HEBRU 1 - REN PAURIINA (BSI)

Mma Chapa thungki Isowr Pauna

¹ Alraangva Isowr ri npahle hin thangva mlam msik msik knempokki khulpu rek hin pau theda,

² pdainu hava mṭut na nit rek thungva Mma ngi Mchapa thung ngi mi pau pik inda, Mma ava do mkhengki alrou kpha chrang ngi kchol da, Mma thu dultipaam ava pṭhang da.

³ Mma ava Isowr laarnee ngi ownda, ungta Mma nopa kat ava louda, dultipaam ava Mma rutan ki pauna ngi tpa am da. Pnu leiji Mma ngi kpartleu mtlot diltha, kparthaang sii kinreel ava khut chang ktong tha Mma ngi ku ongda.

Isowr Chapa Mlin siina

⁴ Mma ngi miing mdo phaak ava mmaan hinva kheel sii ngi kinreel mkurthut lulu ngi, Waan tamsii rek hinva Mma ngi kinreel sii.

⁵ Mleija Isowr ri Waan tamsii khat hin theda, “Nah Nei Kchapa pti, snii ngi akupluk chaakka.” Mdit mata veikhat nowlli, “Neia Mma Pah kurthuwk nik di, ungu Mma Nei ki hin thangva Kchapa kat ra.”

⁶ Ungta vei khat nowlli ru kri verri kṭou ava Mma ngi dultipaam thu murjun ṭhi mpha thu, Mma ngi the da, “Isowr Tamsii rek mkheng ngi Mma ava luw abuk lamso.”

⁷ Tamsii rek mlei thu Mma ngi theda, “Mma ngi Waan tamsii rekka tarthli ungta Msra owr rekka mei kṭuwng tpur owlda.”

⁸ Pdainu Mchapa mlei thu Mma ngi the da, Nah ako onna ava, O Isowr ṭuwnai liit nime, Nah Akruwngpaam ki rinkindit rek paal ava mkindit kat.

⁹ Nang ngi rinkindit wonsat lo tinu, ungta Nowlam kupṭoi kma ava pder chtinu; ava leiji Isowr, Nangki Isowr ri akchol da, Nah plap rek tipkheel dek da kanpa ki thao apubul chda.’

¹⁰ Ungta, “Mukpu Nang ngi, mupṭhun daat ki dultipaam pṭhang tinu, ungu Parwaan na Nah akhut nong tlot;

¹¹ mmaanna kmawng chra, pdainu Nah ka am thlit daat pti; dona heppi mmaan mkheng nga kchuwl chlamra,

¹² buw lulu mmaanna thlep pthii lam nadi, ungta mmaan na karthleng chra, pdainu Nah anto ka am thlit chdaat pti, ungu Nah akumma ṭuwnai me.”

¹³ Pdainu Mma ngi Waan tamsii khat hin theda, “Nah aksnuwm kma rek akhu tingi kthiik du khim khai Nei ku khut chang ktong tha ku ong cha.”

¹⁴ Kirliing kpha chrang rek tummi sok klou pik ra ado sii, mkheng ava Pthla rek sok klou slii ava pmemo?