1 Obakki 1 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

Kare ame abaka Daudi doŋ oti oko

¹ Abaka Daudi onwoŋo doŋ oteggo meicel ame mwaka me dittere doŋ bup, ame mom doŋ twero winyo lyeto moro i kome kadi bed wumere kede olaŋgit apol ata.

² Man omio omiro mere adoŋo okobo ni, “Adwoŋwa abaka, wek oyenyi nyannoro a pwod opoŋ apoŋa me okel baŋi, me en bin bed ŋat a gwoki. En bino buto i laŋeti, atotya koŋ mi komi bed amomor.”

³ Gin rik te bedo yenyo nyannoro amwonya i lobo me Icrael luŋ, ote nwoŋo nyako ame olwoŋo ni Abicaki, ame obedo nya jo Cunam, ote kelo baŋ abaka.

⁴ Nyannono onwoŋo rik mwonya meicel. En doŋ te bedo agwok abaka kun daŋ konye i tic ducu, cite abaka mom naka oloke odoko dako mere.

Adonia omukere me bedo abaka a jo Icrael

⁵ Adonia wot a Daudi ame Kagit onywalo rik te mukere i wie kene me doko abaka. En oyiko gadigadi mere i wie kene, wegi aguragura karacel kede jo pyerabic ame ŋweco telo nyime.

⁶ Pappere rik mom ru otimo ginnoro ame waŋo cunye, mom daŋ openye kadi acel i kom gin ame etimo. En kono rik onwoŋo obedo awo bi ame mwonya meicel, dok en obedo awobi ame olubo Abicalom.

⁷ En oporo kop kede Yoab wot a Jeruya karacel kede Abiatar ame obedo alamdog, gin te ye lube kede konye cobo mittere,

⁸ Cite jo magi obedo pe i yik Adonia: Jadok alamdog, Benayo wot a Yekoyadi, Natan ame obedo adwarpiny, Cemei, Rei, karacel kede ocirikale ame gwoko Daudi.

⁹ Adonia rik te ŋolo rommi me yalo Obaŋa, kede twoni, kede leyi ocele ame ocwe, kun timo man i ŋet kidi me Twol, ame onwoŋo tye i ŋet En-rogel. En olwoŋo iye omego mere luŋ ame obedo itino a Daudi kede jo abaka luŋ adoŋo mege me Juda,

¹⁰ cite en mom olwoŋo Natan adwarpiny, kede Benayo kede ocirikale ame onwoŋo gwoko Daudi, kede ominnere Culeman.

Oketo Culeman obedo abaka

¹¹ Natan te kobbi Batceba tota a Culeman ni, “Yin ce mom iwinyo wunu ni Adonia wot a Kagit odoko abaka kun adwoŋwa Daudi mom oŋeo ginnoro iye?

¹² Aman ba, yin myero ibin me amii ryeko me laro kwoni kede kwo a wodi Culeman.

¹³ Myero yin iru wot baŋ abaka Daudi, iwot ikobbe ni, ‘Adwoŋŋa abaka, mom rik ikwoŋo baŋa, an aŋecani, ni wodi Culeman en ame bino loc kakari, kun en bedo i wi kommi me loc? Kara piŋo Adonia en ame dok abaka’.

¹⁴ Doŋ i kare ame yin pwod itye ikop wun abaka an abino pello baŋe ate moko koppi.”

¹⁵ Mannono te miyo Bateba neno abaka iyi icika mere me buto. Abaka onwoŋo doŋ oteggo meicel, kun Abicaki nya jo Cunam, konye i tic ducu.

¹⁶ Batceba oryebere piny oworo abaka, abaka te penye ni, “Imito ŋo ba, dakona?”

¹⁷ En te gamo ni, “Adwoŋŋa, yin rik ikwoŋo baŋa an aŋecani, i nyim Rwot Obaŋani, kun ikobo ni wodi Culeman bino loc kakari, kun en bedo i kommi me loc.

