Abakuka 1 - BONKANDA WA NZAKOMBA

Yisalaele aleki bobe

¹ Enelo eki Abakuka boteli enaka.

² O Yawe, emi nkusela we loela ko we ofolange joka elingi na? Nkusela we loela ndʼewela ea lofundo, ko we ofoikya?

³ Oyontumya bobe, ko onjeneya wikitano wʼobe ncina na? Bomelengano la lofundo bale nda joso likami, bikoji bilʼeko ko la lisa joetswa.

⁴ Ndʼewelʼeko esekyelo eoteka, ko etenelo ea ci efoza: ele bantʼobe baolengama ba liongi kio samanyu: la ncinʼeko ezelo eʼakambo eolola la bosesengano.

⁵ Loala nda beoci, ko lokanela, ko lokamwa o nkakamwa mongo: elʼemi njokamba bolemo ndʼembilʼekinyo bofʼinyʼimeza, mpeka la liko josangemʼelʼinyo.

⁶ Bala njoetola Ba-Kasada, booci wa nkambo la ntefo: bakendaka ndʼokili o ntuwana wae baate beyalo befa bekiyo.

⁷ Bale lʼoangi la booma: ezelo ekiyo ea baoyi la jilangi likiyo bale limʼelʼiyo mongo.

⁸ Ko chevaux ikiyo ilekola nkoi la loango ko yolekola loups yʼokolo la wale: ko bantoʼakiyo ba chevaux bayokende lʼeloloko: o nde, banto bakiyo ba chevaux bayaka limʼesi: bafekwaka elengʼele mpongo okaolaka lofwelemela fwe.

⁹ Baoya ndʼewelʼea lofundo nkʼiyʼauma: bilongi bikiyo bile ngole bompompo wa est: batakanya njanga ngole bekongo.

¹⁰ O nde, beta rois la jeto, ko baseka chefs o tola: basekaka wengi forteresse: elʼiyo batozaka biucu, ko bakolaka beko.

¹¹ Nkako bifoleka lʼokumbusano ngole bompompo, ko baofenda, ko bakwa likambo: wetʼiyo bandila mpamba ekiyo nzakomba ekiyo.

¹² O Yawe, Nzakomba ekami, okami Owʼoeko, we ofa lima bikeke bia seko nde? Iso tofaowa. O Yawe, wemyakʼende njeemya ndʼetenelo eʼakambo: ko we, O Ekenje, olokemya ndʼewelʼea lilako ja nsisoza.

¹³ We ole lʼaiso ba feto batalendakʼobe, ofoaleya wikitano wʼobe, oalelʼiyo bakela bosulu ncina na? Ko oyala wai ae bontʼobe omelʼonto olekolʼende la liongi, mmamela,

¹⁴ ko ilʼonto ngole nse ya lieke jʼokwa, ngole towawa tondakula, bafa la roi nda mpifo elʼiyo, ncina na?

¹⁵ Akandakʼiyʼauma lʼilofi, akandakʼako ndʼoncilʼokae, ko atakanyʼako ndʼojangʼokae wa mbabela: la ncinʼeko ayokemʼekemo ko asalangana.

¹⁶ Ndʼewelʼeko alekyaka mbeka ele boncilʼokae, ko atumbelaka bojangʼokae wa mbabela baimi: la ncina wae liondo likae lile lʼauta, ko befambeʼekande befulʼouke o la beko.

¹⁷ La ndʼewelʼeko ende ifofongʼuteza limʼojangaʼokae, boyala mpampa, ko afambya looma beoci nko jomo?