Luka 1 - BONKANDA WA NZAKOMBA

¹ Ndʼewelʼeki bantʼauke osilʼokota nsango ea baoyiʼako bakelamaki ndʼetei ekiso,

² ndʼelengʼeki baeni la basali ba Joi otokitsakʼako limʼiango;

³ ekiʼmʼokimaka la njengela ea ci baoyiʼane bauma, joi josimama bolotsi elʼemi, o ngoko, wae nkokotele baoyiʼako sembo, we Teofilo owa losimo loleki,

⁴ ndʼewela wae wea nsosolo ea baoyi baki wʼolakemaka.

Lotelo ja eotswelo ea Yoane-Wini

⁵ Ndʼembile beki Elode, Roi ea Yudea, nkanga aki eko nda likafo ja Abiya, otangemaki Zekalaya; ko waji okae aki ndʼooci wa Alona, ko lina likae liki Elisabeta.

⁶ Iyʼafe baki banto ba njelama nda joso ja Nzakomba, baokenda nda bisekyelo la besise bia Nkolo nkʼoseketano.

⁷ Lolo ntabaki lʼona, la ncinʼeki Elisabeta entole; ko iyʼakʼafe baokita bampaka mongo.

⁸ Aki Zekalaya okambaka bolemo wa nkanga nda joso ja Nzakomba ndʼelekelo ea likafo likae,

⁹ ndʼelongyelo ea ekambelo ea nkanga, ekeke eokita wae otswa nda Tempelo ea Nkolo otumba baimi.

¹⁰ Ko etukuluku euma eʼanto baondaki ndʼanza, ndʼekeke ea ntatumba ea baimi.

¹¹ Ko ekima ea Nkolo aolenya elʼende, akemi nda lo jʼelome ja nkinda eʼaimi.

¹² Aki Zekalaya enakʼende aoka-kaana, ko booma bolokwela.

¹³ Lolo ekima aolosangela, Tokake booma, Zekalaya, ele boondo boke bolokana, ko Elisabeta, waji oke, ifokootela bona, ko wifilʼende lina Yoane.

¹⁴ Ko wifoata ekemo lʼosalangano, Ko bantʼauke bifosalangana ndʼeotswelo ekande.

¹⁵ Elʼende ifoyala owa lokumo nda joso ja Nkolo. Ende afaomela basanga la balako, Ko ifokama la Bolimo wʼoeko Lima likunju ja nyango ekande,

¹⁶ Ko ende ifokengola bouke wʼana ba Yisalaele ele Nkolo, Nzakomba ekiyo.

¹⁷ Ko ende ifokenda nda joso likae nda bolimo la mpamba eʼEliya, Ifokengola betema biʼaise ele bana, Ko batendoli nkʼele wanya wa liongi Wae alongya ele Nkolo boloi wʼanto bandelama.

¹⁸ Ko Zekalaya aotefeelʼekima, akela, Emi njifea joi line ngamo, elʼemi nde engambi, ko waji aokita ekota?

¹⁹ Ko ekima aoloamba, akela, Emi nde Ngabaliele, ondemi nda joso ja Nzakomba, ko ntomamaki wae ntefele la we, ko nkosangele nsango ene eʼolotsi.

²⁰ Ko bala, wifoyala lokisi, ko ofaokusʼotefela elaka nko mbile ekelama baoyiʼane; eki we ntawimeza baoyiʼakami bacwʼoiela ndʼekeke ea bako.

²¹ Ko linyenga jʼanto baolendeza Zekalaya, ko baokamwa lʼemongi ekae nda Tempelo.

²² Akiʼndʼolaka ntakusʼotefela lʼiyo, ko iyo baokotola wae aolenʼenelo nda Tempelo. Ko aolatumya la ntaza ko aokongʼoyala lokisi.

²³ Ko aki bembile biʼekambelo ekae okokaka, aokenda ndʼolaʼokae.

²⁴ Ndʼafeka ba bembileʼeko, waji okae Elisabeta, aofoswa jemi; ko aoyaisa nsanza itano, aokela,

²⁵ Nkolo aonkeela ngone ndʼembile bekʼindʼondendaka wae andimole nsoi ndʼaiso bʼanto.

