Isaaya 1 - Ibayibuli Ingwalaafu

¹ Khuno nikhwo khuubonekhelwa khwa Isaaya, umusooleli wa Amozi, nga abona bibiwaamba khu Yuda ni khu Yerusalemu. Niye aafuna khuubonekhelwa khuno khu mbuka iye buwuli bwa Uziya, Yosamu, Ahazi, ni Hezekiya, nga nibo bayiinga ba Yuda.

² Umukasya waaloma ari, “Rekeeresa, Iwe liikulu, uwuliliise buulayi ni nawe shiibala byeesi ise Umukasya indi khuuloma! Bona babaana beesi ise samweene natsowesa baaminyaaliile.

³ Ubona ni tsikhaafu tsaamanya uyo utsilolelela, ni tsisikilya natsyo tsaamanya umwaayi watso, ne babaandu ba Isiraeli sibamanya ta. Babaandu baase sibaayimanya ise nga niye umuloleleli waabwe ta.”

⁴ Ni nashiryo, inywe nga muli linaambo lye bibyoonako! Mwaayikokomela bibyoonako, muli lisaaye lye baboonaki. Muli babaandu baabi, baalyakhani! Isho shishiikila mwaantsawukhakho khusiise, Umukasya Wele wa Isiraeli.

⁵ Lwashiina kila mwiloosela khuukana khuufuna shiitaambiso? Lwashiina mukana khuuminyaala buli mbuka? Nashiryo bona ari kumurwe kwoosi kwaatsiinisibwile, ni kumwoyo kweene kwoosi kuli kumulwaale.

⁶ Khukhwaamila ilala aasi mu shikhaandakilo khukhwoolela ilala khu murwe khu ngaaki, mbaamo buulamu ta, khuurusakho kamakoontsyo, ni khunuubukhaka, nga mbaawo buukaangi bwoosi, namwe yabawo khuuwakhakakho ni kamafura koosi ta.

⁷ Linaambo lyeenywe lyaayonakisibwa, ni biriimba byeenywe babyoosha ni kumulilo. Babaandu banaambo beetsa bayaaya bibiindu byeenywe nga mweesi mubona, naluundi nga boonakisa buli shiindu shoosi sheesi babonakho.

⁸ Yerusalemu shishaba shimiliwu ari bona shaleekhebwa shaayikela busa nga lisari lyeesi umuliindi we buulo alekhawo waatsya, namwe nga lisari lyeesi baalekha awo busa mu mukuunda, nga baamalile khuukyesa biilime. Shafwaana busa nga shiriimba sheesi balikho bebwakala nga sishilikho ni baaliindi ta.

⁹ Ilekha khuba bari Umukasya uwe kamahe aalekhakho bakyeekhe bari khuusiifwe khwaaramawo baalamu, khali khwaweelawo ilala nga Sodomu, namwe khali khwahelela ilala nga Gomora.

¹⁰ Inywe muli busa nga baawuli atweela ni babaandu be mu Sodomu, nashiryo ni mureekerese likono ly'Omukasya. Inywe muli busa nga babaandu be mu Gomora, ni muwuuliilise likaambila lya Wele weefwe.

¹¹ Umukasya aloma ari, “Tsisaayilo tseenywe tsingali tseesi mureera, mbaawo sheesi tsinjeetakho ta! Tsisaayilo tsintsoshe tse kamamiiku, ni kiminaawa kyatso byaayindokhela! Kamalasile ke tsiwuunwa ni kamasheese, atweela ni ke tsimbusi, biikhupa liishe!

¹² Inywe nga mweetsile khukhuuntsisaaya ise, naanu umweene uwabalomela inywe ari mwiitse ni bibiindu bino khuusinyisaka Lisaayilo lyase Likhulu?

¹³ Ni mwakamisile ni abweene awo khukhuundeerera ise biwaanwa ibyo bibiikhalimwo ta! Bubaane bweenywe bweesi mwoosha bumbunyila buubi! Ni kamayiiya keenywe keesi mukhola nga Kumweesi Kubonekha, ni Sabato ni tsimbuusano tsitsiindi tse khukhwisaaya tsili tse bubwoonaki, ise sinyala naabiikhaliilikha na khakyeekhe khoosi ta.

¹⁴ Kamayiiya keesi mukhola nga Kumweesi Kubonekha, atweela ni kamayiiya keenywe kakaandi, buulamu bwase bwaabibiiyila. Byaayikyela busa nga shisutwa shisiro sheesi ikhali khuunyala khuusuta ta.

