Yesaya 1 - BONKANDA WA NZAKOMBA

Yawe eza bakambo ba banto bakande

¹ Enelo eki Yesaya bona owa jende owa Amosa, ekiʼndʼenaka ndʼeloko ea Yuda la Yelusalema ndʼembile bia Uziya, la Yotama, la Aza, la Izikiya, rois ya Yuda.

² O mbola, lokoza, o bokili, umba litoi, eki Yawe otefelaka: “Emi mpongaki bana, ko ndaongolaki, ko iyo baotendola botendo.

³ Ngombo aolea nkolo ekae, ko mpunda aolea sanduku ea nkolo ekae ela nyama toma: lolo Yisalaele afea, bantoʼakami bafokanela.”

⁴ O ese ea baoyiʼobe, banto bakama la bobe, bana bʼakeli bʼobe, bana bayokele baoyi ba linyamo: iyo baosundola Yawe, baotengwela Owa Boeko owa Yisalaele, baokengwana ko baolututa.

⁵ Losisozama lenkina lae? Lifotendolʼotendo o ntendola ntendola: botsʼouma woka nkangi, ko botemʼouma bokatswa.

⁶ Lima ntanda ea likaka elaka nko ntamba ea botsa, nkʼekemo eko nye, lolonde mpota la weso wʼalongo la mpota indoza cina, itakoka, itaombama, ko itatekyama lʼauta.

⁷ Ese ekinyo eocikala la bolalengo, benanga bekinyo beotumbama la tsa; bafaya baofonolʼinyo ese ekinyo nda joso likinyo, eko ele lʼolalengo o nga eolumbama la bafaya.

⁸ Bonʼowʼomoto owa Siona aciki ngole esasa nda lisala ja bekoli bia vina, ngole esele nda lisala ja concombres, ngole bonanga bondengama lʼaunyi.

⁹ Lako Yawe ea beloi otocikelakʼiso ncika eʼisisi, siki toyalema ngoki Sodomo, la ngoki Amola.

¹⁰ Inyo, chefs ya Sodomo, lokoza joi ja Yawe: lumbʼatoi ndʼesekyelo ea Nzakomba ekiso, inyo banto ba Amola.

¹¹ Yawe akela, “Ncina elekyʼinyo bouke wa mbeka elʼemi na? Emi njokinda la mbeka ya ntatumba ya mpate yʼaende, ko la bauta ba nyama ikiʼnyʼoleyaka toma: emi mpokʼesengo ndʼewelʼea balongo ba ngombo yʼaende la bana ba mpate, la nta yʼaende.

¹² “Ayʼinyo jenya nda joso likami, osisakʼinyo wae lomatela loanza lokami jʼanza na?

¹³ Taloyelake lenkina mbeka ya ndengola; baimi ba mpimbo ba ntatumba bale linyamo elʼemi: nsonge yʼaeyoko, la sabata, lʼetelo ea bitakano: mpokuseya baoyi bʼobe lʼetakano ea boeko bolongo.

¹⁴ Bolimoʼokami botona nsonge ikinyo yʼaeyoko, ko la bilambo bikinyo bisisama: bale nkʼitungya elʼemi; njokʼompele la ndiikʼeʼotema lʼako.

¹⁵ Asembolʼinyo bakataʼakinyo njifokukʼaisoʼakami limʼelʼinyo; o nde, aondʼinyo beondo beuke; mpaokoza nye; bakatʼakinyo baokama lʼalongo.

¹⁶ Loyasolʼinyo mongo, loyafetolʼinyo mongo; limola bobe wa beketo bekinyo limʼaiso bakami; lambya lokelaka baoyiʼobe,

¹⁷ lekela lokela baoyi bʼolotsi; lasa liongi, lelolʼiyʼatukama lotuko, lotenela biciki bakambo, losambela bituka bakambo.”

¹⁸ Yawe akela, “Loyaka fele, tosole baoyi; mpeka la baoyiʼobe bakinyo bale nga ngola bifoyalema fe ngole boyeyenge; nga bale ngola ngʼalongo, bifoyalema nga nkunza ya mpate.

¹⁹ Nga lolanga wango wa ci, ko lofika lifiki jʼimeezo, lifola toma tʼolotsi tʼese:

²⁰ lolonde nga lofeza, ko lotendola botendo, lifosizama lʼifaka yʼetumba”: eki bomwa wa Yawe otefelaka joi liko.

²¹ Bonanga wa boakakalo boyalema bomoto owa linsamba ngamo, wae ende okamaki la liongi! Liongi liyalemaki elʼende, lolo aeyoko baomi bʼanto.

²² Argent eke eoyalema nkwa ea lotulo, vina eke eosangana lʼasi.

²³ Chefs ike bayotendolʼotendo, bale beseka bia baiyi: wengiʼonto alangaka nyongo, ko akimanaka la nkito: iyo bafolongya bakambo ba bicike, koko likambo jʼomoto owʼetuka lifokitʼelʼiyo.

²⁴ Ndʼewelʼeko Yawe, Yawe ea beloi, ende oleki mpamba nda Yisalaele, akela, “Njifitanya basukiʼakami limʼelʼemi, ko njifosombola nkele ele bainiʼakami.

²⁵ Njifokosuka la likata likami, ko mpetole nkwa eke ea lotulo o mpetola mongo, ko ndimole lifwe like liuma.

²⁶ Njifuteya juges ike ngoki joso, ko la baangiʼake ba wango ngoki ndʼiango: ndʼafeka wifotangema bonanga wa liongi, bonanga wa boakakalo.”

²⁷ Siona ifosikwa la liongi, ko bakae bandoututala bifosikwa la liongi ngoko.

²⁸ Ko efitanelo ea batendoli la bantʼobe ifiela bolongo, ko iyʼasundola Yawe bifosizama.

²⁹ Ndʼewela wae iyo bifoka betamba bia bekungu belangʼinyo nsoi, ko inyo lifungusana lʼasala bakiʼnyʼosonaka.

³⁰ Inyo lifoyalema ngole botamba wa bokungu bonyeela lokasa, ko ngole lisala lisambʼasi.

³¹ Ko owa mpamba ifoyalema ngole linyuku, ko bosalʼokande wifoyalema ngole losasi; iyʼakʼafe bifotumbama locwela, nkʼondafofya.