Malaki 1 - BONKANDA WA NZAKOMBA

Bosamba wa lokango wa banto, ko lofeli ele nkanga

¹ Joi ja Yawe ele Yisalaele lʼomwa wa Malaki.

² Yawe akela, Njolokʼinyo eefe. Lolondʼinyo lokela, Otokʼiso eefe nko? Yawe akela, LʼEsau afʼeoto ea Yakoba nde? lolo ndokaki Yakoba eefe,

³ ko ntonaki Esau, ndilaki ngongo ikae ya ntale bolalengo, ko nkaaki njowa yʼokonda lisango likae.

⁴ Ambene Edome akela, Iso tolumbama; lolo tifutʼotonga biiji bemelengai: Yawe ea beloi akela ngone, Iyo bifotonga, lolo emi njifumba ndʼase: ko banto bifatanga, Bolelo wa bobe, ko la Banto baki Yawe okelaka nkele seko.

⁵ Baisoʼakinyo bifena, ko inyo lifokela, Yawe afikame lifiki wijʼolelo wa Yisalaele.

⁶ Bona owa jende afikakʼise, ko bosali afikaka nkolo. Yawe ea beloi akelʼinyo nkanga batengwela lina likami, Ngʼemi nde Ise, lifiki likami lile nko? nga nde nkolo, boangiʼokami bole nko? Ko inyo lokela, Iso totengwela lina like nko?

⁷ Lolekya mampa isambʼoeko nda nkinda ekami ea mbeka. Ko lokela, Iso tokokeela bosamba wʼoeko la na? Ekelʼinyo, Mesa ea Yawe eotengwama.

⁸ Yawe ea beloi akela, Ko alekyʼinyo nyama iweiʼaiso nda mbeka, ngokʼafʼobe? Ko alekyʼinyo nyama ilemela la nkangi, ngokʼafʼobe? Kaya gouverneur eka ngoko aeyoko, lʼifokʼesengo la we? lʼifokamba nde?

⁹ Aeyoko mbondʼinyo luola Nzakomba wae atokelʼiso boya: elengʼene eoliela lʼinyo: Yawe ea beloi akela. La, ifamba omo okinyo?

¹⁰ Omo alʼekʼinyo osʼokombola bikuke, ko oambola tsa nda nkinda ekami ea mbeka nkʼofuto? Yawe ea beloi akela, Mpokʼesaza elʼinyo nye, ko mpaamba nganji limʼakataʼakinyo nye.

¹¹ Ndʼewela wae Yawe ea beloi akela, Limʼekyelo ea jefa elaka nko ilelo ea liko, lina likami jokuma ele beoci: ko nda wengi itenela baimi ba mpimbo ba ntatumba baolekyama nda lina likami, ko la mbeka ea soto: ele lina likami jokuma ele beoci.

¹² Lolondʼinyo losaola liko, ekelʼinyo, Mesa ea Yawe eofitana, ko bamuka bʼeko, wetenyama ekae, baotengwama.

¹³ Koko lokela, Bala, bompele oyei! Yawe ea beloi akela, Ko inyo losotsʼeko nsasotsa: ko loyelaki eko ekandemaki la mbauta, lʼelemelaki bolema, lʼendokaki nkangi: inyo loyela mbeka elengʼe-ko. Yawe akela, La, njambe elengʼene lima likata likinyo?

¹⁴ Lolo bofombi ole la jende ndʼotongaʼokae wa mpate, ko acikʼelaka, ko alekya eko elemela ele Yawe, ende ambeme la wambo wa tu: elʼemi nde Roi ea ka, ko lina likami lile la booma ele beoci, Yawe ea beloi akela o ngoko.