Obadiya 1 - BONKANDA WA NZAKOMBA

¹ Enelo ea Obadiya. Nkolo Yawe akela ngone ndʼewelʼea Edome: Tolokʼosako limʼele Yawe, ko ekima aotomama ndʼetei ea beoci, akela, “Lemala! Kelʼiso temale toune lʼende etumba!”

² Bala, njokosotsa we ndʼetei ea beoci: otengwama bouke.

³ Eloloko eʼotema boke eokofomba, oyala nda ntoka yʼekenje, boyalʼoke bole ndʼaliko: okela ndʼotemʼoke: Osʼonkitezʼemi ndʼase ndʼamoci na?

⁴ Yawe akela, Mpeka la olulela ndʼaliko ngole mpongo, ko wila jumbu like nda ntoku ea tooci, njifokokiteza limʼeko.

⁵ Nga baiyi bayakʼele we, nga bafunji lʼotso (ofitana mo) sikʼiyo ntabiyaka elaka nko toma tokoka lʼiyo nde? Nga bamuki ba vina bayaki ele we, siki ntabakocikelaki vina imo ya mbosi nde?

⁶ Esau aofunzama mo! Liaci likande lindisama jolasema mo!

⁷ Baende bauma bale la we ndʼeambya bakocindeza o ndʼolelo: banto baki ndʼoseka la we baokonga jongo ko baokumba; iyʼaleka mampa ike baolefa ilonga ndʼase bakawe: nko nkotola elʼende nye.

⁸ Yawe akela, La nda mbilʼeko mpaofita baende ba wanya lima Edome, ko la nkotola lima ngongo ea Esau?

⁹ O Temana, baende bake ba mpamba ndʼetumba bifokwa lintanta la ncina wae iyʼauma baomelengana lima ngongo ea Esau o lʼeomelo.

¹⁰ Nsoi ifokokuka ndʼewelʼea lofundo loki wʼofundaka bokune oke Yakoba, ko wifomelengana seko.

¹¹ Nda mbilʼekoeki wʼokemi nda wijʼomo, nda mbilʼeki bafaya otombaka baumbʼakande, ko bafaya botswaki nda biiso bekande, busaki ntaza ndʼeloko ea Yelusalema, we mongo oki ngʼomo okiyo.

¹² Tolendake mbile ea eoto eke nda mbile ea bokamboʼokande, ko tokakʼekemo ndʼewelʼea bana ba Yuda nda mbile ea emelengano ekiyo: ko totefelake lʼeloloko nda mbile eʼelo.

¹³ Totswake nda wiso wa bantʼakami nda mbile ea empenda ekiyo: o nde toalelake elo ekiyo nda mbile ea empenda ekiyo, tokitake liaci likiyo lʼakatʼake nda mbile ea empenda ekiyo.

¹⁴ Ko temalake ndʼaatano wae oomʼanto bakae balota; ko tolekyake bantʼakae bakociki nda mbile ea elo.

¹⁵ Ele mbile ea Yawe etutsi la beoci beuma: baoyi bifokelama ele we ngoki wʼokelaka; beketo beke bifuta ndʼotsa boke mongo.

¹⁶ Beoci beuma bifomela nko jomo ngoki wʼomelaka nda ngongo ekami ea ntale ea boeko, o nde, iyo bifomela, bifokiteza ndʼotema, ko bifoyalema nga ntabaki eko.

¹⁷ Lolo iyʼalota bifoyala nda ngongo ea Siona, ko eko ifoyala boeko; ko ilongo ya Yakoba bifoata liaci likiyo mongo.

¹⁸ Ko ilongo ya Yakoba ifoyalema tsa, ko ilongo ya Yosefa o lombe ja tsa, ko ilongo ya Esau wae bailo, bifoambwa ndʼetei ekiyo, bifosizʼako; nko bosi ilongo ya Esau ociki life; eki Yawe otefelaka joi liko.

¹⁹ Banto ba sud bifoata ngongo ea Esau: ko basi loambya aki Ba-Pelesete: ko bifoata lisala ja Efulaima, ko la lisala ja Samalia: ko Benyamina ifoata Ngilada.

²⁰ Ko ba-lokafo ja boloiʼone wa bana ba Yisalaele bale ndʼetei ea Ba-Kanana, iyo bifofetsʼeko kita nko Salefata: ko ba-lokafo ba Yelusalema bale nda Sefalada bifoata benanga bia sud.

²¹ Ko baeloli bifoya nda ngongo ea Siona osambʼakambo ba ngongo ea Esau; ko likulaka lifoyalema ja Yawe.