Arabkop 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Kwo koŋŋyere mom

¹ Man en kop arabkop, wot a Daudi, abaka me Jerucalem.

² Konnyere pe, konnyere pe, man kit ame arabkop okobo kede Kwo gire konnyere pe! Konnyere kom pe atwal.

³ Kony aŋo kara ame dano nwoŋo i tic atek luŋ ame en lolle iye, ame en lolle iye i te ceŋ piny kan?

⁴ Lwagi jo man kato, lwagi jo ocele dok bino, en lobo bedo mere kite acel kare luŋ

⁵ Ceŋ donnyo te dok poto, te dok ru lokere dok oko cen kun ame woki edonnyo iye.

⁶ Yamo kodo dok tutuŋ anyarolum, eka te wirre dok tutuŋ anyarodi; yamo te bedo mano piny kittono nakanaka tuno ka okato, wirre amannono naka te dok dwogo cen kakare,

⁷ Pii ame opoŋ i kulo luŋ mol woto i nam, cite nam mom poŋ gire; pii dok cen kan ame kulo ocakere iye, te dok cako mol i kuno dwogo i nam,

⁸ Jami luŋ doŋ ool gire meicel, mom tye ginnoro ame dano romo kobo iye; waŋ dano mom yeŋi i gin ame eneno, yit dano daŋ mom yeŋ i gin ame cwinyo.

⁹ Gin ame yam tye, en ame daŋ bino bedo tye, kede gin ame yam otio, en ame daŋ obino tiyo; ginnoro anyen gire mom tye i te ceŋ piny kan,

¹⁰ Tye ginnoro ame otwero kobo ni, “Neno, man pwod nyen?” Yam gire obedo tye con, i kare okato ame wan pwod ope.

¹¹ Jo gire mom tye ka po pi jami a yam otimere con, dok daŋ mom tye ŋattoro i akina jo ame bino lubogi, ame bino po i kom gin ame bino timere anyim.

Kwo ame arabkop obeo iye

¹² An arabkop, yam abedo abaka me Icrael i Jerucalem.

¹³ Abedo miyo wia tic kede ryeko me yenyo kede ŋeyo jami luŋ ame tye ka timere i te polo piny kano Obaŋa omio dano lolle i tic ame mom kelo yomcuny kadi acel.

¹⁴ Atyeko neno jami luŋ ame tye atimere piny i te ceŋ piny kan; gin luŋ aluŋa anwoŋo ni konygi pe; gin luŋ rom aroma i ryemo yo yamo,

¹⁵ Yat ka ogom con mom dok romo twenyere, dok mom oromo kwano jami ame komgi pe onen.

¹⁶ Acako lwodo kop i cunya kena kun akobo ni, “An abedo twon dano moro aryek meicel, aryek akato oloc luŋ ame ogeo loc i Jerucalem. An atyeko beo i kite ryeko apapat, atye doŋ iŋec abup meicel.”

¹⁷ Abedo miyo wia tic me ŋeyo ryeko, kede apoa, karacel kede miŋo. Atyeko niaŋ ni mannono daŋ konnyere mom; rom aroma i ryemo yo yamo.

¹⁸ Pien ka iryek atek ateka, ibedo daŋ ipar abup meicel, dok daŋ ka ŋeci dwoŋ admoŋa, ibedo daŋ i cwercuny adwoŋ.