2 Yoane 1 - BONKANDA WA NZAKOMBA

¹ Mpaka ele bomoto osonami, ko lʼele banʼakande bandokʼemi eefe nda nsosolo; ko ondaokʼeefe afʼemi kika, lolo iyʼauma bandea nsosolo,

² la ncina ea nsosolo eyoyalʼeriso, ko ifofongʼoyalʼelʼiso bikeke biuma.

³ Boya, isei la kuci bifoyala lʼiso limʼele Nzakomba Ise, ko limʼele Yesu Masiya, Bonʼowa Ise, nda nsosolo la ndʼeefe ea lolango.

Tokanʼeefe, ko tolote bofombo

⁴ Nsalanganaki lʼosalangano mongo ekiʼmʼotanaka banʼamo bake bayokende nda nsosolo, nkʼelengʼekiʼsʼambaka bosise limʼelʼIse.

⁵ Ko aeyoko nkoonda, bomoto owa mpifo, afa ngole nkokotela bosise wʼaeyoko, lolo o boko bokiʼsʼoataka limʼiango, wete o tokanʼeefe ea lolango.

⁶ Ko ene wae eefe ea lolango, wete tokende elengʼele besise bekanae. Bone bole bosise boko, ngokiʼnyʼokaka limʼiango wae lokimane la boko.

⁷ Ele baungusanyi bauke baoliela ndʼokili, bale banto bafimeza wae Yesu Masiya aoya nda jonge. Bontʼone ale wungusanyi, ko ale wini owa Masiya.

⁸ Loalakʼinyo mongo, nyango lofocweya belemo bekiʼsʼokambaka, lolo lambe ndako ekinyo euma.

Toamanake lʼalaki bʼofombo

⁹ Osʼoleka joso, ko afosekwa nda lilako ja Masiya, afa la Nzakomba nye; endʼosekwa nda lilako liko, bontʼoko ale owa Ise ko lʼowa Bona.

¹⁰ Ayakʼontʼomo ayʼelʼinyo, ko afoyele lilako line, taloambake ndʼilombe ikinyo, ko talosambelakʼende la bosambelo wa, Bosalangano ele we!

¹¹ Ele bontʼosa-mbelʼende, Bosalangano ele we! aamana lʼende ndʼeketo bekae biʼobe.

¹² Mpeka la mbatʼaoyi bauke bandeji wae nkokotela, mpange lokotʼako la papier la boko: lolonde ndendeza wae nje elʼinyo, ko totefelana bomwa lʼomwa, wae bosalangano bokinyo bokoke.

¹³ Bana bʼeoto eke osonami, bakuola.