¹⁵ “Nashiryo nga mweenyusile kamakhono keenywe mu ngaaki nga mwiisaaya, ise singene imbaloleyo ta. Abe mwaakhaloomba murye, ise singene imbareekerese naakhakyeekhe khoosi ta, lwekhuuba kamakhono keenywe kaatsukha kamafuki ke babaandu baakali.

¹⁶ Aso, nimwisiinge mwabeene, mwimiliise! Ni murusewo bubwoonaki bweenywe bwoosi, ise singana naabubonakho ta. Nimwakaamise khuukhola buubi!

¹⁷ Mwiyike khuukhola buulayi! Ni muweentse bwaŋali. Muyeete abo babaamiinilisibwa. Nimwiimilewo abo babaali baafuubi. Musoolanile abo babaali banamulekhwa.”

¹⁸ Umukasya aloma ari, “Ni mwiitse ari khuŋoone mu lomo yino. Abe bibyoonako byeenywe byaakharandaala byafwaana nga kamafuki, kane imbisiinge bikhose bifwaane nga fwaamba. Abe byaakharandaala byaafwaana nga kamafuki, kane imbikhosise bifwaane nga kamabeele.

¹⁹ Siinga mufukiilisa mwaawuliilisa byeesi ise inoma, kane mulyatsake biilayi bye mu shibala.

²⁰ Ne siinga mumiinyaala mwaalekha khuwulila ta, lurima lwe baasiku beenywe lukhaabakhoonye lubamalewo. Ise samweene Umukasya niye uuli khuuloma biilomo bino.”

Shiriimba she babaandu baboonaki

²¹ Ari Bona Yerusalemu, shiriimba shishaba shishiyikinwa, shaayikyela busa nga malaaya. Khaale shaba shiriimba she bwaŋali luundi she bukwalaafu, ari shaayitsulamwo babeeri swa busa!

²² Ari ifeetsa yeenywe yaakhupa lukukhu, ni viini yeenywe ifuurayo buulayi yaawamwo itsamu.

²³ Baaraangilisi beenywe ari bali banabumiinyi, naluundi bawaamba bisuumbu ni babeefwi. Boosi ari bakana naabi khuulya iwoongo, naluundi bakana naabi khuufuna biwaanwa. Nibo sibakanilakho ilala khukhwiimikhawo lwe buulayi bwe baafuubi ta, naluundi sibakana khuusoolanila buulayi bwaabo babaali banamulekhwa ta.

²⁴ Ninashiryo, nimurekeerese byeesi Umukasya Wele we kamahe, Umunyali wa byoosi, uwa Isiraeli aloma, ari, “Ilala kane imbeliyaase inywe babaali baasiku baase, imbokesanise lirima lyase, inywe babaali be busiku isi ise.

²⁵ Ise kane ingaluse kumukhono kwase kwe buunyala isi muli. Kane imbafulule imbayengulake, imbarusekho lukukhu lwoosi. Kane imbarusekho buunyaalu bwoosi bubuubalikho.

²⁶ Nio lwanyuma imbawe baakayi baalayi indi luundi, ni baawi be kamakyesi, nga baataayi beesi mwanyoowa khuuba ni nabo. Nio lwanyuma shiriimba Yerusalemu shilaangikhe bari shiriimba she bwaŋali ni bubwiyikinwa.”

²⁷ Sayuuni shikhaakobosebwe buyaakha lwe bwaŋali; ni naabo boosi babaakhebiyiise, bakhesibwe buyaakha lwe bukwalaafu.

²⁸ Ne abo babaali baamiinyi, ni babaali baboonaki, bakhaahele bawewo, ni naabo babaantsukha baalekha Umukasya bakhaakhoonyebwe.

²⁹ Kamaŋaanyu kakhaabawaambe lwe shifwaani sheenywe sheesi mwisaayila mu misaala kikiili mu biliindwa. Inywe mukhaaswaale busa lwe kimikuunda kyeesi mweroborera.

³⁰ Mukhaafwaane busa nga kimisaala kimi oko kikiwululukha kamasaafu kaakyo, mufwaane nga kumukuunda kukwoomile kukukhalimwo kameetsi ta.

³¹ Umuundu ufuura kamaani musiinywe akhaawewo khaangu busa nga bunyaasi bubwoomu bubuuliliba kumulilo. Buuraambi bwaabwe buubi bukhaabe bunoro bubuukila kumulilo kwawaamba. Nibo atweela ni buuraambi bwaabwe bakhaashiile atweela, ilekhe khuubawo umuundu yeesi unyala waasimisa kumulilo ukwo ta.