Lotelo jʼeotswelo ea Yesu

²⁶ Nda nsanza eʼotoa ekima Ngabaliele aotomama limʼele Nzakomba ndʼonanga wa Ngalilaya botangema Nazaleta,

²⁷ ele bomoto owʼonjemba owʼoeko, oki lʼelaka wae ayaleme waji owa jende otangema Yosefa, oki owa lioci ja Dawidi; ko lina jʼomotʼoko owʼonjemba liki Malia.

²⁸ Ekima eko aoya elʼende, ko aolokela, Ekemo ele we, bontʼoyaema lʼoya, Nkolo ale la we.

²⁹ Ko aokakaana bokakaano mongo la joi liko, ko aokakaza lʼelenge ea bosambelʼoko.

³⁰ Ko ekima aolotefeela, akela, Toangake Malia, ele osilʼotana boya ele Nzakomba.

³¹ Ko wifofoswa jemi, ko wifoota bona owa jende, ko wifotanga lina likae Yesu.

³² Ende ifoyala owa lokumo, ko ifotangema Bona owa Oleki ndekola. Ko Nkolo Nzakomba ifokayʼende ngwende ea Dawidi ise ekae,

³³ Ko ifoyala Roi eʼilongo va Yakoba bikeke biuma, Ko likulaka likae lifaosukela nye.

³⁴ Nkako Malia aotefeela ekima eko aokela, Joi liko lifokelama ngamo? Elʼemi mpeana la jende.

³⁵ Ko ekima aoloamba akela. Bolimo wʼoeko wifoyʼele we, Ko mpamba ea Oleki ka ifokokuka; Ndʼewelʼeko ende owʼoeko ootswa ifotangema Bona owa Nzakomba.

³⁶ Ko bala, Elisabeta, eoto eke o ngoko, aofoswa jemi ja bonʼowa jende ndʼekota ekae, ko nsanzʼene wae ea botoa elʼende otangemaki entole.

³⁷ Ele nko joi limoko lilʼeko likutswa Nzakomba wae afokeleya.

³⁸ Ko Malia aokela, Bala, emʼone bokwala owa Nkolo; joi likelamʼelʼemi ngʼotefela we. Ko ekima aolimana elʼende.

Malia aocwʼoena Elisabeta

³⁹ Ndʼembilʼeko Malia aolemala ko aocwa lʼikao ndʼokili wa ngongo, ndʼonangʼomo wa Yuda.

⁴⁰ Ko aolotswa ndʼilombe ya Zekalaya, ko aosambela Elisabeta.

⁴¹ Ko aki Elisabeta okaka bosambelo wa Malia, bona aotatamba nda likunju likae; ko Elisabeta aokamala Bolimo wʼoeko,

⁴² ko aotefela la lolaka jʼonene, aokela, Ndʼoloi wʼamato osakema lʼokako wa swa, ko bonʼowa likunju like aosakema lʼokako swa.

⁴³ Ko joi line jonjiela ngamo, wete nyango ea Nkolo ekami aoyʼelʼemi?

⁴⁴ Ele bala, aki lolaka jʼosambelo boke okitaka ndʼatoi bakami, bona aotatamba lʼosalangano nda likunju likami.

⁴⁵ Ko owʼekemo ende ondimezaki, ele baoyi batefelamaki elʼende la Nkolo bifiela ngoko.

⁴⁶ Nkako Malia aokela, Botema bokami bokumya Nkolo,

⁴⁷ Ko bolimʼokami bosalangana la Nzakomba, Boikyi okami.

⁴⁸ Elʼende aolenda bongengo wʼokwalʼokae owʼomoto; Ko bala, limʼaeyoko biotswelo biuma bifontanga owʼesaza.

⁴⁹ Elʼende owa mpamba aonkeela baoyi bʼanene, Ko lina likae lile jʼoeko,

⁵⁰ Ko isei ikae ile nkʼele biotswelo la biotswelo nkʼelʼiyʼandoangʼende boangi.

⁵¹ Aokamba belemo bia mpamba la lo lokande, Aofalanganva ba eloloko nda nkai yʼetemʼekiyo.

