Yoele 1 - BONKANDA WA NZAKOMBA

¹ Joi ja Yawe liyaki ele Yoele, Bona owa Petwele.

² Inyo baende ba mpaka, lokoza; inyo banto bʼese bauma, lumbʼatoi. Joi line likelamaki nda bembile bekinyo, nkina ndʼembile beki baise bakinyo nde?

³ Losangela banaʼakinyo joi liko, kela banaʼakinyo basangele banaʼakiyo, ko banaʼakiyo basangele eotswelo emo.

Eyelo ea basalankata. Lokamo elʼanto wae baututale

⁴ Baki boto ocikaka lisalankata aleki; ko baki lisalankata ocikaka likanga aleki; ko baki likanga ocikaka inkimo aleki.

⁵ Inyʼalangwa, loetswa, ko lolelaka; inyʼameli ba vina, lula nkimo ndʼewela ea vina ea eteletela; elʼeko eolimolama limʼomwaʼokinyo.

⁶ Ele booci bomo wa mpamba bofa la boanji, boya ndʼese ekami: baino bakande bale baino ba nkosi, ko ale la baino ba bikeku bia nkosi eʼomoto.

⁷ Aomelenganya bokoliʼokami wa vina, ko aotembola botamba bokami wa liteli: bocwa bonkangaala o lʼende, aolusʼoko, ko bitafe biʼoko biokela fe.

⁸ Lela ngole bomoto owʼonolu olotsama bonyuku akiʼnde ndʼolengeʼokae.

⁹ Mbeka ea biofo la mbeke ea mmamela iosila limʼilombe ya Yawe; nkanga, wae bakambi ba Yawe, bayolele.

¹⁰ Lisala jomelengana, ko ese eyolele: ele blé eofitana ko vina eʼaeyoko eokasela, ko bauta baosilela.

¹¹ Inyo bamongʼasala, lokaka nsoi; inyo bafongi ba bekoli bia vina, lulaka nkimo, ndʼewela ea blé la orge; emukelo ea lisala eofitana.

¹² Bokoli wa vina bonyeela, ko botamba wa liteli bonyitana; la grenadier, la liya, la pommier, wete betamba bia lisala beuma beonyeela; ele bosalangano bosila limʼele bana bʼanto bʼaende.

¹³ Inyo nkanga, loyalotsʼinyo mongo benyuku, lolelaka; inyo bakambi nda nkinda ea mbeka, lulaka nkimo; inyo bakambi ba Nzakomba ekami, loyaka, letama botsʼotso ndʼonyuku; ele mbeka ea biofo la mbeka ea mmamela yofimama limʼilombe ya Nzakomba ekinyo.

¹⁴ Loekya ekila ea toma ta ndala, lotakanya etakano ea boeko, lotakanya bingambi la banto bʼese bauma ndʼilombe ya Yawe Nzakomba ekinyo, ko lusela Yawe loela:

¹⁵ “Mbilʼeko oyei! ele mbile ea Yawe eotutama, ifoya ngʼemelengano limʼele Owa mpamba euma.”

¹⁶ Toma ta ndala tofosilela nde ndʼaisoʼakiso, onde, lʼesaza la bosalangano limʼilombe ya Nzakomba ekiso?

¹⁷ Biofo beyofonde ndʼase bʼamociʼakiyo; tolombe ta liomba tomelengana, ko bifongelo bia biofo biolumbama, ko blé eonyeela.

¹⁸ Nyama ya mbongola iyosaana! Betonga bia ngombo beyotulungane, efʼiyo la bisobe, onde, betonga bia mpate benʼelo.

¹⁹ O Yawe, nkusela we loela; eki tsa osizaka bisobe bia etekeleke, ko lombe ja tsa jotumba betamba bia lisala beuma.

²⁰ Onde, nyama ya lisala basana la lomo ele we; ele bekeli biʼasi beokasela, ko tsa tosiza bisobe bia etekeleke.