YUDAS 1 - AY ATAYI

¹ Dor Yudas ara. Dor Yesus Kristus akerja bwemtam ipic ara. Doram Yakobus arewec ara. Car masirin, e Allah arow ara. Aramat ipicam car arow memem atawemfan. Aramat ipicam damos car ajiomawarman. Yesus Kristusam asan akat car aomawarman. Bare, dor a surat car aeapomtamamin.

² Allah serow awut car bajiomcan. Aram jak akatnakut car batetamcan. Aram damos awut car bajiomcan.

Suw atakam mamememtam ow

³ Dojowow akatonokom. Allah, doram, caram, ajortewforow. Dor masirin, e ajortewforowas, inim atakam surat car bweapomtam, jak aseremomkurumof. Do nat, car e suw atakam mamememtam ow botpem fak, inim atjen bow surat car bweapomtam, penting awutut apormin. Daram Allah atakam asicimamom. Aramat ipicam e atakam e tarowat ow atatitamef. Owam e atakam bwemanimtiw asan opok.

⁴ Bare, e suw atakam mamememtam ow, car akac ajarewsiapmes. E nat, ar e arat pwicak, atakam car botaw opok ara. E ow, bare fasi ara. Aram atakam, “Bare, Allah ow damos ipic ara. Inimas dar jursumecas aemcom, ar dar bajurusum opok aemcemarow.” Wunam, “Yesus Kristusam Allah opok.” Inim aemes. (Dor inim atakam apormin. Inimas dor a surat car aeapomtamamin ara.) E nat, e Yesus Kristus cowok, dar aomomamarow. Ar cowok daTuhan ara. Bare, ametnak ara, e Allah atakam botaw ow, tulis aefesen. “Allah e ow siksa aemcema.” Inim aefesen.

⁵ Caram a atakam takas camsom ara. Do nat, inim bi binip car bacomomtam akat aemin: Tuhan, e Israel ow, e Mesir capinmi bakan bajios, asan akat aomefen. Aram e ow ajortawefen. E nat, e wun Israel ow Allah basicim opok. Inimas asep jofay, aramat ipic e ow acajimirefen.

⁶ Ametnakam ara, Allah, malaikat, apok ji aeremtitamefen. Asep ara masirin, e malaikat, eras bwem pwicak arawen. Aram e aronam op bemap asan bakan ajiosfesen. Bare, Allah, e malaikat, jiwne rantai manam ajiktiwefen. Aram e malaikat, jiwic asan akimopma. E jofay awut aenawcow, ar e malaikat adosa atakam asakamtiwcema.

⁷ E Sodom owam, e Gomora owam, e ajawuamesef kota owam, e malaikat aemfesas cowok, aoemfesen. Ar jursumecas awut aemfesen. Aram fa per aemfesen. Bare, Allah, e ow, jiwne jismak asan aman aatamjurusumawarma. Inimas ara, Allah, dosa ow ajurusumcema apormom ara.

⁸ E suw atakam mamememtam owam inim cowok aemames. Ar isi atamwitmes. Isi atamwitmes masirin, jursumecas aemames. Aram Allah atakam jen opok aemapmes. Aram cemew e onam op akatnakut malaikat aatmes.

⁹ E malaikat kepala ipic juwas Mikael nat, e ow aefes dosa, atakam pwicak botawji opoken. Ar e Iblis atakam aamtawfes ara, ar e Musa asumu ipic atakam aamtawfesen. Mikael nat, e Iblis dosa, atakam basakamtiw opoken. Aram Iblis cemew bat opoken. A nat, “Bare, Tuhan jiman or baafcan.” Inim aeefen.

¹⁰ E suw atakam mamememtam ow nat, cemew e amsom opokas aatmes. Binatang, bare bi binip opok ara. Ar pok desen aemcemes. E owam, e binatang inim cimin bi binip opokas, desen aemcemes. Inimas Allah e ow ajurusumcema.

¹¹ E owam ajurusemcemes. Ar Kain aemefas inim cimin aemfes. Ametnakam, Bileam pok batewet jak asinomefen. Inimas ar suw atakam amememtamefen. E jepen owam inim cimin sarimnakap aemfes. Aram Korah inim cimin, atakam aopowfes. Inimas aram aramat ipic inim cimin daniwis aemamescemes.

