Amosa 1 - BONKANDA WA NZAKOMBA

Ntelo ya Nzakomba isukaka Damaseke, Aza, Tula, Edome, Amona, la Yuda la Yisalaele.

¹ Baoyi ba Amosa, oki ndʼoloi wa baesanyi ba mpate ba Tekwa, bakiʼndʼenaka ndʼewela ea Yisalaele ndʼembile bia Uziya roi ea Yuda, la ndʼembile bia Yelobama bona owa Yoasa roi ea Yisalaele, mbula ife nda joso jʼefukelo eʼokili.

² Ko akela, “Yawe ifofangwa lima Siona, ko ifotefela la lolaka lokae lima Yelusalema: ko bisobe bia baesanyi ba mpate bifolela lilelo ko nsonge ea Kalumela ifoenga.”

³ Yawe akela ngone: “Ndʼewela ea besesengano besato bia Damaseke, onde la benei, emi mpaokengola nsisoza eko: ekiʼyʼonokolaka Ngilada la bifeko bia nnokola ea biofo bia loolo;

⁴ lolo njifosokoza tsa ndʼilombe ya Azaele, ko toko tifolikya bilolombe bia Ben-adada.

⁵ Ko njifouna eakelo ea Damaseke, ko njifimola bosi eko lima bofoku wa Awena, ko njifimolʼende okitaka bonkando wa likulaka lima Bet-Edene; ko banto ba Sulia bifocwa nda lokafo nda Kili. Yawe aokela ngoko.”

⁶ Yawe akela ngone: “Ndʼewela ea besesengano besato bia Ngaza, onde, la benei, emi mpaokengola nsisoza eko; ekiʼyʼotombaka bantʼauma nda lokafo wae balekyʼiyo ele Edome:

⁷ lolo njifosokoza tsa nda lobalaka ja Ngaza, ko toko tifolikya bilolombe bia eko:

⁸ ko njifimola bosi eko lima Asedodo, ko njifimolʼende okitaka bonkando wa likulaka lima Asekelone; ko njifokengola likata likami osuka Ekulone, ko ncika ea Ba-Pelesete bifofitana. Nkolo Yawe aokela ngoko.”

⁹ Yawe akela ngone: “Ndʼewela ea besesengano besato bia Tula, onde, la benei, emi mpaokengola nsisoza eko: ekiʼyʼolekyaka bantʼauma ele Edome nda lokafo ko ntabofwa bokolo boki lilongo:

¹⁰ lolo njifosokoza tsa nda lobalaka ja Tula, ko toko tifotumba bilolombe biʼeko.”

¹¹ Yawe akela ngone: “Ndʼewela ea besesengano besato bia Edome, onde benei, emi mpaokengola nsisoza eko; ekiʼndʼokimaka eoto ekae lʼifaka yʼetumba, ko imolaki isei iuma botema, ko nkele ekae ekanjolaki iyakʼiyaka, alemwaki bolemo seko:

¹² lolo njifosokoza tsa nda Temana, ko toko tifotumba bilolombe bia Bosula.”

¹³ Yawe akela ngone: “Ndʼewela ea besesengano besato bia bana ba Amona, onde la benei, emi mpaokengola nsisoza eko: ekiʼyʼataka bamato ba Ngilada baki lʼaemi njaata, wete bafuza boleloʼokiyo:

¹⁴ lolo njifoambola tsa nda lobalaka ja Laba, ko toko tifotumba bilolombe biʼeko, la ndelemoza nda mbile ea etumba, lʼompompo nda mbile ea efeele:

¹⁵ koko roi ekiyo ifocwa nda jombo, ende la chefs ikande bolongo Yawe akela ngoko.”