Matayo 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Kwali a Yecu

¹ Man buk me kwari a Yecu Kricito, akwar Daudi, akwar Iburaim.

² Iburaim onywalo Icaka, Icaka onywalo Yakobo, Yakobo onywalo Juda kede omego mege;

³ eka Juda kede Tamali te nywalo Perej kede Jera, Perej te nywalo Kejeron, Kejeron te nywalo Aram;

⁴ Aram te nywalo Aminadab, Aminadab te nywalo Nacon, Nacon te nywalo Calamon;

⁵ Calamon kede cege Rakab te nywalo Boaj, Boaj kede cege Luci te nywalo Obed, Obed te nywalo Yece;

⁶ Yece te nywalo abaka Daudi. Daudi i dako a Uria te nywalo Culeman;

⁷ Culeman te nywalo Rekoboam, Rekoboam te nywalo Abija, Abija te nywalo Acap;

⁸ Acap te nywalo Yekocafati, Yekocafati te nywalo Joram, Joram te nywalo Ujia;

⁹ Ujia te nywalo Yocam, Yocam te nywalo Akaj, Akaj te nywalo Kejekia;

¹⁰ Kejekia te nywalo Manace, Manace te nywalo Amoc, Amoc te nywalo Yocia;

¹¹ Yocia te nywalo Yekonia kede omego mege i kare ame oterogi i Babulon.

¹² Dok icennere ame doŋ oterogi oko i Babulon, Yekonia dok te nywalo Calatiel, Calatiel daŋ te nywalo Jerubabel;

¹³ Jerubabel te nywalo Abiuda, Abiuda te nywalo Eliakim, Eliakim te nywalo Ajor;

¹⁴ Ajor te nywalo Jadok, Jadok te nywalo Akim, Akim te nywalo Eliuda;

¹⁵ Eliuda te nywalo Eleajar, Eleajar te nywalo Matan, Matan te nywalo Yakobo;

¹⁶ Yakobo te nywalo Yucepu cwar Maliam a rik onywalo Yecu ame olwoŋo ni Kricito.

¹⁷ Amannono kwari luŋ ame onywalo geye i kom Iburaim ituno kede i kom Daudi, romo kwari apar wie aŋwen, dok geye i kom Daudi ituno i kare ame oterogi i Babulon romo kwari apar wie aŋwen, dok geye i kare ame oterogi i Babulon ituno kede i kom Kricito romo kwari apar wie aŋwen.

Kite ame onywalo kede Yecu

¹⁸ Nywalo Yecu rik obedo amane. Ame tottere Maliam pwod ocikere acika me nyomere gin i Yucepu, a mom ru gin onotte karacel, te ŋeye oko ni en ogamo yic me Cuny Acil.

¹⁹ Cware Yucepu nwaŋ en baŋ o a kite atir, mom omito kelo lewic i kom nyan-nu; oparo ni ewek aweka i muŋ.

²⁰ Ame onwoŋo pwod tye aparo koppono, amalaika a Rwot te nen baŋe i waŋ lek, a kun kobbe ni, “Yucepu akwar Daudi, kur ilwor tero Maliam me wot bedo cegi, pien yic ame en tye kede-nu mea Cuny Acil gire.

²¹ En bino nywalo atin awobi, ibino cako nyiŋe Yecu, pien bino laro jo mere i kom bal megi.”

²² Mano ducu otimere me wek kop a Rwot cobere kakare a yam okobo i dog odwarpiny ni,

²³ “Nen, nyako a mom ru tye kede apayi mere, bino yac, bino nywalo atin awobi; obino cako nyiŋe Emmanuel,” te koppere ni, Obaŋa tye kedwa.

²⁴ A doŋ Yucepu oco i waŋ nino, otimo i kite acalo amalaika a Rwot ocike kede; otero dako mere baŋe,

²⁵ naka mom te notte kede, ituno ka onywalo atin; te cako nyiŋe Yecu.