Yona 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Yona olwi me riŋo oko i baŋ Rwot

¹ Kop a Rwot rik obino baŋ Yona wot Amittai kun kobbe ni,

² “Ya, iwot i boma adwoŋ me Nineve, iwot irabbigi kop i komgi, pien balgi doŋ otuno oko i nyima kan.”

³ Ento Yona te ya me lwi wot Tarcic, me erweny oko i nyim Rwot. En rik te wot naka Yoppa, te wot nwoŋo mel ame onwoŋo awot Tarcic; en te ŋolo tikitiki mere me wot, te donyo i mel me wot kedgi i Tarcic, me erweny oko i nyim Rwot.

⁴ Cite Rwot te cwayo twon yamo moro adwoŋ meicel i nam, ame te miyo pii i nam tagere meicel, mel te mito tur oko.

⁵ Okwaŋ mel te doko alwor oko, ŋat acel acel te ero kok baŋ obaŋa mere ote daŋ bobolo jamigi ame onwoŋo tye i mel i nam, me wek mel doŋ ayot. Ento Yona onwoŋo tye odonyo mere piny, iyi icika ame tye i yie twal, buto kuno, kun daŋ onino gire oko,

⁶ Adwoŋ a loo mel te bino baŋe kobbe ni, “Lo-ni, yin inino anina aman piŋo? Ya malo ikwa obaŋani! Gwok onyo obaŋani bino tamo pirwa, me kur oto.”

⁷ Gin dok te ero kop kengi kengi ni, “Koŋ ibiye wunu, me obol wunu kwir, me oŋe ŋat ame omio gin arac-ci otimere i komwa.” Gin te bolo kwir, te mako Yona.

⁸ Gin te penyo Yona ni, “Yin koŋ ikobbiwa ŋat ame omio gin arac-ci otimere i komwa? Yin itio tic aŋo? Dok iya ikwene? Yin i dano me lobo mene? Dok yin ibedo rok aŋo?”

⁹ Yona te kobbigi ni, “An a dano me Eburania; an abedo ŋat ame lworo Rwot Obaŋa me polo, ame oketo nam kede lobo.”

¹⁰ Jo-nono rik te bedo i twon lworo adwoŋ meicel, ote dok penye ni, “Kara man ŋo ame yin itimo?” Pien jo-nono onwoŋo ŋeo ni en onwoŋo tye alwi alwia me rwenyo oko i nyim Rwot, pien Yona onwoŋo otittigi.

¹¹ Gin dok te penye ni, “Kara man doŋ wan otimi nadi, me nam kwe oko pirwa?” Pien pii nam onwoŋo tye amedde ameda i taggere.

¹² En te kobbigi ni, “Tiŋa wunu, ibola wunu i nam, me wek pii nam kwe oko pirwu; pien aniaŋ ni pii nam-mi tye ataggere meicel i komwu pira.”

¹³ Cite gin koŋ dok te temo kwaŋ atek meicel me dok cen i wi tela, ento mom te twerre, pien pii nam onwoŋo amedde ameda i taggere atek meicel i komgi.

¹⁴ Mannono te miyo gin kok baŋ Rwot kun okobo ni, “Okok baŋi, ama Rwot, tim ber kur imiwa oto pi kwo a dano man, kur imi remo a mom kede bal dok i wiwa; pien yin Rwot doŋ ityeko timo kite ame ineno ni ber baŋi.”

¹⁵ Gin doŋ te mako Yona bolo oko i nam gero a nam te gik oko,

¹⁶ Jo-nono te bedo i twon lworo adwoŋ meicel i kom Rwot, gin te yalo Rwot i mot aŋola, ote daŋ kwaŋ baŋe.

¹⁷ Rwot te miyo twon reccoro adwoŋ meicel mwonyo Yona oko; Yona rik te tyeko nino adek iyi rec, dyewor kede dyeceŋ.