Hebele 1 - Chipangano Chabwangu

Lesa akososa ukupitila mu Mwana wakwe

¹ Kale Lesa alikusosa nefikolwe fyesu imiku iinji, namunshita ishipusene-pusene ukupitila mubasoseshi.

² Nomba munshita shakupelako shino asosa nafwebo ukupitila mu Mwana wakwe. Muli Ye Lesa alengele ichalo, nakambi eye asalile uwakuba umwine wafintu fyonse.

³ Muli Ye mukoboneka ukusanika kwamuchinshi waku Lesa, nakambi echipasho chaku Lesa. Euchingilila ifintu fyonse namashiwi akwe afiso. Ulo ashilile umulimo wakunakilila amabifyo abantu, ayile kumulu kwikala kukuboko ukwamulyo kwaku Lesa uwafiso fyonse.

Umwana waku Lesa alichilapo pabangelo

⁴ Umwana waku Lesa alichilapo pabangelo, kubati ifyo ishina ndyo Lesa amupele lyalichilapo pamashina yabangelo.

⁵ Pakuti nakale Lesa tasoselepo kumungelo uuli onse ati, “Niwebo Mwana wanji. Lelo nine Wiso nakufyala.” Nakambi Lesa tasoselepo kumungelo uli onse ati, “Nebo nakuba Wishi, naye akuba umwana wanji.”

⁶ Nomba ulo atumine Umwana wakwe uwakwambilapo pano chalo, Lesa asosele ati, “Abangelo abaku Lesa bonse balingile ukumulomba.”

⁷ Pafyabangelo Lesa asosele ati, “Lesa alasangula abangelo bakwe umwela, abapyungi bakwe ukubati chimbili-mbili chamafyanga amulilo.”

⁸ Nomba pafya Mwana wakwe Lesa asosele ati, “Mwe Lesa, umupando wenu wabufumu wakubelelela lonse mubufumu bwenu mulapingula mubulungami.

⁹ Mwalitemwa ifilungeme, nokupata ifitalungeme. Echo Lesa, Lesa wenu, amuchinshika nokumusuba amafuta, ayakulanga insansa ukuchila abanenu bonse.”

¹⁰ Nakambi asosele ati, “Mwebo Bashikulu, nimwe mwalengele ichalo pakutatika, nefyakumulu nkulya, fyalengelwe kuminwe yenu.

¹¹ Ichalo neulu fyakuloba, kuntu mwebo mwakubelelela. Fyonse mfi fyakushila kubati fyakufwala.

¹² Mwakufifunganya kubati chikutulo, elo chakwaluka kubati chakufwala. Nomba mwebo mwakubelelela, elo nemyaka yenu yakubelelela.”

¹³ Nakale konse Lesa tasoselepo kumungelo uuli onse ati, “Ikala kukuboko kwanji ukwamulyo, ukufikila nkalule ifipondo fyobe ukuti fibe apakunyantapo amakasa obe.”

¹⁴ Napo abangelo, temipashi iikomupyungila bwaka, iyo Lesa atuma ukwafwilisha bo abakupuluka.