MAK DO KJIT KṬHA PAUMIN Paubul 1 - REN PAURIINA (BSI)

Baptis Kup ptlot Johon Doparyaam

¹ Hava Isowr Chapa Jisu Khrista ki kṭha paumin mdo pṭhunna.

² Khulpu Isaijah thung ngi mdo kjit lulu, “Asuw in, lam akardit pik raan amaiṭhuwm inni Neiji ktamsii kap pthlatta,

³ miilai khat krowlli kbowk laiji owngda, “Mukpu lamṭoi ra ardit pik, mkhu ther arjit pik chaan.”

⁴ Baptis kup ptlot Johon ava kbowklaiji kandang da, plung panle da baptis ktlo ungu pnu rek kup ptlot pik mlei thung ngi paryaam da.

⁵ Ungta Judia paam mkheeng thung ki ungu Jerusalem thung ki mii mkheeng Mhin thlengda. Mmaanni mupnu ton in mdo the thut intu kilṭhi ngi Jordon kreng thu Johonni baptis ptlot lamda.

⁶ Tunva Johon na ut mulli turkhown downa hiil naada, murkowl saavun sulpaar kparyeel da, khaopruwn leh nowm pkhui dii chaa nee da.

⁷ Ungta mma ngi mii rek hin hanto purchuk da theda, “Nei kdil ṭoida karvang miilai ava nei kihinva kdung ngi kunlor lang lang. Neia jukuwn da mkhu kok rii kparthlee pik rang ruk kurhui chmaang.

⁸ Neiva dii tu kurthloppi baptis akup ptlot in, pdainu Mma va pthla kchiir ri baptis akup ptlot raan.”

Jisu ngi Baptis mdolo leh mdo Pthleem na

⁹ Ava arveel lik thu Jisu ngi Galil ki Nasaret thungki thleng da Jordon kreng thu Johon ni baptis ptlot da.

¹⁰ Mma ngi dii thungki marhan thuw thungta, tunkat daatti parwaan kparvangda, pthla ngi Uṭhuw heppi mleen ni arjung kṭum deida.

¹¹ Ungta parwaan ki krowl khatti theeda, “Nang nga kwonsat lo kchapa pti, ahinni kdung kning ktlung nga.”

¹² Ungta tunkat daatti pthla ngi kbowklai ji haisi da.

¹³ Ungta Mma ava kbowklaiji nii sompli amda, seitaanni pthleem da, nowm saa rek tu amda, Mhin waantamsii ngi sok lo chda.

Jisu ngi Tuwlva Kuk kjowng Plii rek mdo Own

¹⁴ Tunva Johon muk kjown dok dil thaan ni, Jisua Galil paam tha arvang da, Isowr ki kṭha paumin paryaam da.

¹⁵ Hanto theda, “Mpha kcha karvang nga, Isowr Kruwngpaam lamknai ja, plung apinle inra kṭha paumin arin chaan.”

¹⁶ Ungta Jisu ngi Galil truwn biing ngi mhai kurlon thungta, kchakki tuwlva deengda kuk jowng slii, Simon leh mnaopa Andrija deida, ditta mmaanna tuwlva kuk kjowng mii rek lam.

¹⁷ Ungbi Jisu ngi mhin inni theda, “Nei kdil aṭoi chaan, Neiji mii kuk jowng apurthuw chnikaan di.”

¹⁸ Ungta mmaanni kuk not katti mak kchak rek in ma pthi lam thida Mma dil ṭoi chlamda.

¹⁹ Ungta Mma ngi mhai kursown set thungta Jebidi chapa rek Jeems leh mnaopa Johon ni arkuwng tunni makkchak rek in ktuphut meek slii hai deida.

²⁰ Ungbi Jisu ngi mdee lam thungta own teng lamda; ungu mmaanni mpah in ava msra owr rek tu arkuwng tun ma lam thida Jisu dil ṭoi chlamda.

Pthla Kṭha kma do ṭhi Miilai Khat

²¹ Ungta Jisu leh msiikhu rekka Kaparnahum tha arvang lamda, ungu mup pduk nii ngi sabath mvee thungta Jisu ngi synagog thu lut da purchuk da.

²² Ungta Mma do purchu karyaa mii rek ava kdung ngi ngak chlamda, mleija Mma ava Nowlam chukpu ruk kurthuwk kmapa ngi mrutan khat pummi purchuk da.

