaambo kakaandi nga keetsa khukhwinjila khukhwibwakala shiifwo shikhosefu, abe isi babaandu beene bakhaakhila khukhwinjilayo ta.

¹¹ Babaandu baasho boosi belootsa naabi ni baba nga balikho baheentsa she khuulya; baryo bashuusaŋamwo bye buyiindifu byaabwe khuufuna bya khulya, nio banyale khuuramawo nga baalamu. Shiriimba shoosi shilila shiri, “Indolelele Umukasya, ubone shihangafu she khuulekelesebwa sheesi ise ndimo!”

¹² Shiriimba shililila buli muundu yeesi uuli khuubirawo shiri, “Sishibawaambakho inywe mweesi babaali khuubirawo ta? Lola mubone, manya yaabatsakawo buutsiina bwoosi bubufwaanakho nga bweesi ise ndimo buno, bweesi Umukasya andeerekho khusiise, khu mbuka iye lirima lyeewe liikali?”

¹³ “Umukasya areera kumulilo khukhwaama mu ngaaki, kwoosha ni mu makuumba kaase mukari. Andeka kumureko aasi mu bikyele byase, byandeka nekhupa aasi. Niye waandurirekho wandekhile ise senyene mu butsiina bwase imbuka yoosi.”

¹⁴ “Niye aabuusa bibyoonako byase byoosi waabibowa atweela, waaraambisa kamakhono keewe waabilukhamo kumukosi. Aryo waabisuunga mwikosi mwase, naaweetsekhelela kamaani kaase koosi. Umukasya waambaanayo isi babaandu beesi ise ikhanyala nasoolanisa ta.”

¹⁵ “Umukasya aatsekhelela baselikhale baase be kamaani babaali natweela ni nase; waarumana baselikhale beewe khukhwiiraka baselikhale babaali khu luwaande lwase. Aryo waasambakilila babaandu beewe ba Yuda waabafwaanisa busa nga usuura iviini.

¹⁶ Ise nilootsa lwe bibiindu bino byoosi, tsiryo tsimoni tsase tsaleengaleenga kamasika. Mbaawo umuundu uwuundi aambi khukhuuntsisamo kamaani ta, mbaawo na mutweela uwungobosamo kumwoyo ta. Babaana baase baayikyela kimiyaayu busa, mbaawo sheesi umusiku aalekha nga waakhukhola ta.”

¹⁷ Sayuuni shaasutile kamakhono kaasho mu ngaaki, ne nga mbaawo umuundu na mutweela uwiitsa khuushiyeeta ashisemo kamaani ta. Umukasya waalaangiliile shilakilo khu baandu ba Yakobo, nga alakila ari babesanwa baabwe bekyela baasiku baabwe. Shiriimba Yerusalemu shekyelile shinyaalu akari mu nibo.

¹⁸ Umukasya Wele niye ali umukwalaafu, ne ise niye uwaborokha naaminyaalila kamakaambila keewe. Nashiryo reekeresa inywe babaandu mweesi, muryo mubone khuutaambisibwa khwase khuno. Bakhaana baase boosi ni basaani baase bahele baayilibwile mu bubowe.

¹⁹ “Ise nalaanga bakanwa baase, ne nibo bandyamo luwomelo bekaana khukhuunjeeta. Basaayi baase ni baasakhalu boosi bahelela mu shiriimba, nga bakhakakho khuweentsa bye khuulya bari nio banyale khuuramawo nga baalamu.”

²⁰ “O Umukasya bonakho khane, nga ise ndi mu mutaambo kumukali! Kumwoyo kwase kwetsuule butsiina buukali, mu mwoyo kwase mukari nesindukhile naabi, lwekhuuba nabeele umumiinyi luukali. Mu nguudo tse mu shiriimba mwetsuulemo bubwiiri bwonyene, ni muuntsu tse babaandu mukari mwetsuulemo khuufwa khwonyene.”

²¹ “Reekeresa uwulile nga ise niindi khukhwilootsa, ne nga mbaawo umuundu uwiitsa khukhuumboleelesa ta. Ni baasiku baase babeene bawuliile khu mutaambo kwase. Nibo bekhoyile naabi khuubona bari iwe waashikholile uryo. Khali shifukhu sheesi walaangilila shoolile khaangu, nio nabo bataambisibwakho nga ise niindi khuutaambisibwa.”

²² “Khali bumoyaani bwaabwe bwirurukhiliile mu moni tsoowo; uryo ubakholekho nga ni washikhola khusiise lwe bubwoonaki bwase. Ise ndi mu ngunyi ingali naabi naluundi kumwoyo kwase kwaweetsekheleele luukali naabi musiise.”