Olelo 1 - BONKANDA WA NZAKOMBA

Elo ea Ba-Yisalaele nda Ejipeto

¹ Bane wae baina ba bana ba Yisalaele bʼaende bayaki ndʼEjipeto; wengiʼonto lʼoociʼokae bayaki la Yakoba,

² wete Lubena, la Simona, la Lewi, la Yuda;

³ la Yisasafeala, la Zebulona, la Benyamina;

⁴ la Dana la Napatali, la Ngada la Asela.

⁵ Banto bauma baotswaki limʼotema wa Yakoba baki wae banto ntuku nsambo: ko Yosefa aki ndʼEjipeto nda joso.

⁶ Ko Yosefa awaki, ende la batomoloʼakae lʼokune okae, ko la eotswelo eko euma.

⁷ Koko bana ba Yisalaele baootʼana bauke, baofula bauke mongo o linyenga jʼanto; ko baokaka la mpamba: ko ese eko eofunzwa lʼiyo.

⁸ Koko roi emo eʼaeyoko akitanaki ndʼEjipeto, oteaki Yosefa.

⁹ Ende aokelʼantoʼakae, “Bala, banto ba bana ba Yisalaele baotolekolʼiso lʼauke, ko la mpamba:

¹⁰ loyaka, kelʼiso takeele joi ja wanya; nyango bafofula, ko asi etumba iela, bafoamana lʼaini bakiso, ko baotounya, ko balote limʼeseʼene lʼoloci.”

¹¹ Ndʼewelʼeko baolilela bana ba Yisalaele bakapita osisozʼiyo lʼesala bia bolo. Baotongela Falo benanga beombʼende toma, wete Pitona la Lamasese.

¹² Lolo aki nsisoza ofulaka iyo baokongʼofunzola ngoko. Ko Ba-Ejipeto baoanga bana ba Yisalaele.

¹³ Batukaki bana ba Yisalaele la lotuko mongo:

¹⁴ baolaeneyʼelo la jombo la lotuko mongo, ndʼemolu, nda briques, ko besala bia nko loswele nda lisala; besala beuma bekiʼyʼasaelaka beki wae la lotuko mongo.

¹⁵ Ko roi ea Ejipeto atefelaki la baoci ba bamato ba Ba-Ebele, lina ja booci omo wae Sipela, ko lina jʼomo wae Fwa:

¹⁶ akela, “Akambyʼinyo bomoto owa Ba-Ebele ndʼeotelo eʼona, ko lolena wae aolonola lono wae aotʼona; nga bona ale jende, loome; lolonde nga bona ale bomoto, kelʼendʼaike.”

¹⁷ Lolo baoci baangaki Nzakomba, ko ntabakela ngoki roi ea Ejipeto oasisaka, lolo baikyaki bana bʼaende.

¹⁸ Koko roi ea Ejipeto aoleta baoci, ko aolakela, “Lokela joi line ncina na? Loikya bana bʼaende ende lae?”

¹⁹ Baoci baokela Falo, “Ncina wae bamato ba Ba-Ebele bafa ngole bamato ba Ba-Ejipeto; elʼiyo la nkaso ko baosilʼoota bona atafa booci oyʼelʼiyo.”

²⁰ Ko Nzakomba akeelaki baoci bolotsi: ko bantʼako baofula, ko baokaka la mpamba mongo.

²¹ Ko Nzakomba aosakela tolongo tokiyo bokako wa swa, ekiʼyʼoangaka Nzakomba.

²² Ko Falo asisaki bantoʼakae bauma, akela, “Wengi bona owa jende ootswa, louse nda ntando; lolo loikya wengi bona owa bomoto.”