Nsau 1 - BONKANDA WA NZAKOMBA

¹ Nsau ya Solomo, bona owa Dawidi, roi ea Yisalaele.

² Wae lea wanya la lilako; Lokotola baoyi ba njea;

³ Lamba lilako ja ekeelo ea wanya, La momo la liongi la baoyi bandeji;

⁴ Loatelʼiyo batekele nkoto, Jeanya bosekota njea la woso wʼaoyi:

⁵ Wae bonto owa wanya oke, ko afuza njea ea baoyi; Ko bonto owa jekela akite nda biango bia wanya;

⁶ Jekela nsau, ko lʼesonganya; Baoyi bʼanto ba wanya, ko la bitefeelo bikiyo bindisi.

⁷ Boangi wa Yawe bole iango ya njea: Lolonde belole batengwela wanya la lilako.

⁸ Bona okami, okoza lilako jʼise eke, Ko tosundolake lilako ja nyango eke;

⁹ Ele bako bifoyalema likuka jʼoya ndʼotsaʼoke: Ko la biamwa biʼekombe nda nkingo eke.

¹⁰ Bona okami, nkina bantʼobe bakonga jongo, Timezake.

¹¹ Nkina bakela, “Yaka lʼiso, Kela tocwʼiyoko ndʼewela ea balongo. Kela tisamele batakelakʼobe nko ncina:

¹² Kela tamele mmamela nkʼaikʼiyo nga Seola, O lʼonkunju, elengʼelʼiyo bakitela nda lifoku;

¹³ Tifotana belemo beuma bia wiko, Tifoyoza tolombe tokiso lʼaumba bʼefunjo.

¹⁴ Kela oamana lʼiso eambya; Mpanga toate efongelo eʼaumba nkʼemoko isanga.”

¹⁵ Bona okami, tokendake lʼiyo nda mboka; Imola likaka like lima mboka ekiyo:

¹⁶ Ele bakakaʼakiyo bayikumwa ndʼobe, Ko bakaola wae buteza balongo.

¹⁷ Nsosolo, bafekyʼifulu lʼiteko o mpampa, Akolendʼiko:

¹⁸ Sikʼiyo bacwelʼalongoʼakiyo mongo iyoko, Bisamela loiko lokiyo mongo.

¹⁹ Baoyi bandiela wengiʼonto okombola nkito efeji bale nkʼelengʼeko; Bako bafonolaka bamongʼako loiko

²⁰ Wanya ayuse loela ndʼolongo; Asangya lofoso lokae nda bisombe;

²¹ Abeleza ndʼotswelo ea belongo betongolʼanto; Ndʼotswelo ea biiso; Ayotefelʼaoyi ndʼonanga, akela,

²² “Inyo belole, lolangʼaoyi bʼolole elingi na? Ko ba losengo bokʼesaza, Ko belole bina njea jino elingi na?

²³ Loututala la lofeli lokami; Bala, njifuteza bolimoʼokami elʼinyo, Njifeanyʼinyo baoyiʼakami.

²⁴ Ekiʼmʼusaka loela, ko inyo lonjokamelaki; Nsembolaki likata likami, ko nkʼonto oalaki;

²⁵ Lolonde inyo lotonaki wangoʼokami, Ko ntalolanga lofeli lokami;

²⁶ Emi njifoseka tola nda mbile ea elo ekinyo; Ae boangi okinyo oya, njifokolʼinyo njokola.

²⁷ Ae boomaʼokinyo oya nga bompompo; Ko lofito lokinyo loya ngʼefeele; Ae botatengo lʼeefe oyʼelʼinyo.

²⁸ Ndʼekekʼeko, iyo bifonduselʼemi loela, lolo mpaamba; Bifondasa la loncinji, lolo bafaontana;

²⁹ Ndʼewelʼekiʼyʼinaka njea, Ko ntabasona boangi wa Yawe;

³⁰ Ntabalanga wangoʼokami nye; Ko batengwelaki lofeli lokami louma;

³¹ Ndʼewelʼeko bifola bamuka ba beketo bekiyo mongo, Ko bakinde mbimbi la biango bekiyo mongo.

³² Ele bonjengo wa bolole wifolooma, Ko emengelo eʼotema eʼelole ifafita.

³³ Lolo ende ondokozʼemi ifoyalema la kuci, Ko ayale wai limʼoangi wa bobe.”