Angai 1 - BONKANDA WA NZAKOMBA

Lokamo wae batonge lenkina Yelusalema

¹ Nda mbula ea ife eki Dalayawesa roi, nda nsanza ea botoa, nda mbile ea joso ea nsanza eko, joi ja Yawe joya la Angai boteli ele Zelubabela bona owa Salatiele, gouverneur ea Yuda, Tele Yoswa, bona owa Yosedeke, nkanga ea joso mongo,

² akela, “Yawe ea beloi atefela ngone, akela, Bantʼane bakela, Ekeke etiela wae ekeke etongama ilombe ya Yawe.

³ Nkako joi ja Yawe joya la Angai boteli, akela,

⁴ Lʼekekʼene eji lʼinyo wetʼinyo mongo loyala nia tolombe tokinyo tokukama nsamba, ayalʼilombʼine melenge-melenge?

⁵ La ncinʼeko Yawe ea beloi akelʼaeyoko, Lilʼotema wae lokanele elenge ekinyo.

⁶ Lonakʼouke, ko lomuka nkʼisisi: loleka, lolo lofokinde; lomelaka, lolo lofokinde la limeli; lolotʼenkoto, lolo lofolote mpio; ko ende osala wae aate bofuto, aatʼofuto wae ilʼoko nda ntombi ele lʼalusu.

⁷ Yawe ea beloi akela ngone: Lilʼotema wae lokanele elange ekinyo.

⁸ Yawe akela, Lounda nda ngongo ea ntale, loyeia babaya, ko lotongʼilombe iko: ko emi njifokʼesaza ndʼiko, ko njifome-myama.

⁹ Lolendezakʼouke, ko bala, nkʼisisi: ko akiʼnyʼoyelaka ndʼola, mpufolaki fufo. Yawe ea beloi akela, Ncina ea na? Ncina wae andikumwʼinyo wengiʼonto ndʼilombe ikae mongo, ilombe ikami iomelengana melenge-melenge.

¹⁰ Ndʼewelʼeko, loola losukama lofokweya eongi, ko bokili bosukama bofocwʼamuka bʼoko o ndʼeloko ekinyo.

¹¹ Emi ndetaki bokaso ndʼese ene, la nda ngongo ya ntale, la nda blé la vina, lʼauta, la nda toma tomela nda bamoci, ko elʼanto, la nyama ya mbongola, la ndʼelemo beuma bekambema lʼakata.”

¹² Nkako Zelubabela bona owa Salatiele, la Yoswa bona owa Yosedeke, nkanga ea joso mongo, iyo la ncika eʼanto euma, baolimeza lolaka ja Yawe Nzakomba ekiyo, ko la baoyi ba Angai boteli, ngoki Yawe Nzakomba ekiyo otamakʼende; koko bantʼako baangaki boangi nda joso ja Yawe.

¹³ Limʼako Angai ekima ea Yawe aosangelʼanto bomwa wa Yawe, akela, “Yawe akela, Emi nde lʼinyo.”

¹⁴ Ko Yawe aoetola bolimo wa Zelubabela bona owa Salatiele, gouverneur ea Yuda, ko lʼolimo wa Yoswa bona owa Yosedeke, nkanga ea joso mongo, ko lʼolimo wa ncika eʼanto euma; ko baoya, baokambʼelemo ndʼilombe ya Yawe ea beloi, Nzakomba ekiyo,

¹⁵ nda mbile ea ntuku ife lʼinei, nda nsanza ea botoa, nda mbula ea ife eki Dalayawesa nda mpifo ea roi.