Eyobo 1 - BONKANDA WA NZAKOMBA

Eyobo ndʼelo

¹ Bonto aki ndʼese ea Uza, lina likae Eyobo; ko bontʼoko aongaki kolongo, bonto ondelama, bonto oangaki Nzakomba ko asundolaki bobe.

² Ko bana baotswaki elʼende baende nsambo lʼamato basato.

³ Liaci likiʼnde wae mpate nkoto nsambo, la ngamela nkotʼisato, la ngombo nkoto, la mpunda yʼamato benkama betano, ko lʼanto ndʼilombe bauke mongo; koko bontʼone alekolaki bana ba Est bauma.

⁴ Banaʼakae bʼaende bacwaki olʼelambo ndʼilombe ya wengiʼontoʼokiyo, wae wengiʼonto ezaki elambo nda mbile ekae endezama; ko betaki bankanaʼakiyo basato wete bale toma ko bamele lʼiyo.

⁵ Aki bembile bia bilambo bikiyo osilaka, Eyobo etaki bana ko aolabuza ndʼoeko, ko aoetswa la nkesa mongo, aolekya mbeka ya ntatumba elengʼele baonjiʼokiyʼauma; ele Eyobo aokela, “Nkina banaʼakami baokelʼobe ko baotandola Nzakomba ndʼete maʼekiyo.” Eyobo akelaki ngoko bekela lʼekela.

⁶ Emo mbile eki bana ba Nzakomba oyaka oyatumyʼiyo mongo nda joso ja Yawe, Satana aoya nda ntoku ekiyo.

⁷ Yawe aokela Satana, “Oya lima nko?” Ko Satana aolamba Yawe, akela, “Limʼekiʼmʼesesakaka ndʼokili, ko limʼekiʼmʼete taka eko.”

⁸ Yawe aokela Satana, “La, osisimya bosali okami Eyobo? Nkʼosongi lʼende ndʼokili, bonto oonga kolongo, ondelama, oyoange Nzakomba, ko ayosundole bobe.”

⁹ Nkako Satana aoutola Yawe mbuto, akela, “La, Eyobo aanga Nzakomba nko ncina?

¹⁰ We ntofongakʼende ko ntosamanyʼende la lobalaka, ende lʼilombe ikae la toma toatʼende touma kio samanyu? Osakela bosala wʼakataʼakae bokako wa swa, ko liaci likae jofula ndʼokili.

¹¹ Lolonde sembola likata like aeyoko, ko fomwa toma toatʼende touma, ko ende ifokotola bitoi, o nda joso jʼelongi eke.”

¹² Koko Yawe aokela Satana, “Bala, ndekya toma toatʼende touma nda mpifo eke: lolo tosembolake likata like elʼende mongo.” Elengʼeko Satana aolola lima joso ja Yawe.

¹³ Koko emo mbile, aki banaʼakae bʼaende lʼamato oleka toma ko bamelaki vina ndʼilombe ya nsomi ekiyo ea jende,

¹⁴ ekima aoyʼele Eyobo, aokela, “Ngombo yʼaende ifusolakʼamoci, ko mpunda ileki toma ndongama lʼiko;

¹⁵ ko Ba-Saba baokwelʼiko, ko baotomba; onde, baooma basali lʼifaka yʼetumba ko nkʼemi olota okosangela, nkʼemi kika.”

¹⁶ Nko endʼotefela, omo aoya, ko aokela, “Tsa ta Nzakomba tokwa lima loola, ko totumba mpate ko lʼasali, tolasiza nye; ko nkʼemi olota okosangela, nkʼemi kika.”

¹⁷ Nko endʼotefela, onkina aoya, ko ende aokela, “Ba-Kasada baokafwana beloi besato, ko baokwela ngamela, ko baotombʼiko, onde, ko baooma basali lʼifaka yʼetumba; ko nkʼemi olota okosangela, nkʼemi kika.”

¹⁸ Nko endʼotefela, omʼaoya, akela, “Banaʼake bʼaende lʼamato baleki toma ko bamelaki vina ndʼilombe ya nsomi ekiyo ea jende:

¹⁹ ko bala bompompo wʼonene boya limʼete keleke, ko boko bokundʼilombe iko ndʼakono bakʼanei, ko iko yokwela banaʼako, ko baowa; ko nkʼemi olota okosangela, nkʼemi kika.”

²⁰ Limʼako Eyobo aolemala, aolatʼonkotoʼokae, aokoolʼotsaʼokande, ko aokwa ndʼamoci, aomemya,

²¹ ko akela, “Njaki lima likunju ja ngoya lʼotaka, ko njifuta o lʼotaka; Yawe akaaka, ko Yawe afonolaka; lina ja Yawe limemyame lʼimemya!”

²² Nda likambo line liuma Eyobo ntakelaki joi jʼobe, ko ntaandela Nzakomba bosamba wa liongi.