Yakobo 1 - BONKANDA WA NZAKOMBA

¹ Yakobo, bokwala owa Nzakomba lʼowa Nkolo Yesu Masiya, ele beloi jom lʼefe ndʼefalanganelo, beseso elʼinyo.

Bo-Masiya asalangana nda lomeko

² Balongoʼakami, aʼinyʼokumana la mmeko ya bilenge la bilenge, lotanga baoyiʼako nkʼosalangano;

³ elʼinyo lea wae lomeko jʼimeezo ekinyo jieza ikelo eʼotema.

⁴ Ko kela ikelo eʼotema ekambe bolemo wʼeko bouma, wae inyo lelame kolongo, ko loyale banto bakoka, bafokutswa joi limoko nye.

⁵ Lolo ngʼomo okinyo asamba wanya, kela uole boko limʼele Nzakomba, ende okayaka bantʼauma limʼotema, ko ntafelaka lofeli, ko boko wifokaema elʼende.

⁶ Lolo kela uole lʼimeezo, nko nkakaana, elʼontʼokakaana, asongi la mpombe ya lieke jʼokwa, ifukyama lʼompompo, ko icinzania lʼoko.

⁷ Bontʼoko atakanelake wae ifamba yomba limʼele Nkolo;

⁸ ale bontʼowa nkai ife, onanonga ndʼaoyiʼakae bauma.

⁹ Kela lilongo osotsama akumyʼekumya nda mpifo esangwʼende.

¹⁰ Lolo kela boaci akumyʼekumya ndʼesotselo ekande, elʼende ifimana ngole lobya jʼailo.

¹¹ Ele jefa jokya la wane mongo wa ngangala, ko jonyeeza bailo, ko lobya jʼako jokwa, ko lituka ja loko jofitana; nkʼelengʼeko boaci ifofitana ndʼelemo bekae.

Nzakomba afomeke la bobe

¹² Bontʼondikʼotema nda lomeko ale lʼosalangano, elʼende, aʼendʼolonga nda lomeko, ifamba likuka ja loiko liki Nkolo ocikelakʼiyʼandokʼende eefe elaka.

¹³ Amekama bonto lomeko, atasangake wae, Mmekama la Nzakomba; ele Nzakomba atamekamaka lʼobe, ko ende afomeke bonto lʼobe nye.

¹⁴ Lolo wengiʼonto aomekama aʼendʼobelama la mposa ekae mongo, ko aolongama jongo la mposa eko.

¹⁵ Ko ae mposʼeko ofoswa jemi, eota joi jʼobe, ko ae joi jʼobe osekwa lisekwa, liko liotʼiwa.

¹⁶ Talofombamake, balongoʼakami balangema.

¹⁷ Wengi ekaelo eʼolotsi la wengi nganji endelama kolongo ele limʼaliko, eyokitele limʼele Ise ea bafole bauma. Ende afa lʼecikwanelo, ko afa la lililingi likelama la nkengwana.

¹⁸ La wango bokae aotoota la joi ja nsosolo, wae toyaleme bamuka ba joso ba bako bakiʼndʼemaka.

Ememyelo ea Nzakomba ea nsosolo

¹⁹ Lofongʼokotola joi line, balongo bakami balangema. Lolo kela wengiʼonto oke nkaola, ay ale la lokuto nda ntefela, ko la lokuto nda njooka ea nkele;

²⁰ ele nkele eʼonto efieza liongi ja Nzakomba.

²¹ Ndʼewelʼeko, limolaka linyamo liuma, ko la bofula wa jongo jʼobe, ko lambaka la linsimi joi lindonama elʼinyo ko liikyeya belimo bekinyo.

²² Lolo loyalema bakeli ba joi, afa baoki kika, bandaungusanya iyo mongo.

²³ Ele nga bonto ale woki owa joi, ko afa bokeli owa liko, asongi lʼonto oyoteemeza elongi ekae nda talatala.

²⁴ Alendʼende mongo, ko akenda, ko nkakoyoko aolofela elenge ekiʼnde.

²⁵ Lolo bonto ondengela esekyelo endelama kolongo o njengela mongo, wete esekyelo eʼesikwelo, ko ociniana loncinji ndʼeko, ko afoyaleme woki ondofela, lolo bokeli okambʼolemo, bontʼone ifokemʼekemo ndʼekambelo ekae.

²⁶ Ayaka bonto nko loswele akanela wae ale bomemyi owa Nzakomba, ko afosuke loleum lokae, lolo afomba botema bokande mongo, ememyelo eʼontʼoko ele o mpampa.

²⁷ Ememyelo ea feto, esamba lianda nda joso ja Nzakomba Ise, ele elengʼene; ndesanya ea biciki la bituka nda bielo bikiyo, ko la mpafonga eʼomongo nko lianda limʼaoyi bʼokili.