Jeremia 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Obaŋa olwoŋo Jeremia te miye twer me rabo koppere

¹ Man kop a Jeremia wot a Kilikia, ame en dano acel i akina olamdog ame onwoŋo tye i Anatot i lobo a jo Benjamin.

² Kop a Rwot obino baŋe i mwaka me apar wie adek me loc abaka Yocia wot Amon, abaka me Juda.

³ Kop a Rwot obino baŋe daŋ i kare abaka Yekoyakim wot a Yocia, abaka me Juda naka iyi agikki mwaka me apar wie acel me loc a Jedekia wot a Yocia, abaka me Juda, tuno kede naka i dwe me abic ame otero iye jo i Jerucalem oko iyi opii.

⁴ I kare-nono kop a Rwot obino baŋa kun kobba ni,

⁵ Kun mom ru acako keti iyi totti, onwoŋo doŋ an aŋei, dok kun mom ru onywali, onwoŋo doŋ akweri oko pi tiyo ticca; ayeri me bedo adwarpiny baŋ rok ducu.

⁶ An ate gamo ni, “Ama Rwot Obaŋa! Koŋ inen an mom aŋeo kop, pien pwod atidi.

⁷ Cite Rwot dok te gamo ni, “Kur ikob ni, ‘An pwod atidi;’ pien ibino wot baŋ jo luŋ ame abino cwayi baŋgi, dok gin ame abino kobo ni ikobi, ibino gire kobo,

⁸ Kur ilworgi, pien an atye kedi me konyi, man kop a Rwot.”

⁹ Rwot te ru cwayo ciŋe gudo doga, te kobba ni, “Nen ba, doŋ atyeko keto koppa i dogi,

¹⁰ Nen, tin doŋ atyeko keti me rabo kop Obaŋa baŋ rok apapat kede baŋ loc apapat, me puto kede mu ko amuka, me balo kede reto piny, me gero kede pito.”

¹¹ Kop a Rwot te bino baŋa kun penya ni, “Jeremia ineno ŋo?” An ate gamo ni, “Atye ka neno yao.”

¹² Rwot te kobba ni, “Ineno kara aber, pien atye ka neno koppa, amito ni ti ticcere cobi.”

¹³ Kop a Rwot dok te dok bino baŋa tyen me aryo, kun penya ni, “Ineno ŋo?” An ate gamo ni, “Aneno gulu ame pii tye awalo i yie, kun doge owirre teŋe i tutuŋ anyarodi.”

¹⁴ Rwot te kobba ni, “Gin arac bino ya i tutuŋ anyarodi ame bino poto i kom jo luŋ ame bedo i lobo.

¹⁵ Nen ba, an atye ka lwoŋo atekere apapat ame tye i te loc luŋ ame tye tutuŋ anyarodi, Rwot okobo; gin luŋ obino bino, ŋat acel acel i akinagi te keto kom loccere i doggola me Jerucalem, kun oguro cellere oko me lweny i kome, me lweny i kom boma luŋ me Juda.

¹⁶ Dok an abino ŋolo kop i kom jo me Juda pi timgi arac luŋ me kwera. Gin doŋ obedo waŋo odok a ŋwece kur baŋ obaŋe mogo ocele, kun daŋ oworo gin ame gin ame gin otio kede ciŋgi.

¹⁷ Cite yin, myero idi cunyi iya malo me ikobbigi kop ducu ame abino ciki kede. Myero cunyi kur pot pirgi, naka mio abalo cunyi i nyimgi kuno.

¹⁸ Nen ba, an tin abino miyo ibedo calo cel ame gero atek meicel, acalo pagi me nyonyo, dok acalo apama me mola, ame twero cuŋ i nyim jo me lobo man ducu, i ciŋ obakki me Juda oloccere, olamdoggere, karacel kede jo luŋ ame bedo i lobo man.

¹⁹ Gin bino lweny kedi, cite mom obino loyi, pien an atye kedi me lari.” Man kop a Rwot ikokome.