¹⁸ Aco koŋ inen, Adonia doŋ odoko abaka oko, kadi bed yin adwoŋŋa mom iŋeo ginnoro iye.

¹⁹ En doŋ aman oŋolo twoni me yalo Obaŋa kede leyi mogo ocwe karacel kede rommi apol ata, dok en olwoŋo iye awobeni luŋ, Abiatar alamdog kede Yoab atel wi mony; cite Culeman en gire mom olwoŋo.

²⁰ Aco aman, yin abaka, wan jo Icrael luŋ doŋ tye i komi me kobbigi ŋat ame bino leyo kakari, ame bino bedo i kom me locci.

²¹ Naka bino miyo ka kareni doŋ oromo, yin adwoŋŋa, me wot weo karacel i kwarini, an kede woda Culeman ote lokowa doko wegi bal.”

²² Ame en onwoŋo pwod tye akop abaka, Natan adwarpiny te daŋ pello oko baŋgi.

²³ I kare ame omio abaka oŋeo ni Natan daŋ obino, Natan okato i nyim abaka, eka te ryebere i nyim abaka kun nyime gudo piny.

²⁴ En te kobbi abaka ni, “Adwoŋŋa abaka, yin en ikobo ni Adonia bino loc kakari kun bedo i kommi me loc?

²⁵ Pien en doŋ owoto gire oko, oŋolo twoni me yalo Obaŋa kede leyi ocele ocwe, karacel kede rommi apol atata, dok daŋ olwoŋo iye awobe abaka ducu, kede Yoab atel wi mony, kede Abiatar alamdog. Aman gin doŋ otye ocem dok daŋ omatte i nyime, kun oredo ni, ‘Kom abaka Adonia bed ayot nakanaka!’

²⁶ Cite en gire mom olwoŋa an amironi, kede Jadok alamdog, kede Benayo wot a Yekoyadi karacel kede wodi Culeman.

²⁷ Adwoŋ, man yin itimo, en ame mom daŋ ititiwa wan omironi ŋat ame aleyo kakari acalo abaka kun bedo i wi kom me loc?”

²⁸ Abaka Daudi te kobo ni, “Koŋ ilwoŋ wunu Batceba dwog baŋa kan.” Batceba te dwogo, te bino cuŋ i nyim abaka.

²⁹ Abaka Daudi te kwoŋ i nyime kun kobo ni, “Acalo Rwot ame olaro kwona i kit can luŋ tye kwo-ni,

³⁰ kite ame rik doŋ atyeko kwoŋ kede baŋi i nyim Rwot Obaŋa me Icrael, kun akobo ni wodi Culeman bino leyo kakara, dok en bi no bedo i wi kom me loc kakara, tin doŋ abino cobo kwoŋŋanono oko,”

³¹ Batceba te ryebere piny i nyime kun nyime gudo piny, te woro abaka kun kobo ni, “Myero Obaŋa mi kom adwoŋŋa abaka bed yot nakanaka!”

³² Abaka Daudi te kobo ni, “Lwoŋ wunu Jadok alamdog, Natan adwarpiny, kede Benayo wot a Yekoyadi.” Jo-nono te bino cuŋ i nyim abaka.

³³ Abaka te kobbigi ni, “Ter wunu omirona, iwot wunu karacel kedgi, me iwot imi wunu woda Culeman bed i wi kana na i kome, miye wunu eriŋ kede, itere wunu i Gikon.

³⁴ Jadok alamdog kede Natan adwarpiny te wot wirre kede moo me bedo abaka me Icrael kuno; eka ite kuto wunu apel kun ikobo wunu ni, ‘Kom abaka Culeman bed ayot nakanaka!’

³⁵ Wun doŋ ite ya wunu i kuno dwogo, kun wun ilubo wunu yore, en te bino bedo i wi komma me loc. An doŋ atyeko kete me bedo aloc iyi Icrael kede Juda.”

