Olevi 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Mot awaŋa me yalo Obaŋa

¹ Rwot rik olwoŋo Muca te kop kede i kema me rwatte, okobo ni,

² “Kobbi jo Icrael ni, ‘Ka dano moro i akinawu kela limmere akwo me amia baŋ Rwot, ibino kela wunu motwunono kun ikwanyo wunu i akina dok onyo i akina romi kede dyegi.’

³ “Ka ce mottere-nono obedo mot awaŋa me yalo Obaŋa ame okwanyo i akina dok, en bino miyo twon ame roccoro mom i kome; en bino kela i doggola kema me rwatte, me wek Rwot ogame;

⁴ en dano-nono bino keto ciŋe i wi mot awaŋa, eka ote gamo pire, me kwanyo ballere.

⁵ Icennere, en bino neko twonnono i nyim Rwot, eka awobe Aron, ame gin olamdog, gin bino kelo remo-nono, ote cocoro romo kom keno lam luŋ ame tye i doggola kessssma me rwatte,

⁶ Dano-nono bino yaŋo mot awaŋa mere-nono, te ŋoŋolo dul i dul.

⁷ Awobe Aron ame gin olamdog, bino kuto mac i wi keno lam, ote cano yen i maccono i yore yore;

⁸ awobe Aron ame gin olamdog, bino cano riŋo ame oŋoŋolo dul i dul ca, kede wie kede dwollege i wi yen ame tye i mac i keno lam, kun ketogi i yore i yore;

⁹ ento amontennege kede tyene luŋ wonnere bino lwoko kede pii, alamdog te waŋo oko luŋ i keno lam, me bed mot awaŋa alutu me yalo Obaŋa, mot ame owaŋo kede mac, gin a ŋwece kur a yomoro cuny Rwot.

¹⁰ “Ka ce mottere me awaŋa-nono okwanyo i akina rommi onyo dyegi en bino miyo nyok ame roccoro mom i kome.

¹¹ Bino neko i tuŋ anyarodi me keno lam, eka awobe Aron, ame gin olamdog te cocoro remo mere romo kor keno lam luŋ.

¹² Dano-nono bino ŋoŋolo i dul i dul karacel kede wie kede dwollege, alamdog te cano i keno lam kun ketogi i yore i yore,

¹³ ento amontennege kede tyene luŋ wonnere bino lwoko kede pii, alamdog te miyo luŋ kun waŋo i keno lam Mano en mot awaŋa alutu me yalo Obaŋa, mot awaŋa i mac, gin a ŋwece kur a yomoro cuny Rwot.

¹⁴ “Ka ce mottere ame emio baŋ Rwot tono obedo winnyi me mot awaŋa, en myero kel amam onyo itino awele me mottere.

¹⁵ Alamdog bino kelo i keno me lam te mojo ŋute oko, te waŋo i wi keno lam; bino dwidwinyo remo mere cwer i ŋet keno lam.

¹⁶ En dok bino kwanyo cukuru mere karacel kede yeye, te oonyogi i ŋet keno lam tuŋ kide, kan ame oonyo iye buru.

¹⁷ En bino yeco winyo-nono i bwome, cite myero kur pok yie, eka alamdog te waŋo oko i keno lam, kun waŋo i wi yen ame tye i mac. Mano en mot awaŋa alutu me yalo Obaŋa, mot awaŋa i mac, gin a ŋwece kur a yomoro cuny Rwot.