Filemona 1 - BONKANDA WA NZAKOMBA

¹ Paulo, loanga ja Masiya Yesu, la Timoteo lilongo likiso, ele Filemona olangema lʼiso ko oamana lʼiso ndʼolemo,

² la Apia nkana ekiso, la Alukipo soldat oamana lʼiso, lʼele ekelesia ele ndʼilombe ike.

³ Boya la kuci elʼinyo limʼele Nzakomba Ise ekiso, ko la Nkolo Yesu Masiya.

⁴ Nsima Nzakomba ekami boya wengiʼaefa, nkoanda nda beondo bekami,

⁵ ndoka nsango ea eefe eke ea lolango, lʼimeezo endimeza we Nkolo Yesu, ko la baboeko bauma;

⁶ mbonda wae esangano ea imeezo eke eonge nda njea ea wengi joi jʼolotsi lilʼelʼiso ndʼeloko ea Masiya.

⁷ Elʼemi nde lʼosalangano la ncicima bouke, lilongo, ndʼewela ea eefe ekawe ea lolango, ncinʼeki betema bia ba-boeko ocicimaka la we.

⁸ Ndʼewelʼeko, mpeka la nde la mpifo ele Masiya wae nkosise joi lindeji,

⁹ lolonde ndʼeloko ea eefe ea lolango, emi Paulo, mpaka mongo, ko aeyoko loanga ja Yesu Masiya,

¹⁰ nkoonda we o mbaonda ndʼeloko ea bona okami, okiʼmʼootaka ndʼonyolo bokami, wete Onesimo;

¹¹ ende ntakoatela nkito nda joso, lolondʼaeyoko aotoatela nkito, emi la we;

¹² njolouteya ende mongo, nkʼende ole nga botemaʼokami mongo.

¹³ Ndangaki wae ndosukʼende elʼemi, wete ansaele ndʼonyolo wa nsango eʼolotsi o ndʼeloko eke,

¹⁴ lolo ncilanga lokela joi limo, ekiʼmi ncoka bomwaʼoke; nyango liota likawe lifoyalema ja nkamema, lolonde ja wango boke mongo.

¹⁵ Nkinʼende akafwanaki la we fele la ncina wete wʼoate seko:

¹⁶ afa lenkina ngole bokwala, lolo ofendʼokwala, wete lilongo olangema lʼemi bouke, ko olangema la we bouke wa ndekola, la nda jonge lʼele Nkolo.

¹⁷ Ayaka wʼontangʼemi lilongo mongo, wʼoambʼende nga wʼonjambʼemi mongo.

¹⁸ Lolo ngʼende akokeelaki joi jʼobe, nkina ale lʼombale la we, onkayʼemi likambo ja baoyiʼaso;

¹⁹ emi Paulo nkota joi line la likata likami mongo, njifokosombola bako; afa wae nkofweya elenge eata we bombale lʼemi, ko bombale oko, wae we mongo.

²⁰ O nde, lilongo, kela ndoke bosalangano ndʼewelʼeke ele Nkolo; cicimya botemaʼokami ele Masiya.

²¹ Andimezʼemi wae wifondokoza, nkokotela we, elʼemi njolea wae wifo-kela baoyi bakosangelʼemi ko la ndekola.

²² Lolo onjeleza boyalo, elʼemi nde la lolendezo wae nduteyame elʼinyo ndʼewela ea beondo bekinyo.

²³ Epafula, oamana lʼemi ndʼonyolo ele Masiya Yesu akuola;

²⁴ ende la Mala-ko, la Alisitaluko, la Dema, la Luka, baamana lʼemi ndʼolemo.

²⁵ Boya wa Nkolo ekiso Yesu Masiya boyale lʼolimoʼokinyo.