Tito 1 - BONKANDA WA NZAKOMBA

¹ Paulo, bokwala owa Nzakomba, lʼekima ea Yesu Masiya, elengʼele imeezo ea basonami ba Nzakomba, la njea ea nsosolo elengʼele mmamemya ea Nzakomba,

² nda lolendezo ja loiko lotasilaka, loki Nzakomba, otafombaka, ocikakʼelaka nda joso ja bikeke biuma:

³ lolo nda bikeke bikae mongo aoleneya Joi likande fole, nda nsango eʼolotsi ekitsamaki elʼemi elengʼele bo-sise wa Nzakomba, Boikyi okiso;

⁴ ele Tito, bona okami owa nsosolo ndʼimeezo ekisʼauma. Boya la kuci limʼele Nzakomba Ise la Masiya Yesu, Boikyi okiso.

Esonelo ea bampaka ba ekelesia

⁵ Nkocikaki we nda Kulete ndʼewelʼene, wae oongya baoyi baciki, ko wile bampaka bʼekelesia nda wengi bonanga elenge ekiʼmʼokolakaka:

⁶ ayaka bonto afa la likambo ja lofeli, ale bome owa waji omoko, ko ale la bana bandimeza bafoandema ndʼakambo ba jenge jʼobe la botendo.

⁷ Eji wae wesanyi ayaleme bonto ofa la likambo ja lofeli ngole bofongi owa Nzakomba, ofa bompokatoi, ofoke nkele nkaola, otalangwaka la vina, ofokundʼanto, ofoke nkito ea linyamo mposa,

⁸ lolo ayaakʼanto boya, bolangi owʼolotsi, ole la lokai ja wanya, otenakʼakambo ci, bonto owa boeko, bonto owa bonkomete;

⁹ okatemela Joi ja nsosolo lile elengʼele lilako, wae akuseya lokemyʼanto nda lilako lionga, ko alomolʼiyʼandikya bikoji.

Loalaka bafombi bʼimeezo

¹⁰ Ncina wete bamʼantʼauke bale ba botendo, batefela baoyi basamba ncina, ko bale bafombi bʼanto, baleki wete bako batenama nsonge,

¹¹ eji wae bemwa bekiyo beumbame; iyo bungusanya beoci beuma bia banto balaka baoyi bafeji ndʼewela ea nkito ea linyamo.

¹² Omo okiyo, boteli okiyo mongo, aokela, Ba-Kulete bale bafombi bʼampulu bikeke biuma; nyama yʼobe; balei ba toma ta mponye.

¹³ Temoin ene wae nsosolo. Ndʼewelʼene, wʼafele la bolo mongo, wete bakeme ndʼimeezo,

¹⁴ ko bafokoza bekolo bia Ba-Yuda, la besise biʼanto baututala nsosolo.

¹⁵ Baoyiʼauma bale feto ele banto ba feto; lolo nko joi limoko lile feto elʼanto ba linyamo Telʼiyʼafimeza; lolo lokai lokiyo la juge eʼotema ekiyo baofitana la linyamo.

¹⁶ Iyo bakela wae bea Nzakomba; lolo baoloangana lʼeketo bekiyo, bale banto ba linyamo mongo, la ba botendo ko nda wengi bolemo wʼolotsi iyo bumbama nda lomeko.