Ezala 1 - BONKANDA WA NZAKOMBA

¹ Nda mbula ea joso ea Kulese, roi ea Palasa, Yawe aolila lokai ndʼotema wa Kulese, roi ea Palasa, wae joi liki Yawe otefelaka lʼomwa wa Yelemaya likelame, ko ende aolongoza bosise nda likulaka likae liuma, ko aokotʼoko ndʼonkanda, akela,

² “Kulese, roi ea Palasa, akela elengʼene; Yawe Nzakomba ea loola aonkayʼemi bakulaka bauma bʼokili; ko ende aonsisʼemi wae ndotongele ilombe nda Yelusalema, ele nda Yuda.

³ Olʼelʼinyo owʼantʼakande bauma, Yawe Nzakomba ekae ayale lʼende, ko kelʼende acwe nda Yelusalema, ele nda Yuda, wae atonge ilombe ya Yawe, Nzakomba ea Yisalaele, nda Yelusalema.

⁴ Koko bonto nko loswele owa Yisalaele ociki ndʼitenela iyalʼende, kelʼanto ba wijiʼokande bokambya la argent la wolo, la baumba la nyama, ko bokaya nganji ea ndalanga ndʼewela ea ilombe ya Yawe Nzakomba ile nda Yelusalema.”

⁵ Limʼako chefs ya tolongo ta baise ba Yuda la Benyamina baolemala, iyo la nkanga la Ba-Lewi, wete iyʼauma baki Nzakomba oetolaka lokai, wae bacwe otongʼilombe ya Yawe ile nda Yelusalema.

⁶ Ko iyʼauma basingitana lʼiyo baokemya bakataʼakiyo la bijwa bia argent la wolo, lʼelemo, ko la nyama, ko lʼelemo bia wiko mongo, mbaamba la toma touma tokaemaki la ndokoza.

⁷ Ko Roi Kulese aoloza bijwa biʼilombe ya Yawe biki Nebukadenesala oyelaka lima Yelusalema, ko ilaki biko ndʼilombe ya Nzakomba ikande;

⁸ Kulese, roi ea Palasa aoloza biko la likata ja Miteludata, bofongi owʼaumba, ko ende aoandola biko ele Sesebasala, chef ea Yuda.

⁹ Bone wete boanji wa biko: saani ya wolo ntuku isato, saani ya argent nkoto, tofaka ntukʼife lʼibwa;

¹⁰ bikala bia wolo ntukʼisato, la bikala bia argent bia elengʼemo benkama benei la jom, ko la bijwa binkina nkoto.

¹¹ Bijwa biuma bia wolo la bia argent biki nkoto itano la benkama benei. Sesebasala ayelaki biko biuma, aki ba lokafo utaka lima Babela nda Yelusalema.