PAURIL 1 - REN PAURIINA (BSI)

Pauril ki Msit

¹ Devid chapa; Isreel ki kruwng, Solomon pauril.

² Lousing leh kṭha pau ktin chrangki, mlei kukthuk pau kdei pandi rangki hava paurilli bom donle kdei pchaang.

³ Ksing, plung kindit, kindit leh kṭha thu tak heppi ta am rang tdit mlei thu mmaanni aju kpurchu chraan.

⁴ Kdiil dok mii ava ngi msin bet nra, ungu tartlaang nao ava ngi kukthuk betti mdo dee chaak nrangki.

⁵ Hava pauril rekka ksing mii rekki mdodee pandit bet nra kurchuk dok mii hinni kṭhi pik rangki,

⁶ mleija mmaanni pauril ki mlei kurdowl mdo dee pandit nraan ksing mii rek dodee pandit rang ngi mdo kjit.

Tartlaang nao hinni mdo Parseel

⁷ Lousing thloi ni ndit bi, ru kri reeppi Mukpu ta kjat rang tha kurthuwkka. Ka aak miiva lousing kjat me ungu kurchuk nuwmme.

⁸ Kchapa rek, apah in dothe knaa atkiin in ungu anuh in do purchu leek chmaan.

⁹ Mmaan do purchua naan lamchet mṭhat bet nrangki likin yeel mdit mata nsut thu mṭhat nra pṭhi kna hep daat.

¹⁰ Kchapa rek, pnu kirvei rekki atipthleem inta ro maan.

¹¹ Mmaanni, “Leen te eayo raanni miilai khat thlaam inche! Arle pchimda talet nraan kdeipandi kma mii angṭhe thlaam inche,” dida mthe inta ro maan.

¹² Mmaan ava nenni nphaak in mpha thungva, mruwng knei kchun kdam mi ka am kro; pdainu nenni nkurdut ṭhi inbi kdiyou lamra.

¹³ Nenni nup prut inbi ni inn inna alrou vi kdim chra.

¹⁴ Arva in, karchin sap inche, tup prut in mkheng nga tatham sap raan, di donle kthe lamra.

¹⁵ Kchapa rek, ava lu hep daat mii dil ṭoi maan; mmaanna aloi daak in.

¹⁶ Mleija kṭha kma do khat ktlo rang thungva karda bong lua pchaang lamme. Mpha ktai thu ke eayou rang daatti ka am lam.

¹⁷ Tukjown ra puwa ava ngi msut daat arlaanni tipman nrang ki kchak nipjer bi dosi nime,

¹⁸ pdainu anto lu hep daat miirek va mmaan mdaksaan makmanyo chaak nra ktaang mdo pansam in.

¹⁹ Daku miiva mpha ktai thu mup prut nrang daat kbin, anto kbin mii pum ktai hin anto katti mdo tlot in.

Lousing do Own

²⁰ Aryaa chaan lousing ngi innlam arlak leh bajaar thu ka am rek hinni mo ownna.

²¹ Krowl kparyaa ngi khuwpii paltong rek thung leh mii kurtuwl na mun thung ngi mo ownna.

²² Ka aak miirek! Tija pang roi sotti ta aah rang nga abin inna? Lousing raida tija ksotti am naan di? Kurchuk liit nimaan timo?

²³ Neiji ado karchak inna aryaan! Neiji naan hinni kṭha pau leh lousing aju the pik nikaan di.

²⁴ Nei ki hinni athlen nraan aju own innu, kowl aklat chaak inna, pdainu knaa tkiin liit maan ti. Naanni plung plut maan ti.

²⁵ Neiji ado kthe pik in mkheng aleek inna ungta ado kpindit pik raan rukka ro maan ti.

²⁶ Ava leiji naanni kja kakham aphaak in mpha thu neiji aju pnii chaak in nikdi, tiṭit traanni atukklop dok in mpha thu aju pnii chaak in nik di.

²⁷ Tchang khuw kdung ngi kraang heppi kja kakham aphaak in mpha thu; ungu kdungksaan aphaak in mpha thu, neiji aju pnii chaak nikaan di.

²⁸ Au dil rongi lousing neia mo own naan di, pdainu neiva arthawng liit nimaang. Mmun ktai thu nei msuw thlaam naan di, pdainu mpha liit nimaan ti.

²⁹ Naanni lousing ki mkat na do khat lee dei maanti ungta mpha ktai thu Mukpu pau pṭoi maanti.

³⁰ Neiji ado kthe pik inna ngei maan ti mdit mata ado kpindit pik raan rukka ro maan ti.

³¹ Au leiji naan nongtlot naki mthei pha chnaan di, ungu naan nong tlot katti aju kupkoi chraan.

³² Ka aak miia kdiyou kcha, mleija mmaanni lousing mdo pthlei in. Ka aak mii rekka mmaanni mdo dee pandit ma lei inni, ava ngi mdo eakre lam.

³³ Pdainu nei mkaryaa mii pum ktaija maang nime. Mlei ktaakki mṭit nrang thungki mma kurhui chra.