Yelemaya 1 - BONKANDA WA NZAKOMBA

Esonelo ea boteli

¹ Baoyi ba Yelemaya bona owa Ilikiya, owa nkanga iki nda Anatota ndʼese ea Benyamina:

² Joi ja Yawe liyaki elʼende ndʼembile bia Yosiya bona owa Amona, roi ea Yuda, nda mbula ea mpifo ekande ea jom lʼisato.

³ Koko liyaki ndʼembile bia Yoyakima bona owa Yosiya, roi ea Yuda, elaka nko nsukela ea mbula ea jom lʼemoko eki Sedekiya bona owa Yosiya, roi ea Yuda: elaka nkʼekafelo eki Yelusalema okafemaka nda lokafo nda nsanza eʼitano.

⁴ Joi ja Yawe joyʼelʼemi, aokela,

⁵ “Atafʼemʼokoonda nda likunju, nkeaki; ko atafa wʼola lima likunju, nkoekyaki boeko: njokila we boteli ele beoci.”

⁶ Nkako njokela, “Nkolo Yawe oyei! Bala, emi mpotefeleya: elʼemi bonolu.”

⁷ Lolonde Yawe aonkela, “Tokelake, Emi nde bonolu; ele bonto nko loswele o emʼokotomela lotomo, wifocwa elʼende; ko joi nko loswele likosisʼemi, wifotefela liko.

⁸ Toangake ndʼewela ekiyo; elʼemi njala la we wae nkelole njelola. Yawe aokela ngoko.”

⁹ Limʼako Yawe aosembya likata likande, ko aofomwa bomwaʼokami; koko Yawe aonkela, “Bala! Njolila baoyiʼakami ndʼomwaʼoke.

¹⁰ Lenda, njokila mbilʼene nda mpifo ele beoci ko la bakulaka wete oluole, ko oole, ko ofite, ko wumbe: ko otonge ko wone.”

¹¹ Koko joi ja Yawe joyʼelʼemi, aokela, “Yelemaya, Joi lindena we na?” Njokela, “Njolena nganza ea botamba wa amande.”

¹² Nkako Yawe aonkela, “Olenʼolotsi! Elʼemi ndesanya joi likami wae nkele liko.”

¹³ Koko joi ja Yawe joyʼelʼemi boyawʼefe, aokela, “Joi lindena we na?” Njokela, “Njena mpoke efela: ko eko eolenya lima nord.”

¹⁴ Limʼako Yawe aonkela, “Bobe wifola lima nord ele bantʼauma bʼese ene.

¹⁵ Yawe akela, Bala, emi njifeta tolongo touma ta bakulaka ba nord; ko iyo bifoya, ko wengiʼontʼokiyo ifemya ngwende ekae ea roi ndʼotswelo ea biiso bia Yelusalema, ndongama la lobalaka jʼeko kio samanyu, la ndongama la benanga beuma bia Yuda.

¹⁶ Ko njifotefela lʼiyo ndʼewela ea bitenelo bikami biʼakambo la ncina ea bobe bokiyo bouma: wete iyo baonsundolʼemi, ko baotumbela nzakomba imo baimi, ko baomemya belemo biʼakata bakiyo mongo.

¹⁷ Ndʼewelʼeko, we lembʼombembe, emala, ko tefela lʼiyo baoyi bauma bakosisʼemi. Toangakʼiyo, nyangʼemi mpokokyʼofolu nda joso likiyo.

¹⁸ Bala, emi njokila we mbilʼene bonanga wa mbalaka, ko la likonji ja loolo, ko la mbalaka ya konga ndʼese eko euma wae osuke rois ya Yuda, ko osuke chefs yʼeko, ko osuke nkanga yʼeko, ko osuke banto bʼese eko.

¹⁹ Ko iyo bifouna la we; lolo bafaokumba: elʼemi la we wete nkelole. Yawe aokela ngoko.”