²³ Ungta tun kat daatti pthla kṭha kma doṭhi miilai khatti synagog thung ngi keu da ṭapda.

²⁴ “Nasaret ki Jisu neenna tak mhai pirdit chnaandi? Neen mke ae krep raan kthleng pti mo? Nah ku pti tdit neiji kdee chaak, Isowr hinki kchiir khat ava pti.”

²⁵ Pdainu Jisu ngi mma raida, “Rim kdi am, mma thung ki arvang thuwk dok,” dida theda.

²⁶ Ungu pthla ktobor ava ngi miilai ava kdung tnok da pu owng thida mthungki arvang thuwk da.

²⁷ Ungta kdei daat mii rek mkheng nga ngak chlamda, ava leiji msingreel inni karkhewl lamda, “Hava talu lu da? pauren kpurchuk mo? pthla ktobor rek hin rutan pummi pau mreenna mup pṭoi daat inna.”

²⁸ Ungu tun kat daatti Jisu mlei thung ngi pauren ava Galil paamkowl kteen thung ngi kurjou da.

Jisu ngi Mii Knempok mdo Pdam

²⁹ Ungu kbeiji Mma ngi synagog ma thida Simon leh Andrija inn tha Jeems leh Johon ṭhida valut da.

³⁰ Ungta Simon kternu riiphaakki koida ki iip daat ava mii rekki Mhin son pik tengda.

³¹ Ungbi Mma ngi thlengda mkhut kjowng da tip prip da ungbi mriiphaak ava dam chda, mma ngi mhin inni sok lo pik chlamda.

³² Kniw jungtla da khuw mjiin rui rui thungta ava nitti mii rekki kukoi rek leh tarnam doṭhi rek mkheng Jisu hin ṭhi paphaak lamda.

³³ Ungu khuwpii ava thungki mii mkheng nga thurngot bul kurtlun dekki thuwk kurtuwl lamda.

³⁴ Ungbi Mma ngi msik msik omlaiji kukoi mii rek ava pdamda, tarnam lut da ram mdo tparvee rek ruk rei pthii pik lamda, Mma ava ku tdit tarnam rekki mdo dee lei inni kpau ava pchaang lamme.

Jisu ngi Galil thu mdo Paryaam

³⁵ Ungta mup pduk nii jiingsun kpanma ngi Mma ngi kardel da mmun ktliing khat thu chet da, ava thung ngi ṭhil chda.

³⁶ Ungbi Simon leh mmiiṭhii rekki thlaam da,

³⁷ ungu mmaanni mphaak khot in thungta, “Mii mkheng ngi Nah ata thlaamma,” kdi ngi Mhin the pik lamda.

³⁸ Ungbi Jisu ngi theda, “Hava marveel ki khuw murson rek thung ngi va nowl in che, mmaan hin rukku paumin paryaam chni, mleija Neia ava ki tummi kthleng ping.”

³⁹ Ungta Mma ngi Galil paam mkheng thung leh synagog rek thung ngi chet tlowng da paumin paryaam da, tarnam rek ruk rei pthii da.

Jisu ngi Miilai Khat mdo Pdam

⁴⁰ Ungta raaichii kirvei miilai khatti Jisu hin va da tpee da mhin mdo pdam pik chaak nra ktham chda, theda, “Nang ngi at trot pik cheen tung ngi mhai partleu cha.”

⁴¹ Jisu ngi msut rim thungta wonsat lo da, mkhut ṭen arjii da makmei chunni mhin arthawngda, “Neiva krotta kartleu cha.”

⁴² Ungbi tun kat daatti mraaichii tleida kartleuda dam chda.

⁴³ Ungta Mma ngi klu katti parseel thida kuk notti psunda.

⁴⁴ Ava dilli mhin theda, “Asuw ku mii khat lee hin hava mlei song ma. Pdainu thiimpu hin setleng ngi chet ra mma ngi aju suw so; ava dilli mii rek hin kdam cha ping tdit ado tdet na ngi, Mousi paureen dil kṭoiji tlaai adown cha.”

⁴⁵ Pdainu mma ngi vangsun da hava pau mlei thung ngi kantekki kpau pṭhun da, pau ren rek ava marden kteen thung ngi purjouda. Mma pauson ava ngi mlei kurthuwk da, khuwpaam ava thu Jisua kurphuwng ngi lut chip pchaang kurnowlme. Mma ngi khuw duwn tha ma am daat thungta, mmun ktai ki mii rek Mhin thlengda.