Mika 1 - BONKANDA WA NZAKOMBA

Biano bia Yawe ele Yisalaele la Yuda

¹ Joi ja Yawe liyaki ele Mika bosi Molasa ndʼembile beki Yotama, la Aza, la Izikiya rois ya Yuda, likiʼndʼenaka ndʼewela ea Samalia la Yelusalema.

² Inyʼanto, loka, inyʼauma; O bokili okoza, ko la bauma bale ndʼoko: ko kela Nkolo Yawe ayale temoin osukʼinyo wae Yawe lima Tempelo ekande ea boeko.

³ Bala, Yawe ayoya limʼitenela ikande, ifokitela, ko umbe biiji bia lisange biʼokili la mmatela.

⁴ Ko ngongo ya ntale ifolangwa ndʼaseʼakande, ko befoku bifatsa ngole baangasa nda joso ja tsa, ngole basi bandutezama nda wiji wa likiliongo.

⁵ Baoyiʼane bauma o ndʼewela ea bosesengano wa Yakoba, ko ndʼewela ea baoyiʼobe ba ilombe ya Yisalaele. Bosesengano wa Yakoba na? Afa Samalia nde? Ko biiji bia lisange bia Yuda na? Befa Yelusalema nde?

⁶ Ndʼewelʼeko njifila Samalia ngole botole wa lisala, ko ngole itenela ja njoona ea bekoli bia vina: ko njifuteza bikenje biʼoko ocinza biko nda bofoku, ko njifokukola baango bʼase bʼeko.

⁷ Ko bifoya bia nsasenga bikande biuma bifooza beozʼeoza, ko befuto bekae beuma bifotumbama la tsa, ko njifomelenganya baidola bakande bauma; ekiʼndʼotakanyakʼako la nyongo ea bomoto owa lirisamba, ko bifuta nda nyongo ea bomoto owa linsamba.

⁸ Ndʼewelʼene njifolela ko ndule nkimo, njifokenda la bito ndotola la botaka: njifula nkimo ngole mbeo, ko la lilelo ngole autruches.

⁹ Ele mpota ikae itaikyamaka, eoya o nda Yuda: eokita nda wiso wʼantoʼakami, o nda Yelusalema.

¹⁰ Tosangake joi liko nda Ngata, tolelake nye; kalimwa nda biucu nda Bete-le-Apula.

¹¹ Obosi Safila, imana la botaka la nsoi; oyala nda Sanana ntolaki; Betesele wae itenela ya lilelo, efaokokambya.

¹² Ele bosi Malota ayolendeza bolotsi la bokakaano: ndʼewela ea joi jʼobe jokitela limʼele Yawe o nda wiso wa Yelusalema.

¹³ O bosi Lakisa, lemba cheval ea loangu ndʼetombelo eʼetumba; aki wae iango ya joi jʼobe ele bona owa Siona owʼomoto: eki besesengano bia Yisalaele otanemaka ele we.

¹⁴ Ndʼewelʼeko wifokaya Molesete-Ngata nganji ea bosise: tolombe ta Akiziba tifoyalema joi ja jongo ele rois ya Yisalaele.

¹⁵ Emi njifoyela ele we, bosi Malesa, ende osokoata: jilangi ja Yisalaele lifokita nda Adulama.

¹⁶ Kela oyakeela we mongo limenga, koolʼotsaʼoke ndʼewela ea bana bʼesengo eke: fuza limenga like liyale ngole losanza ekiʼyʼocwaka nda jombo limʼele we.