Marako 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Kop ame Lakana Abatija orabo

¹ Man en ageyi me amut aber i kom Yecu Kricito, Wot Obaŋa,

² acalo nwaŋ adwarpiny Icaya ocoo, ni, “Nen, acwao aorra i nyimi; en bino gero yo piri.

³ Dwon dano a redo i tim ni, ‘Ger wunu yo pi Rwot, yik wunu gudo mere cuŋ atira.’ ”

⁴ Amannono Lakana Abatija obin onen i tim kun rabo kop ni, “Ŋut wunu, me batijawu, me Obaŋa wek balwu.”

⁵ Jo rik ya i lobo ducu me Judaya, kede jo luŋ me Jerucalem, ciro bino baŋe. Gin tuco balgi, en batijagi i kulo Jordan.

⁶ Lakana rik ruko boŋo yer inaga, tweo pyere kede del, camo bonyo kede moo kic me tim.

⁷ En rabo kop kun kobo ni, “Ŋattoro tye ame alubo ŋea, en tek, kata oko; an mom aromo guŋo gonyo del amukkere.

⁸ An abatijawu kede pii, ento en bino batijawu kede Cuny Acil.”

Yecu obatija

⁹ I kare-nono Yecu rik obino kun oya i Najaret me Galilaya, Lakana obatija en i Jordan.

¹⁰ Ame en pwod oya ayaa i pii, oyotoyot Yecu oneno polo obarre, Cuny Acil obino acalo amam, olyao piny, opoto i kome.

¹¹ Dwonnoro te ya i polo kun kobo ni, “Yin Woda ame amaro, cunya yom i komi.”

Catan obito Yecu

¹² Cucuttono Cuny Acil te cwaye itim.

¹³ Obedo i tim nino pyeraŋwen kun Catan bite. Leyi me tim onwoŋo daŋ tye kannono, omalaika okonye.

Yecu ocako ticcere i Galilaya

¹⁴ I kare a doŋ otweo Lakana i buc, Yecu obino i Galilaya kun rabo amut aber ame oya i baŋ Obaŋa,

¹⁵ kun kobo ni, “Kare doŋ oromo, loc Obaŋa doŋ onoko ceggi; ŋut wunu, iye wunu amut aber.”

Yecu olwoŋo ocik rec agwen

¹⁶ Ka cen owoto i dog nam me Galilaya, oneno Cimon gin ominnere Anderiya; otye ka ciko bwo iyi nam, pien ceŋ gin ocik rec.

¹⁷ Yecu okobbigi ni, “Biye iluba wunu, abino lokowu ocok jo akaka rec.”

¹⁸ Oyotoyot gin oweko bwoyigi, ote Lube.

¹⁹ Dok owoto i nyim anonok, te neno Yakobo gin ominnere Lakana itino a Jebedayo, kun obedo i yee, oropo bwoyigi.

²⁰ Cucuttono olwonogi, gin oweko papagi Jebedayo odoŋ kede opakaca i yee, ote lube.

Dano a tye kede cen arac

²¹ Gin owoto i Kapernaum. Ka ceŋ me cabit oromo, Yecu odonyo i kacokere, opwonyogi.

²² Gin owuro pwonnyere atek, pien opwonyogi acalo ŋat a tye kede twer, pe acalo opwony-cik.

²³ I kacokeregi onwoŋo tye iye dano moro a tye kede cen arac.

²⁴ En oredo ni, “Kara ilaro ŋo kedwa, yin Yecu me Najaret? Ibino pi tyekowa atyeka bo? An aŋei, yin Ŋat Acil Obaŋa.”

²⁵ Ento Yecu tejuke ni, “Liŋiti, ya oko i kome.”

²⁶ Cen arac omie oryeye, oredo kede dwon aloŋo, te ya i kome.

²⁷ Omio jo luŋ owuro atek, kun openyere kengi kengi ni, “Man ŋo kara? Man pwony anyen, tye iye twer! En ciko anaka cen areco, owinyo doge.”

²⁸ Cucuttono rwoŋe te rwo i kabedo ducu i lobo Galilaya ame omano kuno luŋ.

Yecu ocaŋo maro a Cimon

²⁹ Yecu oya i kacokere, te wot i paco a Cimon kede Anderiya; Yakobo kede Lakana daŋ owoto kede.

³⁰ Maro a Cimon onwoŋo obuto, kun tye kede lyeto i kome; cucut otitte pire.

³¹ En owoto baŋe, omako ciŋe, otire malo, lyeto oya i kome, te cako konyogi.

Yecu ocaŋo jo apol otyeno

³² Otyeno ka ceŋ doŋ opoto, jo okelo baŋ Yecu otwo ducu, kede wegi cen areco;

³³ jo boma-nu luŋ ocokere i dog ot!

³⁴ En ocaŋo otwo apol ame kwon toogi papat, oryemo cen apol. Pe oye ni cennoro kob kopporo, pien oŋee.

Yecu owoto i weno me rabo amut aber

³⁵ Odiko con meicel ame piny pwod col, Yecu odilo, okato oko. Owoto kan a jo pe iye, orio ka kwayo Obaŋa kuno.

³⁶ Cimon kede owote mere owopo yore.

³⁷ Ka gin onwoŋe, okobbe ni, “Jo luŋ tye ka moyi.”

³⁸ En odokkigi iye ni, “Owotu dok i boma mogo ocele ame ceggiceggi kede kan, me arab kop kuno daŋ, pien cen abino pi koppono.”

³⁹ Owoto i dye Galilaya luŋ, orabo kop i kacokeregi, kun ryemo cen.

Yecu olonyo adobo

⁴⁰ Adobo moro obino baŋe, obako doge kun rumo piny, te kobo ni, “Ka imito, itwero lonya.”

⁴¹ Kica omako Yecu, te ryeyo bade, te gude kun kobo ni, “Ee, amito; lonyere giri.”

⁴² Cucuttono dobo te ony i kome oko, te lony.

⁴³ Yecu ocwae kun cike atek,

⁴⁴ kobbe ni, “Winy ba, kur ikob i dano moro, ento wot giri, inyutte keni baŋ alamdog, imi mot pi lonyere meri acalo rik Muca ociko, obed anyut baŋgi.”

⁴⁵ Ento en owoto, oero rabo pire atek, kede lalo koppono. Pi mannono omio Yecu pe dok twero donyo i boma moro kannaler, ento bedo teŋe kan a jo pe iye; jo ya i kabedo ducu bino baŋe.