¹² Bare, car damos mamjiom pokbwi aancokom, e suw atakam mamememtam owam car akac aancemes. E ow masirin, jursumecas aemcemes. E nat, aram namke opok. E amosam aances, ar paknam awut ara. Inimas e ow, ponowas inim cimin namkeas ara. Aram te opok jak, inim desenas ara. Bare, fo e jak awaramosomcema. E owam os eke bwi, eke opok os inim desen ara. Ow inim os, bimi epcom asusumtawcemes. E os masirin, sanak asakurumcema.

¹³ E ow, namkeas aemcemes. Inimas ar e jicupum wa awutut inim cimin ara. E wa e besep sakar e fwikin amesemtiwcema. E ow e akoyneycemar bayar inim cimin ara. Aram jiwicnakut asan aatamemapcemes.

¹⁴ Bare, Henok, Adam urpis ara. Ametnak ara, Henok e ow aemcesas, atakam aotawefen: “Jakaperey. Tuhanam, amalaikat tarowat arkenakutam, akac aneycemes.

¹⁵ Aramat ipic, ow takas aoworporcema. Aram e dosa ow fasi, e aemawiris fasias takas, dosa atakam asakamtiwcema. E owam Tuhan atakam pwicak aomotawfes. Tuhan e atakamam, dosa atakam asakamtiwcema.” Inim aeefen.

¹⁶ E suw atakam mamememtam ow, icim atakam atawawarmes. Ar asan pwicak aemapces, ar kawey ow salah atakam atawcemes. Aram e apwicak jak asinomamesas jipu aemames. Aram arma atawsicimames. Aram, kawey ow, bweyof cowok asicimames. Eras, e kawey ow, pok a batetamas ara.

Atjen bowas

¹⁷ Dojowow akatonokom. Car, e daYesus Kristus atakam botaw atewosomef ow, e ametnak atakam aotawfesas, binip mamcomomey.

¹⁸ “E asepnak jofay aenawcow, uc car asaycan ow aememcemes. E ow e apwicak jak asinomcesas jipu aemcemes.” Inim aefes.

¹⁹ Bare e ow, ow aampacamames. Ar awames capinmias cowok jipu aemames. Aram Roh Kudus epcom opok.

²⁰ Dojowow akatonokom. Ca nat, e Allah atetamforow atakam mamsicimkurumey. Roh Kudusam bi binip car atetamaman. Caram e bi binip jipu, janim Allah mamanimey.

²¹ Caram ow tarowat mamememawarey. Inimas Allah, damos, car ajiomkurumceman. Caram e Yesus Kristus daTuhan serow car bajiom jofay bwenaw, manmok mamtiwemey. Bare, ar e jofay jiwnenak car atetamceman.

²² Caram e bi binip arke ow, serow mamjiomey.

²³ Car e ow mamjortewey— ow, wun ow jismak aman basarimtew inim cimina. Caram e wun ow, serow mamjiomey. E nat, car e dosa omar mamemey. E ow e pwicakas aemawirisas bifan mamfayomey— ow sakar pakaian bifan afayomamesas inim cimina.

Allah akatnakut ara

²⁴ Allah, bare akatnakut ara. Aram fak ara. Inimas ar car a mamkawi fak bemapom, inim fakas aomomamar araman. Car bajuneyasin. Aram car fasi opok ow abipu batawem, inim fakas aomomamar araman. Car masirin, jak akatnakut aememcomokom.

²⁵ Bare, Allah cowokut ara. Aramat ipic, Yesus Kristus daTuhan aemefas aporef. Inimas ar dar ajortewforow. Ow aramat ipic akatnakut baporces. Aram aramat ipic awutnakut baporces. Aram aramat ipic e ow takas jirmec fak ajirimamaras, inim baporces. Aram aramat ipic e takas aomomamaras, inim baporces. Ametnak ara, aramat ipic inimas aatamemawiri. Wowam ar inimas aatamemawarma. Asep jofayam ar inimas aatamemawarcema. A atakam bare atakamnak ara.