³⁶ Benayo wot a Yekoyadi te gamo kop abaka ni, “Obed amannono gire! Rwot Obaŋani myero mi mok amannono!

³⁷ Kite a rik obedo kedi, myero daŋ dok bed i Culeman kittaca, mi loccere bed atek akato me adwoŋŋere Daudi.”

³⁸ Eka Jadok alamdog, Natan adwarpiny kede Benayo wot a Yekoyadi, kede jo Keret, kede jo Pelet, te wot kelo Culeman bedo i wi kana a Daudi, te cako riŋo kede. Gin te tere kede naka i Gikon.

³⁹ Kare ame gin otuno kuno, Jadok alamdog te kwanyo moo ame onwoŋo tye i adomo iyi kema a Rwot, te wiro kede Culeman. Gin te kuto apel, jo te wo ni, “Kom abaka Culeman bed ayot nakanaka!”

⁴⁰ Jo luŋ te ciro lubo yore, kun okuto alete, dok olelo meicel, ame dwongi amor ayeŋo lobo ayeŋa.

⁴¹ Woogi te winyere baŋ Adonia kede wele mere, kun gin doŋ otyeko aramagi at yeka. Kare ame Yoab owinyo koko apel, en openyo ni, “Woo a dok awinyere malo amala i boma ca kono?”

⁴² I kare ame en pwod tye akop, Yonacan wot Abiatar alamdog te tuno oko. Adonia te kobbe ni, “Kato i ot, pien yin gire i dano aber, ikelo amut aber.”

⁴³ Yonacan te gamo kop Adonia ni, “Pe gire, abaka Daudi otyeko keto Culeman me bedo abaka oko.

⁴⁴ Abaka omio Jadok alamdog, kede Natan adwarpiny, kede Benayo wot a Yekoyadi, jo Keret kede jo Pelet otere i Gikon, kun ŋweco i kana a pappere Daudi.

⁴⁵ Aman doŋ Jadok alamdog kede Natan adwarpiny otyeko wirre oko kede moo me bedo abaka i Gikon. Gin doŋ oya i Gikon kuno, obino ame alelo meicel, ame omio woo doŋ dwoŋ atek i boma. Woo ame iwinyo wunu ca, megi ennono.

⁴⁶ Culeman doŋ tye obedo oko i wi kom me loc.

⁴⁷ Aman omiro abaka luŋ doŋ tye apwoyo Daudi, kun okobbe ni, ‘Obaŋani myero mi nyiŋ Culeman rwo atek akato megi oko.’ Abaka Daudi tye akulo wie piny i wi tanda mere.

⁴⁸ Dok en okobo daŋ ni, ‘Myero mi pwoc baŋ Rwot Obaŋa me Icrael ame tin omio atinna acel i akina itinona obedo i wi komma me loc kun an ikoma daŋ aneno kede waŋa.’ ”

⁴⁹ Lworo te ma ko wele Adonia luŋ, ote ya wot oko, kun ŋat acel acel mako yo mere en kene.

⁵⁰ Adonia daŋ te ya oko i kannono kun lworo ociro oko i kom Culeman, te wot atir mako tuŋ ame tye i keno me lam.

⁵¹ Culeman rik te winyo ni Adonia lworo ociro oko i kome, dok daŋ ni tye ame omako tuŋ me keno lam pi laro kwo mere, kun kobo ni, “Abaka Culeman myero koŋ ge kwon baŋa ni mom ebino neka an amiro mere i pala lweny.”

⁵² Culeman te kobo ni, “Ka ce en onyuto oko kannaler ni en edano aber, yer wie acelloro gire mom bino poto piny, cite ka onwoŋo ni en tye ka timo timmoro a mom ber, en gire bino to.”

⁵³ Abaka Culeman te cwayo jo wot ome i keno lam. En te bino woro abaka Culeman. Culeman te kobbe ni, “Wot giri tuŋssi.”