⁵² Aokiteza ba mpamba lima ngwende ikiyo. Ko aosangya ba bongengo sango.

⁵³ Aokinza banto ba nzala la toma tʼolotsi, Ko aolitanya baaci la bakata o mpampa.

⁵⁴ Aokambva Yisalaele, bosali okae, ko aolofwa tosei,

⁵⁵ Nkʼelengʼekiʼndʼotefelaka lʼaise bakiso, Wete Abalayama, la lioci likae, bikeke la bikeke.

⁵⁶ Ko Malia aoyala lʼElisabeta nsanza isato, nkako aoluta ndʼola bokae.

Eotswelo ea Yoane-Wini

⁵⁷ Ekeke eokoka ele Elisabeta wae aote; ko aotaki bonʼowa jende.

⁵⁸ Ko basingitana lʼende la bioto bikae baoloka wete Nkolo aofulezʼende isei ikae, ko baosalangana lʼende.

⁵⁹ Ko nda mbile ea mwambi bayaki otenʼona nsonge ko bayotangʼende Zekalaya, ngoki lina jʼise ekae.

⁶⁰ Ko nyango ekae aolamba, aokela, O nye, lolo ifotangema Yoane.

⁶¹ Ko baolokela, Lakʼeoto ekinyo etangema la lina liko mo!

⁶² Ko baokeelʼise ntaza, wete buolaki lina lilangʼende otangʼona.

⁶³ Ende aoleta bonkanda ko aokota, Lina likae lile Yoane. Ko iyʼauma baokamwa.

⁶⁴ Nkakoyoko bomwa bokae bokombwa, ko loleum lokae loakwa, ko aotefela, ayomemya Nzakomba.

⁶⁵ Ko booma bokwela basingitai lʼiyo bauma. Ko banto baotefelana ndʼaoyiʼane bauma o ndʼokili bouma wa ngongo ya Yudea.

⁶⁶ Ko bantʼauma bandokaki baofongʼaoyiʼako ndʼetema, baokela, Bonʼoko ifoyalema na? Ko likata ja Nkolo liki lʼende.

⁶⁷ Ko Zekalaya, isʼekae, aokama la Bolimo wʼoeko, ko aotela lotelo, aokela.

⁶⁸ Nkolo, Nzakomba ea Yisalaele, asakeme swa Eki ende oyaka ele banto bakande, ko aolasikola;

⁶⁹ Ko aotemaza Boikyi ndʼilombe ya Dawidi, bosali okae,

⁷⁰ Ngokiʼndʼotefelaka lʼomwa wʼateliʼakae bʼoeko lima kalakala,

⁷¹ Esikwelo limʼainiʼakiso, Ko lima likata jʼantʼauma batinʼiso jino.

⁷² Ko aolokelʼaise bakiso isei, Ko aolofwa elembelo ekae eʼokolo wʼoeko,

⁷³ Wete nsimbi ekiʼndʼosimbelak’ Abalayama, ise ekiso,

⁷⁴ Wae atoka elekelo, esikwʼiso lima likata jʼainiʼakiso, Toyosaelʼende nkʼofolu,

⁷⁵ Lʼememyelo ea momo lʼea liongi nda joso likae ndʼembilʼekiso beuma.

⁷⁶ Ko la we, bonoju, wifotangema boteli owa Oleki ndekola, Ele wifokenda nda joso ja Nkolo wae woeleza mboka ikande,

⁷⁷ Ko okaya njea ea loiko ele bantʼakande, Ndʼetungwelo lima baoyiʼobe bakiyo,

⁷⁸ Ndʼewelʼea botema wʼisei wa Nzakomba ekiso, Wae ndʼaoyiʼane ekyelo etokyelʼiso lima loola,

⁷⁹ Wae engesʼelʼiyo bakitase nda wilima la lililingi jʼiwa, Ko alongya bakakʼakiso ci nda mboka ea kuci.

⁸⁰ Ko bonoju oko aosekwa, ko aokema bolo ndʼolimo; ko aki nda bitekeleke elaka nko mbile ea enyelo ekae ele Yisalaele.