3 Yoane 1 - BONKANDA WA NZAKOMBA

¹ Mpaka ele Ngayo, wete endʼolangema, ondokʼemi eefe ea nsosolo.

² Olangema, mbonda wae oonge ndʼaoyiʼauma, ko okeme nda jonge, nkʼelenge eonga bolimo boke.

³ Elʼemi nsalanganaki lʼosalangano mongo aki balongo bamo oyaka, ko bansangelaki elenge ea nsosolo eke, wae nkʼelenge ekenda we nda nsosolo.

⁴ Mpa lʼosalangano bolekola bone, wete ndoke wae banaʼakami bayokende nda nsosolo.

Ngayo aosimama losimo

⁵ Olangema, okela joi jʼimeezo mongo akambya we balongo, ko la ndekola bako bale bafaya.

⁶ Iyo basangaki elenge ea eefe eke ea lolango nda joso jʼekelesia. Bolotsi wae wacindeza nda lokendo lokiyo ndʼelenge endeji lʼolemo wa Nzakomba.

⁷ Elʼiyo bakenda ndʼeloko ea Lina liko, ko bafambe yomba limʼele Bafaya.

⁸ Aonga wae tokambya banto bʼelengʼene wae toyaleme baamanyi lʼiyo nda nsosolo.

Diotulefe la Demetulio

⁹ Nkotelaki ekelesia bonkanda wa mpato, lolo Diotulefe, olanga mpifo ea joso elʼiyo, afotambʼiso.

¹⁰ Ndʼewelʼeko, nga njoya, njifoetola jofwa ja beketo bekae bekelʼende bia bitefelatefela ndʼeloko ekiso; ko afosukʼotema lʼaoyiʼako kika, lolo ende mongo afambe balongo, ko afeka bantʼako balanga wae baambe, ko auzʼiyo lima ekelesia.

¹¹ Olangema, tokimanake lʼobe, lolo la bolotsi. Okelakʼolotsi ale limʼele Nzakomba. Bontʼokelʼobe, atafena Nzakomba.

¹² Demetulio akuma lokumo jʼolotsi limʼele bantʼauma, ko limʼele nsosolo ngoko; ko lʼiso tolosima ngoko; ko wea wete ekumyelo ekiso ele ea nsosolo.

Besise bia ncindeza

¹³ Nki lʼaoyiʼauke bandeji wae nkokotele, lolo mpange lokotʼako la boko la lopi;

¹⁴ lolo ndendeza wae nkene nkʼelingi, ko mpanga totefelane bomwa lʼomwa.

¹⁵ Kuci ele we. Balongo bakuola. Uola balongo balʼekʼinyo lʼaina.