Nemaya 1 - BONKANDA WA NZAKOMBA

Boondo wa Nemaya ndʼeloko ea bana ba Yisalaele

¹ Baoyi ba Nemaya, bona owa Akalaya. Nda nsanza ea Kisileu, nda mbula ea ntukʼife, akiʼmi nda Susana ndʼelolombe ea roi,

² wete eoto ekami emo, Anani, aoya lima Yuda, ende lʼantʼamo; ko ndauolaki ndʼewela ea Ba-Yuda balotaki, bakociki lima lokafo, ko ndʼewela ea Yelusalema.

³ Koko iyo baonsangela, “Ncika eʼanto eciki lima lokafo ndʼese eko baolenʼelo mongo la lotango: ko lobalaka ja Yelusalema lounya, ko bikuke bia loko biolongola la tsa.”

⁴ Akiʼmʼokaka baoyiʼane, nkitakʼase, ndelaki la mpisali, ko ndelaki bembile bemo: ko nkilaki toma ta ndala, ko njoonda nda joso ja Nzakomba ea loola, njokela,

⁵ “O Yawe, Nzakomba ea loola, Nzakomba eʼenene lʼea booma, oyofongʼelembelo eʼokolo lʼisei lʼiyʼandokʼende eefe ko bafonga besise bekande;

⁶ umba litoi like, ko lifolʼaisoʼake aeyoko, wae wokoza boondo wʼosali boke bokoondʼemi ndʼekekʼene, la mbile lʼotso, ndʼeloko ea bana ba Yisalaele basali bake, e emʼieza baoyiʼobe ba bana ba Yisalaele, bakiʼsʼokokeelaka we: onde, emi lʼilongo ya ise ekami tokelakʼobe.

⁷ Tokokeelaki baoyiʼobe mongo, ko ntatofonga besise lʼeleka la bisekyelo biki wʼosisaka bosali oke Mose.

⁸ Nkoonda, wofwa joi liki wʼosisaka bosali oke Mose, okelaki, Ngʼinyo lokelʼobe, emi njifofanzolʼinyo nda ntoku eʼanto:

⁹ lolo nga londutelʼemi, ko lofonga besiseʼekami ko lokela beko, wambene bantʼakinyo bandozama baokita nda nsuko mongo ea loola, emi njifatakanya limʼeko, ko njifayela ndʼitenela ikiʼmʼosonaka wae ndile lina likami eko.

¹⁰ Bane bale basaliʼake, lʼantoʼake bakiʼwʼosikolaka la mpamba eke ea ndekola, o la likata like ja bolo.

¹¹ O Nkolo, nkoonda, kela litoi like jokoza boondo wʼosali oke, la boondo wʼasaliʼakawe bandokʼesengo wete baange lina like: ko nkoonda, Bongya bosali oke mbilʼene, ko wookanyʼisei ndʼaiso ba bontʼone.” Nki bosali owa mesa owa roi.