Nakum 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Rwot culo kwor i kom okworrere

¹ Man en kop ame orabo i kom Nineve, ame Obaŋa onyuto baŋ Nakum; ame onwoŋo obedo dano me Elkoc.

² Rwot en Obaŋa ame nyek, dok daŋ en acul kwor, Rwot culo kwor, dok akemo mako meicel; Rwot culo kwor i kom okworrere, dok kano akemo mere pi jo ame dage,

³ Akemo gire mom mako oyotoyot dok en tye kede twon teko adwoŋ meicel, en gire mom bino weko jo ame kop oloo, En beo i dye kot ame acwe i yamo ajuru, pol obedo apua me tyene,

⁴ En juko nam, pii mere te kwo oko, en mio pii i kulli luŋ two oko. Potti me Bacan kede kidi me Karmel en mio daŋ two oko, kede ature me Lebanon daŋ ner oko,

⁵ Kan ame en tye iye kiddi yeŋŋere, lobo obedo kidikidi daŋ meye oko; en mio lobo daŋ doŋ yie nono, wi podo luŋ kede jo a bedo iye,

⁶ Ka ee en oŋo, ŋa ame twero cuŋ i nyime? Ŋa ame twero kanyo lyeto me akemo mere? Akemo mere ony calo mac, dok daŋ babaro le la oko.

⁷ Rwot gire ber; en obedo kan atek me alara kare me can, dok en neo jo ame riŋo laro bane.

⁸ En bino tyeko okworrere odoco i twon ale le ame mol i teko adwoŋ meicel, dok en bi no ryemo jo ame dage naka i piny acol.

⁹ Gin ano kara ame iporo wunu me timo i kom Rwot? En bino tyeko oko odoco, mom gire bi no culo kwor iryo i kom okworrere.

¹⁰ Obino rweyogi luŋ calo okuto okadde kede reŋ kai otwo ame mac owano, Lo moro mom rik obin otwarre akinawu,

¹¹ te poro kop arac i kom Rwot, te daŋ mi yo tam arac baŋ jo?

¹² Rwot okobo ni, “Kadi bed jo Acuria tek dok welgi bup, obino miyo waŋgi rwenyo oko i wi lobo. Kadi bed yam awunowu mom dok abino medde wunowu.

¹³ Aman doŋ abino turo kol Acuria oko i nutwu, dok abino miyo jegere ame otweowu kede cot oko,”

¹⁴ Man en cik ame Rwot omio i kom jo Acuria: “Nyiŋgi mom dok bino winyere abino miyo cal apaa kede cal atwaka rwenyo oko i ot obaŋagi, abino kunyo bur me yikogi, pien konygi doŋ pe.”

Kop i kom rette a Nineve

¹⁵ Koŋ inen ba tyen ŋat ame kela amut aber, ŋat ame rabo pi kuc nen ba tyene i wi kidi. Kwer giri ecubanni, yin Juda cob giri daŋ kwoŋŋi, pien obalo mom dok bino medde lweny i komi atwal, pien doŋ ojwerogi odoco.