ROMIA 1 - REN PAURIINA (BSI)

¹ Jisu Khrista sra owr khat, kenyee ra mdo own, Isowr kṭha paumin tumra msikki mdo pankai,

² chodu ngi Mma khulpu rek hin pau mdo reel dok Kchiir Laaika rek ava,

³ daksaa dil kṭoiji Devid charuwl thungki, Mma Chapa mlei thu kṭha paumin

⁴ ungta kdiyou thungki kring karheel kchiir deekki Pthla rutan dil kṭoiji Mma ava Isowr Chapa tdit hurda, nenki Mukpu Jisu Khrista,

⁵ Mma thu nen chati rek mkheng arlakki Mma miing tummi krin cha rek thu kupṭoi tkurthut nraan plungnee leh kenyee tarlaan chaak in, 6ava thung ngi naan rukka Jisu Khrista dora ado to own chaak dok in;

⁶ kintiingra mdo own chaak dok, Romia thungki Isowr wonsat lo mii mkheng hintha:

⁷ nenki Npah Isowr leh Mukpu Jisu Khrista hinki plungnee leh kdaai ava naan hin jiamso.

Kpanpaakki mdo ṭhil

⁸ Rukri reeppi, naan akheng ngi mlei kurthuwkda, neiji neiki Isowr Jisu Khrista miing ngi kpanpaak chaakka, mleija dultipaam mkheng thu naan do rin chaak ava karyaamda.

⁹ Mleija kdown liit kma neiji kṭhil chaak mpha thu, naan abin paphaak innu, Mma Chapa ki kṭha paumin thu plung klutti sok kdolo psuk chaak Isowr ri neiki sakhi kurthuwk.

¹⁰ Isowr hin kdoṭhil chaak leiji tunva mṭutna reltha mrot pikda naan hin kthleng kchaam ping.

¹¹ Mleija neiji naan aju kurdut ṭhi nuwm reennu, mleija naan ru akaptan pik ra, pthla ktongki chla ado tithem pik nraan,

¹² mleija khat leh khat do rin chaak ava ngi naan leh nei mikniing thu plung kurchuwlli tkursop chaak nraan lei kurthuwk.

¹³ Ku u knaorek, mleija ktlok chati murson rek arlakki heppi naan arlak rukva kminni kdokhau chaak nra, mpha ktai thung ngi kthleng nuwm kcha ping (pdainu mapkhaan tlitda) naanni ava ado kdee raan neiji kngei chaakka.

¹⁴ Grik miirek leh nonaat ktaak miirek mikniing ungta ksing leh ka ak mikniing hinni neiji lei ktuwl chaakka:

¹⁵ ava leiji naan leh Romia thu ka am miirek hin neiji kṭha paumin kdo paryaam nuwm chaak.

Kṭha Paumin ki Rutan

¹⁶ Kṭha paumin mlei thu neia kning kjakme: krin kcha miipum ktai hin mkirliin chaak nrangki Isowr rutan ava rukringi Jihudia miirek ungu Grik miirek hin ruk.

¹⁷ Mleija krin changi mlei kurthuwkda Isowr ki rinkindit mdo tpandan; ava hanto kjitda, “Mdo rin chaakki rinkindit mii ava kringra.”

Dulti Mii ṭhatma

¹⁸ Mleija Isowr plung thitta kṭha kma mkheng kupsulli parwaanki arju kandang, ungta miirek ṭhat ma ava ngi kindit pkhaanda.

¹⁹ Mleija Isowr mlei thung ngi mmaan dodee ava oltek da, mleija Isowr ri mhin inni tdetda.

²⁰ Dultipaam mapṭhan daatki Mdak tdee pchaanma, mleija Mmaki kṭuw knai kma rutan leh Isowr ktongki ava Mma doseem dok thung ngi kindit chelli dei lamda. Ava leiji mmaanna kuptlot pik amnime;

²¹ mleija mmaanni Isowr kdeidok kurthuwk daat lam joso Isowr kdingi mmaanni Mhin kjat pik lamme, pdainu mpoibin inna dosime, ungta muplung inna mong kukto ngi kjiing kcha a.

²² Msin nuwm reen lei inni ka aak chlamma,

²³ ungu kmaang kro kmaki Isowr laarnee ava kmaang chrangki miilai mdit mata puwarek mdit mata saarek mdit mata khaoṭit khaojaar meel klou jikki khut dosak pthla ngi parthleng lamda.

²⁴ Ava leiji, mmaan msingreel in thung ngi, mdaksaan mdo kjat ma nraan, muplung bin in dongei thu mkurchou chaak nraan Isowr ri mdo maak pthii lam,

²⁵ mleija mmaanni Isowr mlei kindit ava mdo huwn chaak inni parthleng lamda, ungta kapṭhang Mii ava kchang rang nga mdo seem ava luwbuk lamda, sok ruk lo lamda, kapṭhang Mma ava kṭuw knai kma tpanpaak ra! Amen.

²⁶ Mleija hava leiji mmaanna Isowr ri ningkja kurhui rak na ktongtha mdo maak pthii lam. Mmaanki snu rek rukva miinopa tlotna ava miinopa liit kma ktongtha parthleng lamda,

²⁷ anto lulungi pselrek rukva snu rektu miinopa ngi tlot nlamme, ungu khat leh khat ning kakraalli karngai lamda, psel rekki psel rektu ningkjana nong tlo lamda, ungta mdoparma naanki mdo arlaan raan ava mmaan mdak kat inki mii kurthuwk.

²⁸ Unggta Isowr kdei cha thu mmaanni kurhuiji mdodee maan leiji, kmaang chrangki poithuw leh karmak nong ktlo thu Isowr ri mdo maak pthii lam.

²⁹ Mmaanna kṭha kma, hangmal, mii khusiir parthitna ktlo, kheithe ngi kdim, miii ke eayou, kthe purduk, kuhuwng kcha, miikrai, mmaanni khothe lamda,

³⁰ titi ktada, Isowr dopder, ning er ri kpau, kpohok, napal ktlo, kṭhakma kupthuwk, mnuh mpah pauthe kleek,

³¹ ka aak, krin kma, plung ksel, wonsat ktaak, kṭha kma rek nong hava mkheng ngi kdim chlam kurthuwk.

³² Hava lu nong ktlo miirekka kdiyou kat ra kdingi Isowr ri mdo palreen ava mmaanni deida, avale daat mmaanni tlo lamda, pdainu ava ktlo rektu kulrot nlamda.