2 TIMOTHI 1 - REN PAURIINA (BSI)

¹ Jisu Khrista thungki rinkhu ava paureel dil kṭoiji Isowr poibin Jisu Khrista ki kenyee khat, Poul,

² neiji wonsat kdolo knaopa Timothi hintha: nenki Mukpu Jisu Khrista leh Mpah Isowr ki plungnee, wonsat ungta kdaai am so.

Kpanpaak ungta Kuk ksop

³ Nei kpahle do tlot lulu ngi, neiji kdet liit kma kṭhil chaak mpha thu, nah aju bin phaak chnu, kuplung ril kindit tu kilṭhi ngi, neiji sok kdolo chaak Isowr ava kpanpaak chaakka.

⁴ Tditta kanpa ava ngi kuplung mdim chaak nra, nah arthli kbu bin phaak chnu, suwn jaan knai kma, aju kurdut ṭhi nuwm chnu.

⁵ Nang ngi plung ril kurthlutti ado rin chaak ava neiji bin phaak nu, tditta ru kri reeppi nah apii Lois leh anuh Eunas lengi mdo thloi in krin cha ava tunva nah athung ngi ka am munra kdingi neiji kbin chaakka.

⁶ Tditta neiji nah leenni kukhut kdo khiin ava ngi nah thung ngi ka am Isowr chla ava mei heppi aṭuwn nra neiji aju kbin phaak chaakka.

⁷ Mleija Isowr va kṭi ki Pthla mipii me, pdainu rutan ungta wonsat ungu daksaa kurjowng ki Pthla mido tpiik chaak in.

⁸ Ava mkurthutbi, nenki Mukpu, mdit mata Mma tummi rowng inn thu ka am nei klei thu, sakhi kpii thung ngi aning tapjak ma, pdainu Isowr ki rutan thu kṭha paumin tummi, kja kakham mhai phaak ṭhi cha.

⁹ Mma ngi nenna mi ktlan pik inda ungta Kchiir do own khatti mi own chda, nong tlot lei pme pdainu Mma poibin mleithu ungu mpha roi ksot thu nen nhin mido tpiik chaak in Jisu Khrista ki plungnee thu,

¹⁰ ungta tunva nen mi kaktlan pik Jisu Khrista do pandan thu mi tdet chda, Mma ngi kdiyou ea krep da ungu kṭha paumin thu mar awng ki kdiyou kro liit kma rinkhu mithuw ṭhi pik da.

¹¹ Mleija hava kṭha paumin ava tummi neia kparyaam, ungu kenyee ungta chukpu khatti mhai kchol chda,

¹² ungu ava ngi mlei kurthuwk da, neiji kja kakham ava anto heppi kdo phaak chaak. Pdainu neia kning kjak me, mleija klam rin chaakka neiji kdee, ungta nei ki hin mdo tsil chaak na Nit ava mphaak du khim khai, Mma ngi mhai kseel pchaang ra kdingi neiji kbin chaakka.

¹³ Jisu Khrista thu ka am krin cha leh wonsat thu, nei kihin ki nang ngi ado aryaak chaak dok pauna rek krowl dil ṭoiji apṭoi cha.

¹⁴ Nah hinni ado tsil ndok kindit ava nen nthung ngi ka am Pthla Kchiir ava ngi aseel chaak na.

¹⁵ Mmaan arlakki Phygilas leh Harmoginis tu kilṭhi ngi Asia thu ka am mii mkheng nei ki hinki mdil kinle chtir lam ava nang ngi ado dee dok.

¹⁶ Mukpu ngi Onesiphoras phungka ava wonsat alo chso, mleija mpha ktai thu mma ngi kuplung mhai tapngam pik chda, thiirri ngi nei mdo tbowl leiji mma va mning pjak me,

¹⁷ pdainu mma ngi Romia mthlun mpha thu, kdung ngi nei mthlaam chda, mhai pha da.

¹⁸ Nit ava thu Mukpu hinki wonsat mma ngi mdo phaak chaak nra, Mukpu ngi mma ava arot pik chso. Ungta mma ngi Ephisia thu kdung ngi nei sok mdo talo chaak ava kṭha jikki nang ngi ado dee dok.